ಮೇವೆದರ್ ಗೆ 40, ಗ್ರೆಗರ್ 29!
ಸದ್ಯ ಮೇವೆದರ್ ಗೆ 40 ವರ್ಷ. ನಿವೃತ್ತಿಯ ಅಂಚಿನಲ್ಲಿರುವ ಈ ಬಾಕ್ಸಿಂಗ್ ಸ್ಟಾರ್ ಗೆ 29ರ ಹರೆಯದ ಮೆಕ್ ಗ್ರೆಗರ್ ಪ್ರಬಲ ಸ್ಪರ್ಧೆ ಒಡ್ಡಿದರು. ಆರಂಭದ ಸುತ್ತುಗಳಲ್ಲಿ ಮೇವೆದರ್ ಸೋತರೂ ನಂತರ ನಿಧಾನಕ್ಕೆ ಪಂದ್ಯದ ಮೇಲೆ ಹಿಡಿತ ಸಾಧಿಸಿ ಜಯ ಸಾಧಿಸಿದರು.
ಸತತ 50 ಗೆಲುವು
ಈ ಮೂಲಕ ಒಂದೇ ಒಂದು ಡ್ರಾ ಹಾಗೂ ಸೋಲಿಲ್ಲದೆ ಸತತ 50 ಗೆಲುವು ಸಾಧಿಸಿದರು ಮೇವೆದರ್. ಜಯದೊಂದಿಗೆ ಸತತ 49 ಗೆಲುವು ಸಾಧಿಸಿದ್ದ ರಾಕಿ ಮಾರ್ಕಿನೊ ದಾಖಲೆ ಮುರಿದಿದ್ದಾರೆ ಮೇವೆದರ್.
ಇದೇ ಕೊನೆಯ ಪಂದ್ಯ
ಗೆಲುವಿನ ನಂತರ ಮಾತನಾಡಿದ ಮೇವೆದರ್, "ನಿಜವಾಗಿಯೂ ಇದು ನನ್ನ ಕೊನೆಯ ಸ್ಪರ್ಧೆ. 50-0 ಕೇಳಿಸಲು ಹಿತವಾಗಿದೆ. ನಾನು 'ಹಾಲ್ ಆಫ್ ಫೇಮ್' ಪ್ರವೇಶಿಸುವುದನ್ನು ಎದುರು ನೋಡುತ್ತಿದ್ದೇನೆ," ಎಂದು ಹೇಳಿದ ಅವರು, "ನನಗೆ ಈ ಸಾಧನೆ ಮಾಡಲು ಅತ್ಯುತ್ತಮ ಸ್ಪರ್ಧಿ ಸಿಕ್ಕಿದರು," ಎಂದು ಮೆಕ್ ಗ್ರಗೊರ್ ರನ್ನು ಹೊಗಳಿದರು.
ದುಬಾರಿ ಬೆಲ್ಟ್ ಗೆದ್ದ ಮೇವೆದರ್
ಇಂದಿನ ಸ್ಪರ್ಧೆಗೆ ಕಳೆ ನೀಡಿದ್ದು ಫ್ಲಾಯ್ಡ್ ಮೇವೆದರ್ ಗೆದ್ದ ದುಬಾರಿ ಬೆಲ್ಟ್. ಸಾಮಾನ್ಯವಾಗಿ ಸ್ಪರ್ಧೆ ಗೆದ್ದವರಿಗೆ ಹಸಿರು ಬಣ್ಣದ ಬೆಲ್ಟ್ ನೀಡಲಾಗುತ್ತದೆ. ಆದರೆ ಈ ಬಾರಿ ವರ್ಲ್ಡ್ ಬಾಕ್ಸಿಂಗ್ ಕೌನ್ಸಿಲ್ ವಿಶೇಷ ಬೆಲ್ಟ್ ತಯಾರಿಸಿತ್ತು.
ಮೂಲಗಳ ಪ್ರಕಾರ ಈ ಬೆಲ್ಟ್ ಬರೋಬ್ಬರಿ 1.5 ಕೆಜಿ 24 ಕ್ಯಾರೆಟ್ ಚಿನ್ನವನ್ನು ಒಳಗೊಂಡಿದೆ. ಜತೆಗೆ 3,360 ವಜ್ರಗಳು, 600 ನೀಲಮಣಿಗಳು, 160 ಪಚ್ಚೆಕಲ್ಲುಗಳು ಈ ಬೆಲ್ಟ್ ನಲ್ಲಿವೆ.
ಈ ಗೆಲುವಿನೊಂದಿಗೆ ಮೇವೆದರ್ ಅಂದಾಜು 1900 ಕೋಟಿ ರೂಪಾಯಿಗೂ ಹೆಚ್ಚಿನ ಮೊತ್ತವನ್ನು ಜೇಬಿಗಿಳಿಸಿಕೊಳ್ಳಲಿದ್ದಾರೆ.