IND vs PAK: ಸೂಪರ್‌ 4ನಲ್ಲಿ ಜಡೇಜಾ ಬದಲು ಈತನಿಗೆ ಸ್ಥಾನ ನೀಡಿದ್ರೆ ಭಾರತಕ್ಕೆ ಹಿನ್ನಡೆ ಖಚಿತ!

ಜಡೇಜಾ ಬದಲಿ ಸ್ಥಾನಕ್ಕೆ 3 ಆಯ್ಕೆಗಳು

ಏಷ್ಯಾ ಕಪ್ ಟೂರ್ನಿಯಿಂದ ರವಿಂದ್ರ ಜಡೇಜಾ ಹೊರಬಿದ್ದಿರುವ ಕಾರಣ ಜಡೇಜಾ ಬದಲಿ ಆಟಗಾರನಾಗಿ ಸೇರ್ಪಡೆಗೊಂಡಿರುವ ಅಕ್ಷರ್ ಪಟೇಲ್ ಜತೆಗೆ ರಿಷಭ್ ಪಂತ್ ಹಾಗೂ ದೀಪಕ್ ಹೂಡಾ ಈ ಮೂವರು ಜಡೇಜಾ ಸ್ಥಾನ ತುಂಬಲು ಅರ್ಹ ಆಟಗಾರರಾಗಿದ್ದಾರೆ. ಆದರೆ ಈ ಮೂವರಲ್ಲಿ ಕೇವಲ ಓರ್ವರಿಗೆ ಮಾತ್ರ ಸ್ಥಾನ ನೀಡಬಹುದಾಗಿದ್ದು, ಇದು ನಾಯಕ ರೋಹಿತ್ ಶರ್ಮಾ ಮತ್ತು ಕೋಚ್ ರಾಹುಲ್ ದ್ರಾವಿಡ್ ಅವರಿಗೆ ತಲೆನೋವಾಗಿ ಪರಿಣಮಿಸಿದೆ.

ಜಡೇಜಾ ಬದಲು ಪಂತ್ ಆಯ್ಕೆ ಮಾಡಿದರೆ ಭಾರತಕ್ಕೆ ಹಿನ್ನಡೆ!

ಇನ್ನು ರವೀಂದ್ರ ಜಡೇಜಾ ಬದಲಾಗಿ ರಿಷಬ್ ಪಂತ್ ಅವರನ್ನು ಆಯ್ಕೆ ಮಾಡಿದರೆ ಟೀಮ್ ಇಂಡಿಯಾಗೆ ಅನುಕೂಲಕ್ಕಿಂತ ಅನನುಕೂಲವೇ ಹೆಚ್ಚು ಎನ್ನಬಹುದು. ಏಕೆಂದರೆ ರವೀಂದ್ರ ಜಡೇಜ ಆಲ್ ರೌಂಡರ್ ಆಟಗಾರನಾಗಿದ್ದು, ಆ ಸ್ಥಾನಕ್ಕೆ ಪಂತ್ ಅವರನ್ನು ಆಯ್ಕೆ ಮಾಡಿದರೆ ಕೇವಲ ಬ್ಯಾಟಿಂಗ್ ಜವಾಬ್ದಾರಿಯನ್ನು ಮಾತ್ರ ಪಂತ್ ನಿರ್ವಹಿಸಲಿದ್ದು, ಟೀಮ್ ಇಂಡಿಯಾಗೆ ಓರ್ವ ಬೌಲರ್ ಕೊರತೆ ಉಂಟಾಗಲಿದೆ. ಅದರಲ್ಲಿಯೂ ದುಬೈ ಕ್ರೀಡಾಂಗಣದ ಪಿಚ್ ಸ್ಪಿನ್ ಪಿಚ್ ಆಗಿರುವುದರಿಂದ ರವೀಂದ್ರ ಜಡೇಜಾ ರೀತಿಯ ಸ್ಪಿನ್ನರ್ ಸ್ಥಾನಕ್ಕೆ ಸ್ಪಿನ್ ಆಲ್ ರೌಂಡರ್ ಬೇಕಾಗಿದ್ದು, ಇದನ್ನು ಕಡೆಗಣಿಸಿ ರಿಷಭ್ ಪಂತ್ ಅವರಿಗೆ ಸ್ಥಾನ ನೀಡಿದರೆ ತಂಡಕ್ಕೆ ಹೊಡೆತ ಬೀಳಬಹುದು.

ಅಕ್ಷರ್ ಪಟೇಲ್ ಅತ್ಯುತ್ತಮ ಆಯ್ಕೆ

ಇನ್ನು ರಿಷಭ್ ಪಂತ್ ಅವರನ್ನು ಹೊರತುಪಡಿಸಿ ರವೀಂದ್ರ ಜಡೇಜಾ ಸ್ಥಾನಕ್ಕೆ ಲಭ್ಯವಿರುವ ಇಬ್ಬರು ಆಟಗಾರರೆಂದರೆ ಅದು ದೀಪಕ್ ಹೂಡ ಹಾಗೂ ಅಕ್ಷರ್ ಪಟೇಲ್. ಈ ಇಬ್ಬರೂ ಸಹ ಸ್ಪಿನ್ ಆಲ್ ರೌಂಡರ್ ಆಟಗಾರರಾಗಿದ್ದು, ಜಡೇಜಾ ಬದಲಾಗಿ ಈ ಪಂದ್ಯದಲ್ಲಿ ಕಣಕ್ಕಿಳಿಯಲು ಸರಿಯಾದ ಆಯ್ಕೆ ಎನ್ನಬಹುದು. ದೀಪಕ್ ಹೂಡಾ ಬಲಗೈ ಆಟಗಾರನಾಗಿರುವ ಕಾರಣ ಅಕ್ಷರ್ ಪಟೇಲ್ ರವೀಂದ್ರ ಜಡೇಜಾ ಸ್ಥಾನವನ್ನು ಬಹುತೇಕ ತುಂಬಬಲ್ಲ ಸರಿಯಾದ ಆಯ್ಕೆ ಎನ್ನಬಹುದು.