ಹೋಲಿಕೆ ಸರಿಯೇ!
ಓಟ ಓಟವೇ. ಆದರೆ ಕಂಬಳದ ಓಟಕ್ಕೂ ಟ್ರ್ಯಾಕ್ ಓಟಕ್ಕೂ ಸಾಕಷ್ಟು ವ್ಯತ್ಯಾಸವಿದೆ. ಎರಡನ್ನೂ ಹೋಲಿಕೆ ಮಾಡಿ ಪ್ರಚಾರ ಮಾಡಿದ ರೀತಿಯೇ ತಪ್ಪು. ಸಾಮಾಜಿಕ ಜಾಲತಾಣಗಳಲ್ಲಿ ಆರಂಭವಾದ ಈ ಹೋಲಿಕೆ ಬಳಿಕ ಅಂತಾರಾಷ್ಟ್ರೀಯ ಮಟ್ಟದ ಮಾಧ್ಯಮಗಳೂ ಪ್ರಚಾರ ಮಾಡುವ ಮಟ್ಟಕ್ಕೆ ತಲುಪಿತು.
ಯಾಕೆ ಹೋಲಿಕೆ ಮಾಡಬಾರದು
ಕಂಬಳದ ಓಟದ ರೀತಿಯೇ ಬೇರೆ. ಟ್ರ್ಯಾಕ್ ರೇಸ್ನ ರೀತಿಯೇ ಬೇರೆ. ಹಾಗೆ ನೋಡಿದರೆ ಟ್ರ್ಯಾಕ್ರೇಸ್ಗಿಂತ ಕಂಬಳದ ಓಟ ಕಠಿಣ. ಇಲ್ಲಿ ಬರಿಗಾಲಲ್ಲಿ ಓಡಬೇಕು. ಅದರಲ್ಲೂ ಪಾದ ಮಟ್ಟದವರೆಗಿನ ಕೆಸರು ನೀರಿನಲ್ಲಿ ಕಂಬಳದ ಓಟಗಾರರು ಓಡಬೇಕು. ಆದರೆ ಟ್ರ್ಯಾಕ್ ರೇಸರ್ಗಳಿಗೆ ಹಾಗಿಲ್ಲ. ಆಧುನಿಕ ಟ್ರ್ಯಾಕ್ನಲ್ಲಿ ಶೂಗಳನ್ನು ಧರಿಸಿಕೊಂಡು ಓಡಲಾಗುತ್ತದೆ.
ಕಂಬಳದ ಓಟಗಾರನಿಗೆ ಕೋಣಗಳೇ ಶಕ್ತಿ
ಉಸೇನ್ ಬೋಲ್ಟ್ ದಾಖಲೆಯನ್ನು ಮುರಿಯಲು ಶ್ರೀನಿವಾಸ ಗೌಡರಿಗೆ ಮತ್ತು ನಿಶಾಂತ್ ಶೆಟ್ಟಿಗೆ ಸಾಧ್ಯವಾಗಲು ಕಾರಣವಾಗಿದ್ದೇ ಕೋಣಗಳು. ಕೋಣಗಳು ಓಟದಲ್ಲಿ ಉಸೇನ್ ಬೋಲ್ಟ್ ಅವರ ದಾಖಲೆಯನ್ನು ಮೀರಬಲ್ಲ ಸಾಮರ್ಥ್ಯವನ್ನು ಹೊಂದಿದೆ. ಕಂಬಳದ ಓಟಗಾರರು ಈ ಕೋಣಗಳ ವೇಗದಿಂದಲೇ ತಮ್ಮ ವೇಗವನ್ನು ಹೆಚ್ಚಿಸಿಕೊಳ್ಳುತ್ತಾರೆ. ಕೋಣಗಳನ್ನು ನಿಯಂತ್ರಣ ಮಾಡುವ ಹಗ್ಗದ ಸಹಾಯದಿಂದ ಈ ದಾಖಲೆಯ ನಿರ್ಮಾಣ ಸಾಧ್ಯವಾಗಿದೆ ಎಂಬುದು ಒಪ್ಪಿಕೊಳ್ಳಲೇ ಬೇಕಾದ ಸತ್ಯ.
ಪ್ರತಿ ವರ್ಷವೂ ಕರಾವಳಿಯಲ್ಲಿ ಈ ಸುದ್ಧಿ
ಕರಾವಳಿಯಲ್ಲಿ ಕಂಬಳದ ಸೀಸನ್ ಆರಂಭವಾದಗಲೂ ಬೋಲ್ಟ್ ದಾಖಲೆ ಸುದ್ದಿಮಾಡುತ್ತಲೇ ಇರುತ್ತದೆ. ಆದರೆ ಈ ಮಾತ್ರ ಈ ಸುದ್ದಿ ರಾಷ್ಟ್ರ, ಅಂತಾರಾಷ್ಟ್ರೀಯ ಮಟ್ಟಕ್ಕೆ ತಲುಪಿತ್ತು. ಹೀಗಾಗಿ ಕೇಂದ್ರ ಕ್ರೀಡಾ ಸಚಿವರೇ ಶ್ರೀನಿವಾಸ ಗೌಡರಿಗೆ ಅಭಿನಂದಿಸಿ ತರಭೇತಿಯ ಭರವಸೆ ನೀಡಿದರು.
ಓಟಗಾರರಿಗೆ ಪ್ರೋತ್ಸಾಹ ಅಗತ್ಯ
ಕಂಬಳ ಕರಾವಳಿಯಲ್ಲಿ ಮನರಂಜನಾ ಕ್ರೀಡೆಯಾಗಿ ಮಾತ್ರವೇ ಉಳಿದಿಲ್ಲ. ಅದೊಂದು ಪ್ರತಿಷ್ಟೆಯೇ ಆಗಿದೆ. ಇಂತಾ ಕ್ರೀಡೆಯಲ್ಲಿ ಸಾಕಷ್ಟು ಪ್ರತಿಭಾನ್ವಿತ ಓಟಗಾರರು ಕಣಕ್ಕಿಳಿಯುತ್ತಾರೆ. ತಮ್ಮ ಜೋಡಿ ಕೋಣಗಳನ್ನು ಆದಷ್ಟು ಕಡಿಮೆ ಸಮಯದಲ್ಲಿ ಗುರಿ ತಲುಪಿಸುವುದು ಇವರ ಗುರಿ. ಅನೇಕ ಪ್ರತಿಭಾನ್ವಿತ ಓಟಗಾರರಿಗೆ ಇದು ಜನ್ಮ ನೀಡಿದರೂ ಕಂಬಳದ ಅಂಗಳದಲ್ಲಷ್ಟೇ ಇವರಿಗೆ ಮನ್ನಣೆ. ಇಂತಾ ಓಟಗಾರರಿಗೆ ಮತ್ತಷ್ಟು ಉತ್ತೇಜನ ಸಿಗಬೇಕಾದ ಅನಿವಾರ್ಯತೆಯಿದೆ. ಆಗ ಖಂಡಿತಾ ಓಟದ ದಾಖಲೆಯಲ್ಲಿ ಬೋಲ್ಟ್ ದಾಖಲೆಯನ್ನು ಮೀರಲು ಅವಕಾಶ ಇದ್ದೆ ಇದೆ.