ಬೆಂಗಳೂರು, ಸೆ. 21: ಬಾಡ್ಮಿಂಟನ್ ತಾರೆ ಪಿವಿ ಸಿಂಧು ಅವರು ಜಪಾನ್ ಸೂಪರ್ ಸೀರಿಸ್ ನಲ್ಲಿ ಸೋಲು ಅನುಭವಿಸಿದ್ದಾರೆ. ಗುರುವಾರ(ಸೆ. 21)ದಂದು ಪ್ರೀ ಕ್ವಾರ್ಟರ್ ಫೈನಲ್ ನಲ್ಲಿ ಸೋಲು ಅನುಭವಿಸಿ ನಿರ್ಗಮಿಸಿದ್ದಾರೆ.
ಜಪಾನಿನ ನಜೋ ಒಕುಹರಾ ಅವರು ಪಿವಿ ಸಿಂಧು ವಿರುದ್ಧ 21-18, 21-18 ನೇರ ಸೆಟ್ ಗಳಲ್ಲಿ ಗೆಲುವು ಸಾಧಿಸಿದ್ದಾರೆ.
ಗ್ಲಾಸ್ಗೋದಲ್ಲಿ ವಿಶ್ವ ಬಾಡ್ಮಿಂಟನ್ ಟೂರ್ನಮೆಂಟ್ ನಲ್ಲಿ ಸಿಂಧು ವಿರುದ್ಧ ಒಕುಹರಾ ಗೆಲುವು ಸಾಧಿಸಿದ್ದರು. ಈ ಸೇಡನ್ನು ಇತ್ತೀಚೆಗೆ ತೀರಿಸಿಕೊಂಡಿದ್ದ ಸಿಂಧು, ಕೊರಿಯಾ ಸೂಪರ್ ಸೀರಿಸ್ ನಲ್ಲಿ ಗೆಲುವು ಸಾಧಿಸಿದ್ದರು. ಒಟ್ಟಾರೆ, ಒಕುಹರಾ ಅವರು 5-4 ರಲ್ಲಿ ಸಿಂಧುವಿಗಿಂತ ಮುಂದಿದ್ದಾರೆ.
ಇನ್ನೊಂದೆಡೆ ಭಾರತದ ಕಿಡಾಂಬಿ ಶ್ರೀಕಾಂತ್ ಅವರು ಜಪಾನ್ ಸೂಪರ್ ಸೀರಿಸ್ ಕ್ವಾರ್ಟರ್ ಫೈನಲ್ ತಲುಪಿದ್ದಾರೆ. ಹಾಂಕಾಂಗಿನ ಹು ಯೂನ್ ವಿರುದ್ಧ 21-12, 21-11 ರಲ್ಲಿ ಶ್ರೀಕಾಂತ್ ಗೆಲುವು ದಾಖಲಿಸಿದರು.
ಎಚ್ ಎಸ್ ಪ್ರಣಯ್ ಅವರು ಹ್ಸು ಜೆನ್ ವಿರುದ್ಧ 21-16,23-21ರಲ್ಲಿ ಗೆದ್ದು ಕ್ವಾರ್ಟರ್ ಫೈನಲ್ ತಲುಪಿದ್ದರೆ, ಸಮೀರ್ ವರ್ಮಾ ಅವರು 21-10,17-21,15-21 ರಲ್ಲಿ ಜಪಾನಿನ ಯೂಕಿ ವಿರುದ್ಧ ಸೋಲು ಕಂಡಿದ್ದಾರೆ.