ಡೆನ್ಮಾರ್ಕ್ ಓಪನ್ ಬ್ಯಾಡ್ಮಿಂಟನ್: 2ನೇ ಸುತ್ತಿಗೆ ಪ್ರವೇಶಿಸಿದ ಕಿಡಂಬಿ ಶ್ರೀಕಾಂತ್

ಮಂಗಳವಾರ ಒಡೆನ್ಸ್‌ನಲ್ಲಿ ನಡೆದ ಡೆನ್ಮಾರ್ಕ್ ಓಪನ್ ಸೂಪರ್ 750 ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಮಾಜಿ ಚಾಂಪಿಯನ್ ಕಿಡಂಬಿ ಶ್ರೀಕಾಂತ್ ಹಾಂಕಾಂಗ್‌ನ ಎನ್‌ಜಿ ಕಾ ಲಾಂಗ್ ಆಂಗಸ್ ಅವರನ್ನು ಎದುರಿಸಿದ್ದಾರೆ. ಈ ಪೈಪೋಟಿಯ ಪಂದ್ಯದಲ್ಲಿ ಗೆಲುವು ಸಾಧಿಸಿದ ಕಿಡಂಬಿ ಶ್ರೀಕಾಂತ್ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದಾರೆ.

ಐದು ವರ್ಷಗಳ ಹಿಂದೆ ಅವರು ಚಾಂಪಿಯನ್ ಪಟ್ಟಕ್ಕೇರಿದ್ದ ತಾಣದಲ್ಲಿಯೇ ಕಣಕ್ಕಿಳಿದ 2021 ರ ವಿಶ್ವ ಚಾಂಪಿಯನ್‌ಶಿಪ್ ಬೆಳ್ಳಿ ಪದಕ ಶ್ರೀಕಾಂತ್ ಹಾಗೂ ಹಾಂಕಾಂಗ್‌ನ ಎನ್‌ಜಿ ಕಾ ಲಾಂಗ್ ಆಂಗಸ್ ವರುದ್ಧದ ಹೋರಾಟ 56 ನಿಮಿಷಗಳ ಕಾಲ ಸಾಗಿತು. ಈ ಪೈಪೋಟಿಯ ಪಂದ್ಯದಲ್ಲಿ ಶ್ರೀಕಾಂತ್ 17-21 21-14 21-12 ಅಂತರದಿಂದ ಗೆಲುವು ಸಾಧಿಸಿದ್ದಾರೆ.

ಮತ್ತೊಂದೆಡೆ ಕಾಮನ್ವೆಲ್ತ್ ಗೇಮ್ಸ್ ಕಂಚಿನ ಪದಕ ವಿಜೇತರಾದ ಟ್ರೀಸಾ ಜಾಲಿ ಮತ್ತು ಗಾಯತ್ರಿ ಗೋಪಿಚಂದ್ ಅವರು ತಮ್ಮ ಮಹಿಳೆಯರ ಡಬಲ್ಸ್ ಆರಂಭಿಕ ಪಂದ್ಯದಲ್ಲಿ ಡೆನ್ಮಾರ್ಕ್‌ನ ಅಲೆಕ್ಸಾಂಡ್ರಾ ಬೋಜೆ ಮತ್ತು ಅಮಾಲಿ ಮೆಗೆಲುಂಡ್ ಅವರನ್ನು 21-15 21-15 ರಿಂದ ಸೋಲಿಸಿ ಮುಂದಿನ ಸುತ್ತಿಗೆ ಪ್ರವೇಶಿಸಿದರು. ಭಾರತದ ಈ ಜೋಡಿ ಎರಡನೇ ಸುತ್ತಿನಲ್ಲಿ ಆರನೇ ಶ್ರೇಯಾಂಕದ ಜೊಂಗ್‌ಕೋಲ್ಫಾನ್ ಕಿತ್ತಿತಾರಾಕುಲ್ ಮತ್ತು ಥಾಯ್ಲೆಂಡ್‌ನ ರವಿಂದ ಪ್ರಜೊಂಗ್‌ಜೈ ಅವರನ್ನು ಎದುರಿಸಲಿದೆ.

3-3 ಹೆಡ್-ಟು-ಹೆಡ್ ದಾಖಲೆಯೊಂದಿಗೆ ಈ ಪಂದ್ಯಕ್ಕೆ ಇಳಿದ ಶ್ರೀಕಾಂತ್‌ಗೆ ಆಂಗಸ್ ಆರಂಭದಲಲ್ಇಯೇ ಭಾರೀ ಪೈಪೋಟಿ ನೀಡಿದರು. ಆದರೆ ಹಾಂಗ್ ಕಾಂಗ್ ಆಟಗಾರನ ವಿರುದ್ಧ ಮಧ್ಯಂತರದಲ್ಲಿ 11-8 ಮುನ್ನಡೆ ಸಾಧಿಸಿದ್ದರಿಂದ ಈ ಮೇಲುಗೈಯನ್ನು ಮುಂದುವರಿಸಿಕೊಂಡು ಸಾಗುವಲ್ಲಿ ಯಶಸ್ವಿಯಾದರು.