ಈ ಬಾರಿ ಯುಎಇಯಲ್ಲಿ ಏಷ್ಯಾಕಪ್: ಯುಎಇಯಲ್ಲಿ ಏಷ್ಯಾಕಪ್ ನಡೆದಾಗಲೆಲ್ಲಾ ಈ ದೇಶವೇ ಚಾಂಪಿಯನ್‍!

1984

ಏಷ್ಯಾಕಪ್ ಕೌನ್ಸಿಲ್ 1983ರಲ್ಲಿ ಆರಂಭವಾಗಿತ್ತು. ಈ ಏಷ್ಯಾಕಪ್ ಕೌನ್ಸಿಲ್‌ಗೆ ಸಂಬಂಧಪಟ್ಟ ಕಛೇರಿಗಳು ಆಗಿನ ಸಮಯದಲ್ಲಿ ಯುಎಇಯಲ್ಲಿ ಇದ್ದ ಕಾರಣ 1984ರ ಏಷ್ಯಾಕಪ್ ಟೂರ್ನಿಯನ್ನು ಯುಎಇ ನೆಲದಲ್ಲಿಯೇ ಆಯೋಜನೆ ಮಾಡಲಾಗಿತ್ತು. ಈ ಚೊಚ್ಚಲ ಏಷ್ಯಾಕಪ್ ಟೂರ್ನಿಯಲ್ಲಿ ಭಾರತ, ಶ್ರೀಲಂಕಾ ಮತ್ತು ಪಾಕಿಸ್ತಾನ ತಂಡಗಳು ಭಾಗವಹಿಸಿದ್ದವು. ಟೂರ್ನಿಯಲ್ಲಿನ ಎಲ್ಲಾ ಪಂದ್ಯಗಳನ್ನು ಗೆದ್ದಿದ್ದ ಭಾರತ ಚೊಚ್ಚಲ ಏಷ್ಯಾಕಪ್ ಟೂರ್ನಿಯಲ್ಲಿ ಚಾಂಪಿಯನ್ ಆಗಿ ಹೊರಹೊಮ್ಮಿತ್ತು. ಈ ಟೂರ್ನಿಯಲ್ಲಿ ಭಾರತ ತಂಡವನ್ನು ಸುನಿಲ್ ಗವಾಸ್ಕರ್ ನಾಯಕನಾಗಿ ಮುನ್ನಡೆಸಿದ್ದರು.

1995

1995ರಲ್ಲಿ ಏಷ್ಯಾಕಪ್‌ನ ಐದನೇ ಆವೃತ್ತಿ ನಡೆದಿತ್ತು. ಇದು ಯುಎಇಯಲ್ಲಿ ಆಯೋಜನೆಯಾಗಿದ್ದ ಎರಡನೇ ಏಷ್ಯಾಕಪ್ ಟೂರ್ನಿಯಾಗಿತ್ತು. ಈ ಟೂರ್ನಿಯಲ್ಲಿ ಭಾರತ, ಶ್ರೀಲಂಕಾ ಮತ್ತು ಪಾಕಿಸ್ತಾನ ತಂಡಗಳ ಜತೆ ಬಾಂಗ್ಲಾದೇಶ ಕೂಡ ಕಣಕ್ಕಿಳಿದಿತ್ತು ಹಾಗೂ ಫೈನಲ್ ಪಂದ್ಯದಲ್ಲಿ ಭಾರತ ಮತ್ತು ಶ್ರೀಲಂಕಾ ತಂಡಗಳು ಮುಖಾಮುಖಿಯಾಗಿದ್ದವು. ಫೈನಲ್ ಪಂದ್ಯದಲ್ಲಿ ಭಾರತದ ನಾಯಕ ಮೊಹಮ್ಮದ್ ಅಜರುದ್ದೀನ್ ಅಜೇಯ 90 ರನ್ ಬಾರಿಸಿದ ಪರಿಣಾಮ ಟೀಮ್ ಇಂಡಿಯಾ 1995ರ ಏಷ್ಯಾಕಪ್ ಚಾಂಪಿಯನ್ ಆಗಿ ಹೊರಹೊಮ್ಮಿತ್ತು.

2018

2018ರ ಏಷ್ಯಾಕಪ್ ಟೂರ್ನಿ ಭಾರತದಲ್ಲಿ ನಡೆಯಬೇಕಿತ್ತು. ಆದರೆ ಭಾರತ ಮತ್ತು ಪಾಕಿಸ್ತಾನ ತಂಡಗಳ ನಡುವಿನ ಪಂದ್ಯಕ್ಕೆ ಅನುಮತಿ ಇಲ್ಲದೇ ಇದ್ದ ಕಾರಣ ಟೂರ್ನಿಯನ್ನು ಯುಎಇಗೆ ಸ್ಥಳಾಂತರಿಸಲಾಗಿತ್ತು. ಈ ಟೂರ್ನಿಯಲ್ಲಿ ಭಾರತ, ಶ್ರೀಲಂಕಾ, ಪಾಕಿಸ್ತಾನ, ಬಾಂಗ್ಲಾದೇಶ, ಅಫ್ಘಾನಿಸ್ತಾನ ಮತ್ತು ಹಾಂಗ್ ಕಾಂಗ್ ದೇಶಗಳು ಭಾಗವಹಿಸಿದ್ದವು. ಟೂರ್ನಿಯಲ್ಲಿನ ಗ್ರೂಪ್ ಹಂತ ಮತ್ತು ಮತ್ತು ಸೆಮಿಫೈನಲ್ ಸೆಣಸಾಟಗಳು ಮುಕ್ತಾಯವಾದ ನಂತರ ಫೈನಲ್ ಪಂದ್ಯಕ್ಕೆ ಬಾಂಗ್ಲಾದೇಶ ಮತ್ತು ಭಾರತ ತಂಡಗಳು ಪ್ರವೇಶಿಸಿದ್ದವು. ಈ ಫೈನಲ್ ಪಂದ್ಯದಲ್ಲಿ ರೋಹಿತ್ ಶರ್ಮಾ ನಾಯಕತ್ವದ ಟೀಂ ಇಂಡಿಯಾ ಬಾಂಗ್ಲಾದೇಶದ ವಿರುದ್ಧ ಗೆದ್ದು ಚಾಂಪಿಯನ್‍ ಆಗಿತ್ತು.

ಯುಎಇ ನೆಲದಲ್ಲಿ ನಡೆದಿದ್ದ 3 ಏಷ್ಯಾಕಪ್ ಟೂರ್ನಿಯಲ್ಲಿಯೂ ಭಾರತಕ್ಕೆ ಜಯ

ಏಷ್ಯಾಕಪ್ ಟೂರ್ನಿ ಇದುವರೆಗೂ ಯುನೈಟೆಡ್ ಅರಬ್ ಎಮಿರೇಟ್ಸ್ ನೆಲದಲ್ಲಿ ಒಟ್ಟು 3 ಬಾರಿ ಆಯೋಜನೆಗೊಂಡಿದೆ. ಹಾಗೂ ಈ 3 ಏಷ್ಯಾಕಪ್ ಟೂರ್ನಿಗಳಲ್ಲಿಯೂ ಟೀಮ್ ಇಂಡಿಯಾ ಚಾಂಪಿಯನ್ ಆಗಿ ಹೊರಹೊಮ್ಮಿ ಮೇಲುಗೈ ಸಾಧಿಸಿದೆ.