ಟೀಮ್ ಇಂಡಿಯಾಗೆ ಹೊಸ ಕಿಟ್ ಪ್ರಾಯೋಜಕರು: ಅಧಿಕೃತವಾಗಿ ಘೋಷಿಸಿದ ಬಿಸಿಸಿಐ

ಬಿಸಿಸಿಐ ತನ್ನ ಹೊಸ ಕಿಟ್ ಪ್ರಾಯೊಜಕರನ್ನು ಅಧಿಕೃತವಾಗಿ ಘೋಷಿಸಿದೆ. ನೈಕ್ ಬಳಿಕ ಕಿಟ್ ಪ್ರಾಯೋಜಕತ್ವ ಈಗ ಎಂಪಿಎಲ್ ಸ್ಪೋರ್ಟ್ಸ್‌ ಪಾಲಾಗಿದೆ. ಮೂರು ವರ್ಷಗಳ ಈ ಒಡಂಬಡಿಕೆಯನ್ನು ಬಿಸಿಸಿಐ ಮಂಗಳವಾರ ಅಧಿಕೃತವಾಗಿ ಘೋಷಿಸಿದೆ.

ನವೆಂಬರ್ 2020ರಿಂದ 2023ರ ಡಿಸೆಂಬರ್ ವರೆಗಿನ ಒಪ್ಪಂದವನ್ನು ಬಿಸಿಸಿಐ ಮಾಡಿಕೊಂಡಿದೆ. ಈ ಅವಧಿಯಲ್ಲಿ ಟೀಮ್ ಇಂಡಿಯಾ ಪಾಲ್ಗೊಳ್ಳುವ ಪ್ರತಿ ಪಂದ್ಯಕ್ಕೂ ಬಿಸಿಸಿಐ 65 ಲಕ್ಷ ರೂಪಾಯಿ ಈ ಪ್ರಾಯೋಜಕತ್ವದ ಒಪ್ಪಂದದಿಂದ ಪಡೆದುಕೊಳ್ಳಲಿದೆ. ಜೊತೆಗೆ 3 ವರ್ಷಗಳಲ್ಲಿ ಪ್ರತಿ ವರ್ಷ 3ಕೋಟಿ ವ್ಯಾಪಾರೀಕರಣ ಮೊತ್ತ ಬಿಸಿಸಿಐ ಪಾಲಾಗಲಿದೆ ಎಂದು ಮೂಲಗಳಿಂದ ಮಾಹಿತಿ ದೊರೆತಿದೆ.

ಹೀಗಾಗಿ MPL ಸ್ಪೋರ್ಟ್ಸ್ ವಿನ್ಯಾಸಗೊಳಿಸುವ ಈ ಜರ್ಸಿ ಮುಂದಿನ ಮೂರು ವರ್ಷಗಳ ಕಾಲ ಟೀಮ್ ಇಂಡಿಯಾದ ಪುರುಷರ ತಂಡದ ಜೊತೆಗೆ ಮಹಿಳಾ ತಂಡ ಹಾಗೂ ಅಂಡರ್‌-19 ತಂಡಗಳು ಕೂಡ ಧರಿಸಲಿದೆ.

ಈ ಮುನ್ನ ಟೀಮ್ ಇಂಡಿಯಾದ ಕಿಟ್ ಪ್ರಾಯೋಜಕತ್ವ ನೈಕ್ ಕಂಪನಿಯ ಬಳಿಯಿತ್ತು. ಇದರ ಒಪ್ಪಂದದ ಅವಧಿ ಮುಕ್ತಾಯವಾದ ಕಾರಣ ಒಪ್ಪಂದವನ್ನು ಮುಂದುವರಿಸಲು ನೈಕ್ ಬಯಸಿರಲಿಲ್ಲ. ಕೊರೊನಾ ವೈರಸ್ ಕಾರಣದಿಂದಾಗಿ ನಷ್ಟವನ್ನು ತುಂಬಲು ನೈಕ್ ಈ ನಿರ್ಧಾರವನ್ನು ಕೈಗೊಂಡಿತ್ತು. ಹೀಗಾಗಿ ಹೊಸದಾಗಿ ಒಪ್ಪಂದಕ್ಕೆ ಬಿಸಿಸಿಐ ಅಹ್ವಾನ ನೀಡಿತ್ತು.

ಟೀಮ್ ಇಂಡಿಯಾ ಈ ಹೊಸ ಜರ್ಸಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಸರಣಿಯಲ್ಲಿ ಕಣಕ್ಕಿಳಿಯಲಿದೆ. 3 ಏಕದಿನ 3 ಟಿ20 ಹಾಗೂ 4 ಟೆಸ್ಟ್ ಸರಣಿಯಲ್ಲಿ ಭಾರತ ಆಸ್ಟ್ರೇಲಿಯಾ ವಿರುದ್ಧ ಕಣಕ್ಕಿಳಿಯಲಿದೆ. ಇದೇ ತಿಂಗಳ 27ರಿಂದ 2 ತಿಂಗಳ ಕಾಲ ನಡೆಯುವ ಈ ಸುದೀರ್ಘ ಸರಣಿಗೆ ಚಾಲನೆ ದೊರೆಯಲಿದೆ.