ಸಮಬಲಗೊಳಿಸಿದ ಒಗ್ಬಚೆ
ಒಡಿಶಾದ ಮುನ್ನಡೆಯ ಸಂಭ್ರಮ ಕೇವಲ 5 ನಿಮಿಷಕ್ಕೆ ಸೀಮಿತವಾಯಿತು. 14ನೇ ನಿಮಿಷದಲ್ಲಿ ಬಾರ್ಥಲೋಮ್ಯೋ ಒಗ್ಬಚೆ ಹೆಡರ್ ಮೂಲಕ ಗಳಿಸಿದ ಗೋಲು ಪಂದ್ಯವನ್ನು ಸಮಬಲಗೊಳಿಸಿತು. ಓಗ್ಬಚೆ ಮುಂಬೈ ಸಿಟಿ ಎಫ್ ಸಿ ತಂಡ ಸೇರಿದ ನಂತರ ಉತ್ತಮ ಅವಕಾಶವನ್ನು ಗಳಿಸಿರಲಿಲ್ಲ. ಬದಲಿ ಆಟಗಾರನಾಗಿಯೇ ಅಂಗಣಕ್ಕಿಳಿಯುತ್ತಿದ್ದರು. ಈ ಬಾರಿ ಆರಂಭದಲ್ಲೇ ಸಿಕ್ಕ ಅವಕಾಶವನ್ನು ಸದುಪಯೋಗಪಡಿಸಿಕೊಂಡು ಗೋಲು ಗಳಿಸಿದರು.
ಮೌರಿಸಿಯೋ ಗೋಲು
ಒಡಿಶಾ ತಂಡಕ್ಕೆ ಆರಂಭದಲ್ಲೇ ಯಶಸ್ಸು. 9ನೇ ನಿಮಿಷದಲ್ಲಿ ಡಿಗೋ ಮೌರಿಸಿಯೊ ಪೆನಾಲ್ಟಿ ಮೂಲಕ ಗಳಿಸಿದ ಗೋಲು ಮುಂಬೈ ಎದುರು ದುರ್ಬಲ ಎನಿಸಿದ ತಂಡಕ್ಕೆ ಮುನ್ನಡೆ ತಂದುಕೊಟ್ಟಿತು. ಈ ಗೋಲು ಮುಂಬೈ ತಂಡದಲ್ಲಿ ನಿಜವಾಗಿಯೂ ಆತಂಕವನ್ನುಂಟು ಮಾಡಿರುವುದು ಸಹಜ. ಸೇಡಿನ ಮೊದಲ ಗೋಲಾಗಿ ಅದು ಮೂಡಿ ಬಂತು. ಮೌರಾಸಿಯೋ ಹೆಚ್ಚು ಶಕ್ತಿ ಉಪಯೋಗಿಸಿ ಚೆಂಡನ್ನು ತುಳಿದಿರಲಿಲ್ಲ. ಮುಂಬೈ ಸಿಟಿ ಗೋಲ್ ಕೀಪರ್ ಅಮ್ರಿಂದರ್ ಸಿಂಗ್ ನಿಖರವಾಗಿ ತಡೆದಿದ್ದರು, ಆದರೆ ಚೆಂಡು ಮೇಲಕ್ಕೆ ಚಿಮ್ಮಿ ನೆಟ್ ಗೆ ಸೇರಿತು.
ಮುಂಬೈಗೆ ಜಯದ ಅಗತ್ಯ
ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನವನ್ನೇ ತನ್ನ ವಿಳಾಸವಾಗಿರಿಸಿಕೊಂಡಿರುವ ಒಡಿಶಾ ಎಫ್ ಸಿ ವಿರುದ್ಧ ಮುಂಬೈ ಸಿಟಿ ಎಫ್ ಸಿ ಗೆಲ್ಲುವ ಆತ್ಮವಿಶ್ವಾಸದೊಂದಿಗೆ ಅಂಗಣಕ್ಕಿಳಿಯಿತು. ಜಯದೊಂದಿಗೆ ಲೀಗ್ ಹಂತವನ್ನು ಪೂರ್ಣಗೊಳಿಸಬೇಕೆಂಬುದು ಒಡಿಶಾದ ಗುರಿಯಾದರೆ, ಜಯ ಗಳಿಸಿ ಲೀಗ್ ಚಾಂಪಿಯನ್ ಪಟ್ಟಕ್ಕಾಗಿ ಅಗ್ರ ಸ್ಥಾನಕ್ಕೇರುವ ಗುರಿ ಮುಂಬೈ ತಂಡಕ್ಕೆ. ಒಡಿಶಾದ ಡಿಫೆನ್ಸ್ ವಿಭಾಗ ನಿರೀಕ್ಷಿತ ಮಟ್ಟದಲ್ಲಿ ಕಾರ್ಯನಿರ್ವಹಿಸದ ಕಾರಣ ಒಡಿಶಾ ಸೋಲಿನ ಮೇಲೆ ಸೋಲನುಭವಿಸಿತು. ಈಗ ತಂಡ ಕೇವಲ ಗೌರವಕ್ಕಾಗಿ ಆಡುವಂತಾಗಿದೆ. ಹಿಂದಿನ ಪಂದ್ಯದಲ್ಲಿ ಇತ್ತಂಡಗಳು ಮುಖಾಮುಖಿಯಾದಾಗ ಒಡಿಶಾ ಸೋಲನುಭವಿಸಿತ್ತು. ಆ ಸೋಲಿನ ಸೇಡನ್ನು ತೀರಿಸಕೊಂಡು ಮುಂಬೈ ಮುನ್ನಡೆಗೆ ಅಡ್ಡಿ ಮಾಡಲು ಒಡಿಶಾಕ್ಕೆ ಇದು ಉತ್ತಮ ಅವಕಾಶ. ಸರ್ಗಿಯೋ ಲೊಬೆರಾ ಪಡೆ ಇತ್ತೀಚಿನ ಆರು ಪಂದ್ಯಗಳಲ್ಲಿ ಗೆದ್ದಿರುವುದು ಒಂದು ಪಂದ್ಯದಲ್ಲಿ ಮಾತ್ರ. ಅರಂಭದಿಂದಲೂ ಅಗ್ರ ಸ್ಥಾನ ಕಾಯ್ದುಕೊಂಡಿದ್ದ ಮುಂಬೈ ಈಗ ಇದ್ದಕ್ಕಿದ್ದಂತೆ ಕುಸಿಯತೊಡಗಿತು.