ಏಷ್ಯಕಪ್ ನಲ್ಲಿ ಭಾರತ ಹ್ಯಾಟ್ರಿಕ್ ಗೆಲುವಿನೊಂದಿಗೆ ಬೀಗಿದ ಮೆಲುಕಿದು..

ಶ್ರೀಲಂಕಾಕ್ಕೆ ಎರಡನೇ ಸ್ಥಾನ

ಏಷ್ಯಕಪ್ ಟೂರ್ನಿ ಹೆಚ್ಚು ಸಾರಿ ಗೆದ್ದ ಹಿರಿಮೆ (ಆರು ಬಾರಿ) ಭಾರತದ್ದಾಗಿದ್ದರೆ, 5 ಸಾರಿ ಗೆದ್ದಿರುವ ಶ್ರೀಲಂಕಾ ದ್ವಿತೀಯ ಸ್ಥಾನದಲ್ಲಿ, ಎರಡು ಸಾರಿಯ ಚಾಂಪಿಯನ್ ಪಾಕಿಸ್ಥಾನ ತೃತೀಯ ಸ್ಥಾನದಲ್ಲಿದೆ. 2012 ಮತ್ತು 2016ರಲ್ಲಿ ಬಾಂಗ್ಲಾದೇಶ ರನ್ನರ್ಸ್ ಪ್ರಶಸ್ತಿ ಗೆದ್ದಿತ್ತು.

ಹ್ಯಾಟ್ರಿಕ್ ಸಾಧನೆ

ಏಷ್ಯಕಪ್ ಟೂರ್ನಿಯನ್ನು ಬೆನ್ನುಬೆನ್ನಿಗೆ ಮೂರುಸಾರಿ ಗೆದ್ದ ಸಾಧನೆ ಭಾರತದ್ದೇ ಹೆಸರಿನಲ್ಲಿದೆ. 1988, 1991 ಮತ್ತು 1995ರ ಆವೃತ್ತಿಗಳನ್ನು ಭಾರತ ಗೆದ್ದು ಬೀಗಿತ್ತು. ವೈಯಕ್ತಿಕ ರನ್ ಪರಿಗಣಿಸಿದರೆ ಜಯಸೂರ್ಯ 1220 ರನ್ ಸಾಧನೆಯೊಂದಿಗೆ ಅಗ್ರ ಸ್ಥಾನದಲ್ಲಿದ್ದಾರೆ. ಏಷ್ಯಕಪ್ ನಲ್ಲಿ 6 ಶತಕದ ಸಾಧನೆ ಜಯಸೂರ್ಯ ಮಾಡಿದ್ದರು.

ಮೂರನೇ ಸ್ಥಾನದಲ್ಲಿ ಕೊಹ್ಲಿ

ವೈಯಕ್ತಿಕ ರನ್ ಸಾಧನೆಯಲ್ಲಿ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ದಾಖಲೆಗಳನ್ನು ಸರಿಗಟ್ಟುತ್ತ ಸಾಗುತ್ತಿರುವ ಕೊಹ್ಲಿ ಮೂರು ಶತಕದ ಸಾಧನೆಯೊಂದಿಗೆ ಶ್ರೀಲಂಕಾದ ಮಾಜಿ ನಾಯಕ ಕುಮಾರ ಸಂಗಕ್ಕರ (ನಾಲ್ಕು ಶತಕ) ಅವರ ನಂತರದಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ. ಕೊಹ್ಲಿ ಈ ಬಾರಿಯ ಏಷ್ಯಕಪ್ ನಲ್ಲಿ ಪಂದ್ಯವಾಡದೆ ವಿಶ್ರಾಂತಿ ಪಡೆಯಲಿದ್ದಾರೆ.

ಮುರಳೀಧರನ್ ಮುಂದು

ಏಷ್ಯಕಪ್ ಕ್ರಿಕೆಟ್ ನಲ್ಲಿ ಅಧಿಕ ವಿಕೆಟ್ ಸಾಧನೆಯಲ್ಲಿ ಶ್ರೀಲಂಕಾದ ಸ್ಪಿನ್ ದಂತಕತೆ ಮುತ್ತಯ್ಯ ಮುರಳೀಧರನ್ ಅಗ್ರ ಸ್ಥಾನದಲ್ಲಿದ್ದಾರೆ. ಮುರಳೀಧರನ್ 30 ವಿಕೆಟ್ ಗಳೊಂದಿಗೆ ಮೊದಲಿಗನಾಗಿ, ಶ್ರೀಲಂಕಾದವರೇ ಆದ ಅಜಂತ ಮೆಂಡಿಸ್ 26 ವಿಕೆಟ್ ನೊಂದಿಗೆ ದ್ವಿತೀಯ ಸ್ಥಾನದಲ್ಲಿದ್ದಾರೆ.