ಕ್ರಿಕೆಟ್‌ ಜಗತ್ತಿನಲ್ಲಿ ಮತ್ತೊಂದು ಸಲಿಂಗಿ ಮದುವೆ!

ದಾಂಪತ್ಯಕ್ಕೆ ಕಾಲಿಟ್ಟ ಆಸೀಸ್‌-ಕಿವೀಸ್‌ ಮಹಿಳಾ ಕ್ರಿಕೆಟರ್ಸ್‌

ಮೆಲ್ಬೋರ್ನ್‌, ಏಪ್ರಿಲ್‌ 19: ನ್ಯೂಜಿಲೆಂಡ್‌ ಮಹಿಳಾ ಕ್ರಿಕೆಟ್‌ ತಂಡದ ಆಟಗಾರ್ತಿ ಹೇಲೇ ಜೆನ್ಸೆನ್‌ ಆಸ್ಟ್ರೇಲಿಯಾದ ಯುವ ಆಟಗಾರ್ತಿ ನಿಕೊಲಾ ಹ್ಯಾಂಡ್‌ಕಾಕ್‌ ಅವರನ್ನು ಮದುವೆಯಾಗಿದ್ದಾರೆ.

ಅಂದಹಾಗೆ ಕ್ರಿಕೆಟ್‌ ಜಗತ್ತಿನಲ್ಲಿ ಮಹಿಳಾ ಆಟಗಾರ್ತಿಯರು ವಿವಾಹವಾಗುತ್ತಿರುವುದು ಇದು ಮೊದಲೇನಲ್ಲ. ಈ ಹಿಂದೆ ನ್ಯೂಜಿಲೆಂಡ್‌ ತಂಡದ ಏಮಿ ಸ್ಯಾಟರ್ತ್‌ವೇಟ್‌ ಮತ್ತು ಲೀ ತಹೂಹು ಮದುವೆಯಾಗಿದ್ದರು. ಬಳಿಕ ದಕ್ಷಿಣ ಆಫ್ರಿಕಾ ತಂಡದ ಆಟಗಾರ್ತಿಯರಾದ ಡ್ಯಾನ್‌ ವ್ಯಾನ್‌ ನೀ ಕೆರ್ಕ್‌ ಮತ್ತು ಮರಿಝೇನ್‌ ಕಾಪ್‌ ದಾಂಪತ್ಯ ಜೀವನಕ್ಕೆ ಕಾಲಿಟ್ಟು ಕ್ರಿಕೆಟ್‌ ಜಗತ್ತಿನಲ್ಲಿ ಮಿಂಚಿನ ಸಂಚಲನವನ್ನುಂಟು ಮಾಡಿದ್ದರು.

ಇದೀಗ ಈ ಪಟ್ಟಿಗೆ 26 ವರ್ಷದ ಬೌಲರ್‌ ಹೇಲೇ ಜೆನ್ಸೆನ್‌ ಮತ್ತು ಇನ್ನು ಆಸ್ಟ್ರೇಲಿಯಾ ತಂಡವನ್ನು ಪ್ರತಿನಿಧಿಸದ 23 ವರ್ಷದ ಆಟಗಾರ್ತಿ ನಿಕೊಲಾ ಸೇರಿಕೊಂಡಿದ್ದಾರೆ. ಮಹಿಳಾ ಬಿಗ್‌ಬ್ಯಾಷ್‌ ಲೀಗ್‌ ಕ್ರಿಕೆಟ್‌ ಟೂರ್ನಿ ವೇಳೆ ಈ ಇಬ್ಬರೂ ಆಟಗಾರ್ತಿಯರು ಮೆಲ್ಬೋರ್ನ್‌ ಸ್ಟಾರ್ಸ್‌ ಪರ ಆಡಿದ್ದರು. ಬಳಿಕ 3ನೇ ಆವೃತ್ತಿಯ ಮಹಿಳಾ ಬಿಗ್‌ಬ್ಯಾಷ್‌ ಲೀಗ್‌ನಲ್ಲಿ ಜೆನ್ಸೆನ್‌ ಮೆಲ್ಬೋರ್ನ್‌ ರೆನೆಗೇಡ್ಸ್‌ ತಂಡ ಸೇರಿಕೊಂಡರು.

"ನನ್ನ ಕನಸಿನ ಕನ್ಯೆಯನ್ನು ಮದುವೆಯಾಗಲೇ ಬೇಕಾಯಿತು. ಈ ದಿನ ಅತ್ಯಂತ ಸಂಭ್ರಮ, ಸಡಗರ ಹಾಗೂ ಖಂಡಿತವಾಗಿಯೂ ಬಹಳ ಪ್ರೀತಿಯಿಂದ ಕೂಡಿತ್ತು,'' ಎಂದು ಹ್ಯಾಂಡ್‌ಕಾಕ್‌ ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್‌ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ.

ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್‌ನಲ್ಲಿ ಈಗಾಗಲೇ ಸಲಿಂಗಿಗಳ ವಿವಾಹಕ್ಕೆ ಕಾನೂನಾತ್ಮಕವಾಗಿ ಗ್ರೀನ್‌ ಸಿಗ್ನಲ್‌ ನೀಡಲಾಗಿದೆ.