Click it and Unblock the Notifications
ಗಗನಸಖಿಯಾಗುವ ಕನಸು, ಕ್ರೀಡಾಕ್ಷೇತ್ರದಲ್ಲಿ ಸಾಧನೆ
1967 ಅಕ್ಟೋಬರ್ 21ರಂದು ಜನಿಸಿದ ಅಶ್ವಿನಿ ನಾಚಪ್ಪ ಅವರಿಗೆ ಗಗನಸಖಿಯಾಗಬೇಕು ಎಂಬುದು ಕನಸಾಗಿತ್ತು. ಆದರೆ ಕ್ರೀಡಾಲೋಕ ಅವರನ್ನು ಕೈಬೀಸಿ ಕರೆದಿತ್ತು. ತಮ್ಮ ಮನೆಯ ಹತ್ತಿರದಲ್ಲಿಯೇ ಕ್ರೀಡಾಂಗಣ ಕುಡ ಇದ್ದದ್ದು ಇದಕ್ಕೆ ಪ್ರಮುಖ ಕಾರಣವಾಯಿತು. ಈ ಮೂಲಕ ತಮ್ಮ ಆರಂಭದ ಕನಸನ್ನು ತೊರೆದು ಅಥ್ಲಿಟಿಕ್ಸ್‌ನತ್ತ ಗಮನಹರಿಸಿದರು. ನಳಿಕ ಒಂದಾದ ನಂತರ ಮತ್ತೊಂದರಂತೆ ಸಾಧನೆ ಮಾಡುತ್ತಾ ಮುನ್ನುಗ್ಗಿ ಕ್ರೀಡಾಕ್ಷೇತ್ರದಲ್ಲಿ ಮನೆ ಮಾತಾದರು.
ಪಿಟಿ ಉಷಾ ಅವರನ್ನೇ ಮಣಿಸಿದ್ದರು ಅಶ್ವಿನಿ ನಾಚಪ್ಪ
ಭಾರತ ಕಂಡ ಶ್ರೇಷ್ಠ ಮಹಿಳಾ ಅಥ್ಲೀಟ್‌ಗಳಲ್ಲಿ ಪಿಟಿ ಉಷಾ ಪ್ರಮುಖರು. ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅತ್ಯುನ್ನತ ಸಾಧನೆ ಮಾಡಿರುವ ಪಿಟಿ ಉಷಾ ಅವರನ್ನು ಎರಡು ಬಾರಿ ಸೋಲಿಸಿ ಸುದ್ದಿಯಾಗಿದ್ದರು ಅಶ್ವಿನಿ ನಾಚಪ್ಪ. 1980ರ ದಶಕದ ಆರಂಭದಲ್ಲಿ ನವದೆಹಲಿಯಲ್ಲಿ ನಡೆದ ರಾಷ್ಟ್ರೀಯ ಮುಕ್ತ ಅಥ್ಲೆಟಿಕ್ಸ್‌ನ 400 ಮೀಟರ್ ಓಟದ ಸ್ಪರ್ಧೆಯಲ್ಲಿ ಪಿಟಿ ಉಷಾ ಅವರನ್ನು ಹಿಂದಿಕ್ಕಿ ಅಶ್ವಿನಿ ನಾಚಪ್ಪ ಚಿನ್ನದ ಪದಕ ಗೆದ್ದುಕೊಂಡಿದ್ದರು. ನಂತರ 1988ರಲ್ಲಿ ಸಿಯೋನಲ್ಲಿ ನಡೆದ ಒಲಿಂಪಿಕ್ಸ್‌ನಲ್ಲಿ ಭಾರತದ ಮಹಿಳೆಯರ ರಿಲೆ ತಂಡದ ಸದಸ್ಯೆಯಾಗಿ ಭಾಗಿಯಾಗಿದ್ದರು. ಇನ್ನು 1992ರಲ್ಲಿ ಕೊಲ್ಕತ್ತಾದಲ್ಲಿ ನಡೆದ ರಾಷ್ಟ್ರೀಯ ಅಥ್ಲೆಟಿಕ್ಸ್ ಕೂಟದಲ್ಲಿಯೂ ನಾಲ್ಕು ಚಿನ್ನದ ಪದಕವನ್ನು ಗೆದ್ದಿದ್ದರು ಅಶ್ವಿನಿ ನಾಚಪ್ಪ.
ಚಿತ್ರರಂಗದಲ್ಲಿ ಅದೃಷ್ಟ ಪರೀಕ್ಷೆಗಿಳಿದ ಸಾಹಸಿ
ಇನ್ನು ಗಾಯದ ಕಾರಣದಿಂದಾಗಿ ಅಥ್ಲೆಟಿಕ್ಸ್‌ಗೆ ವಿದಾಯ ಹೇಳಿದ ಅಶ್ವಿನಿ ನಾಚಪ್ಪ ಬಳಿಕ ಸಿನಿಮಾ ಕ್ಷೇತ್ರದತ್ತ ಚಿತ್ತ ಹರಿಸಿದರು. ದಕ್ಷಿಣ ಭಾರತದ ಕೆಲ ಸಿನಿಮಾಗಳಲ್ಲಿ ನಟಿಯಾಗಿಯೂ ಮಿಂಚಿದ್ದಾರೆ. ಇದರಲ್ಲಿ ತಮ್ಮದೇ ಜೀವನಾಧಾರಿತ 'ಅಶ್ವಿನಿ' ಚಲನಚಿತ್ರವೂ ಸೇರಿದೆ. ಈ ಚಿತ್ರದ ನಟನೆಗಾಗಿ ಅಶ್ವಿನಿ ನಾಚಪ್ಪ ಆಂದ್ರಪ್ರದೇಶ ಸರ್ಕಾರ ನೀಡುವ ನಂದಿ ಪ್ರಶಸ್ತಿಗೂ ಪಾತ್ರವಾಗಿದ್ದಾರೆ. ಬಳಿಕ ಸಿನಿಮಾ ಕ್ಷೇತ್ರದಿಂದಲೂ ಅವರು ದೂರವಾಗಿ ಸಾಮಾಜಿಕ ಹಾಗೂ ಶೈಕ್ಷಣಿಕ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸುವ ನಿರ್ಧಾರವನ್ನು ಮಾಡಿದರು.
ಅರ್ಜುನ ಪ್ರಶಸ್ತಿ ವಿಜೇತೆ ಅಶ್ವಿನಿ ನಾಚಪ್ಪ
ಕನ್ನಡದ ಹೆಮ್ಮೆಯ ಅಥ್ಲೀಟ್ ಅಶ್ವಿನಿ ನಾಚಪ್ಪ ಅಥ್ಲೆಟಿಕ್ಸ್ ಕ್ಷೇತ್ರದಲ್ಲಿ ಸಲ್ಲಿಸಿದ ಸೇವೆಗಾಗಿ ಭಾರತ ಸರ್ಕಾರ ನೀಡುವ ಅರ್ಜುನ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಕರುಂಬಯ್ಯ ಎಂಬ ಕ್ರೀಡಾ ಅಕಾಡೆಮಿಯನ್ನು ಸ್ಥಾಪಿಸಿದ ಅಶ್ವಿನಿ ನಾಚಪ್ಪ ಅವರು ಸಾಕಷ್ಟು ಕ್ರೀಡಾ ಪ್ರತಿಭೆಗಳಿಗೆ ವೇದಿಕೆಯನ್ನೂ ಒದಗಿಸಿದ್ದಾರೆ. ಇನ್ನು ಶೈಕ್ಷಣಿಕ ಕ್ಷೇತ್ರದಲ್ಲಿಯೂ ಬಡ ವಿದ್ಯಾರ್ಥಿಗಳನ್ನು ದೃಷ್ಟಿಯಲ್ಲಿಟ್ಟುಕೊಂಡು ವಿದ್ಯಾಸಂಸ್ಥೆಯನ್ನು ಸ್ಥಾಪಿಸಿದ್ದಾರೆ. ಇನ್ನು ಅಶ್ವಿನಿ ನಾಚಪ್ಪ ಅವರಿಗೆ ಇಬ್ಬರು ಪುತ್ರಿಯರಿದ್ದು ಇಬ್ಬರು ಕೂಡ ಬ್ಯಾಡ್ಮಿಂಟನ್ ಆಟಗಾರ್ತಿಯರು.
