BAN vs IND: ಭಾರತೀಯ ಮಹಿಳಾ ಕ್ರಿಕೆಟ್‌ನಲ್ಲಿ ಈ ಸಾಧನೆ ಮಾಡಿದ ಚೊಚ್ಚಲ ಆಟಗಾರ್ತಿ ಆಶಾ ಸೋಭನಾ

ಸೋಮವಾರ, ಮೇ 6ರಂದು ಸಿಲ್ಹೆಟ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಬಾಂಗ್ಲಾದೇಶದ ವಿರುದ್ಧದ ನಾಲ್ಕನೇ ಟಿ20 ಪಂದ್ಯದ ವೇಳೆ ಸ್ಪಿನ್ನರ್ ಆಶಾ ಶೋಭನಾ ಅವರು ಮಹಿಳಾ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಭಾರತದ ಪರ ಪದಾರ್ಪಣೆ ಮಾಡಿದ ಅತ್ಯಂತ ಹಿರಿಯ ಚೊಚ್ಚಲ ಆಟಗಾರ್ತಿ ಎನಿಸಿದರು.

33 ವರ್ಷ ಮತ್ತು 51 ದಿನಗಳ ವಯಸ್ಸಿನಲ್ಲಿ ಲೆಗ್ ಸ್ಪಿನ್ನರ್ ಆಶಾ ಶೋಭನಾ ಅವರು ರಾಷ್ಟ್ರೀಯ ಮಹಿಳಾ ತಂಡದ ಜೆರ್ಸಿ ಧರಿಸುವ ಮೊದಲ ಅವಕಾಶವನ್ನು ಪಡೆದರು.

2008ರಲ್ಲಿ ರಂಗಿರಿ ದಂಬುಲ್ಲಾ ಅಂತಾರಾಷ್ಟ್ರೀಯ ಸ್ಟೇಡಿಯಂನಲ್ಲಿ ಶ್ರೀಲಂಕಾ ವಿರುದ್ಧದ ಏಕದಿನ ಪಂದ್ಯದಲ್ಲಿ 31ನೇ ವಯಸ್ಸಿನಲ್ಲಿ ಭಾರತ ತಂಡಕ್ಕೆ ಪದಾರ್ಪಣೆ ಮಾಡಿದ ಸೀಮಾ ಪೂಜಾರೆ ಅವರ ದಾಖಲೆಯನ್ನು ಆಶಾ ಶೋಭನಾ ಮುರಿದರು.

ಗಮನಾರ್ಹವಾಗಿ, ಆಶಾ ಶೋಭನಾ ಮತ್ತು ಸೀಮಾ ಪೂಜಾರೆ ಹೊರತುಪಡಿಸಿ, ಯಾವುದೇ ಭಾರತೀಯ ಮಹಿಳಾ ಆಟಗಾರ್ತಿಯರು 30 ವರ್ಷದ ನಂತರ ಪದಾರ್ಪಣೆ ಮಾಡಲಿಲ್ಲ.

ಬಾಂಗ್ಲಾದೇಶ ವಿರುದ್ಧ 5 ಪಂದ್ಯಗಳ ಸರಣಿಯಲ್ಲಿ ಈಗಾಗಲೇ 3-0 ಮುನ್ನಡೆ ಸಾಧಿಸಿರುವ ಹರ್ಮನ್‌ಪ್ರೀತ್ ನಾಯಕತ್ವದ ಭಾರತ ಮಹಿಳಾ ತಂಡ, ತನ್ನ ಆಡುವ 11ರ ಬಳಗದಲ್ಲಿ ಒಂದೆರಡು ಬದಲಾವಣೆಗಳನ್ನು ಮಾಡಿದೆ.

ರೇಣುಕಾ ಸಿಂಗ್ ಠಾಕೂರ್ ಬದಲಿಗೆ ಟೈಟಸ್ ಸಾಧು ಅವರನ್ನು ಆಯ್ಕೆ ಮಾಡಿದರೆ, ಯುವ ಆಲ್‌ರೌಂಡರ್ ಶ್ರೇಯಾಂಕಾ ಪಾಟೀಲ್ ಬದಲಿಗೆ ಆಶಾ ಶೋಭನಾ ಅವರನ್ನು ಆಯ್ಕೆ ಮಾಡಲಾಗಿದೆ.

2024ರ ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯುಪಿಎಲ್) ಪಂದ್ಯಾವಳಿಯಲ್ಲಿ ಸ್ಮೃತಿ ಮಂಧಾನ ನಾಯಕತ್ವದ ಆರ್‌ಸಿಬಿ ಪರ ಆಡುವಾಗ ಅಸಾಧಾರಣ ಪ್ರದರ್ಶನ ನೀಡಿದ ನಂತರ ಆಶಾ ಸೋಭನಾ ಇತ್ತೀಚೆಗೆ ತಮ್ಮ ಮೊದಲ ಭಾರತ ತಂಡದ ಕರೆ ಸ್ವೀಕರಿಸಿದರು.

ಅಲಿಸ್ಸಾ ಹೀಲಿ ನಾಯಕತ್ವದ ಯುಪಿ ವಾರಿಯರ್ಜ್ ವಿರುದ್ಧದ ಪಂದ್ಯವೊಂದರಲ್ಲಿ ಆಶಾ ಸೋಭನಾ 5-ವಿಕೆಟ್‌ಗಳ ಸಾಧನೆಯನ್ನು ಮಾಡಿದರು.

14ನೇ ವಯಸ್ಸಿಗೆ ಪದಾರ್ಪಣೆ ಮಾಡಿದ ಹಬೀಬಾ ಇಸ್ಲಾಂ
ಭಾರತದ ಆಶಾ ಸೋಭನಾ ಜೊತೆಗೆ ಬಾಂಗ್ಲಾದೇಶ ಬಲಗೈ ವೇಗಿ ಹಬೀಬಾ ಇಸ್ಲಾಂ ಪಿಂಕಿ 14 ವರ್ಷ ಮತ್ತು 340 ದಿನಗಳ ವಯಸ್ಸಿನಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದರು. ಪಿಂಕಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡಿದ ಎರಡನೇ ಕಿರಿಯ ಬಾಂಗ್ಲಾದೇಶಿ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

2019ರಲ್ಲಿ ದಕ್ಷಿಣ ಏಷ್ಯಾ ಕ್ರೀಡಾಕೂಟದಲ್ಲಿ ನೇಪಾಳದ ವಿರುದ್ಧ ರಾಬೆಯಾ ಖಾನ್ ಮೊದಲ ಬಾರಿಗೆ ಬಾಂಗ್ಲಾದೇಶ ರಾಷ್ಟ್ರೀಯ ಜೆರ್ಸಿಯನ್ನು ಧರಿಸಿದ್ದರು.

ಆಗ ರಾಬೆಯಾ ಖಾನ್‌ಗೆ 14 ವರ್ಷ 268 ದಿನ. ಇದೀಗ 19 ವರ್ಷದ ರಾಬೆಯಾ ಖಾನ್ ಭಾರತ ವಿರುದ್ಧದ ಟಿ20 ಸರಣಿಗಾಗಿ ಹಬೀಬಾ ಇಸ್ಲಾಂ ಪಿಂಕಿ ಜೊತೆಗೆ ಬಾಂಗ್ಲಾದೇಶ ತಂಡದ ಭಾಗವಾಗಿದ್ದಾರೆ. ಆಶಾ ಸೋಭನಾ ದೇಶೀಯ ಕ್ರಿಕೆಟ್ ಆಡಲು ಆರಂಭಿಸಿದಾಗ ಹಬೀಬಾ ಇಸ್ಲಾಂ ಪಿಂಕಿ ಹುಟ್ಟಿರಲಿಲ್ಲ ಎಂಬುದು ಗಮನಾರ್ಹ ಸಂಗತಿ.

ಪಾಕಿಸ್ತಾನದ ಆಯೇಶಾ ನಸೀಮ್ (15 ವರ್ಷ ಮತ್ತು 209 ದಿನಗಳು), ಬಾಂಗ್ಲಾದೇಶದ ನಹಿದಾ ಅಕ್ಟರ್ (15 ವರ್ಷ ಮತ್ತು 212 ದಿನಗಳು) ಮತ್ತು ಭಾರತದ ಶಫಾಲಿ ವರ್ಮಾ (15 ವರ್ಷ ಮತ್ತು 239 ದಿನಗಳು) ಸಹ ಚಿಕ್ಕ ವಯಸ್ಸಿನಲ್ಲೇ ಪದಾರ್ಪಣೆ ಮಾಡಿದರು.