ಭಾರತ ವಿರುದ್ಧದ ಟೆಸ್ಟ್ ಸರಣಿ ಆಶಸ್‌ಗಿಂತ ಕಠಿಣ: ಒಪ್ಪಿಕೊಂಡ ಆಸಿಸ್ ಕ್ರಿಕೆಟಿಗರು!

ಆಶಸ್ or ಬಾರ್ಡರ್ ಗವಾಸ್ಕರ್ ಟ್ರೋಫಿ

ಆಸ್ಟ್ರೇಲಿಯಾದ ಸ್ಟಾರ್ ಆಟಗಾರರ ವಿಶೇಷ ಮಾತುಕತೆಯಲ್ಲಿ ಭಾರತ ಪ್ರವಾಸ ಹಾಗೂ ಆಶಸ್ ಅವೇ ಸರಣಿಯಲ್ಲಿ ಯಾವುದು ಕಠಿಣ ಎಂಬ ಪ್ರಶ್ನೆಯನ್ನು ಕೇಳಲಾಯಿತು. ಈ ಪ್ರಶ್ನೆಗೆ ಆಸ್ಟ್ರೇಲಿಯಾದ ಸ್ಟಾರ್ ಆಟಗಾರರಾದ ಮಿಚೆಲ್ ಸ್ಟಾರ್ಕ್, ಸ್ಟೀವ್ ಸ್ಮಿತ್, ದೇವಿಡ್ ವಾರ್ನರ್ ಸೇರಿದಂತೆ ಕೆಲ ಪ್ರಮುಖ ಆಟಗಾರರು ಪ್ರತಿಕ್ರಿಯೆ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಆಶಸ್ ಸರಣಿಗಿಂತಲೂ ಭಾರತದ ಪ್ರವಾಸವೇ ಅತ್ಯಂತ ಕಠಿಣ ಎಂದಿದ್ದಾರೆ.

ಭಾರತದಲ್ಲಿ ಟೆಸ್ಟ್ ಸರಣಿ ಗೆದ್ದರೆ ಆಶಸ್‌ಗಿಂತ ದೊಡ್ಡದು

ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟೀವ್ ಸ್ಮಿತ್ "ಸರಣಿ ಬಿಟ್ಟು ಬಿಡಿ ಭಾರತದಲ್ಲಿ ಒಂದು ಟೆಸ್ಟ್ ಪಂದ್ಯವನ್ನು ಗೆಲ್ಲುವುದು ಕೂಡ ಬಹಳ ಕಷ್ಟ. ಈ ದುರ್ಗಮ ಪರ್ವತವನ್ನು ಏರಲು ಸಾಧ್ಯವಾದರೆ ಅದು ದೊಡ್ಡ ಸಾಧನೆ. ಭಾರತದಲ್ಲಿ ನಾವು ಟೆಸ್ಟ್ ಸರಣಿಯನ್ನು ಗೆಲ್ಲಲು ಸಾಧ್ಯವಾದರೆ, ಅದು ಆಶಸ್ ಸರಣಿಗಿಂತಲೂ ದೊಡ್ಡ ಸಾಧನೆ" ಎಂದಿದ್ದಾರೆ ಆಸ್ಟ್ರೇಲಿಯಾ ತಂಡದ ಹಿರಿಯ ಆಟಗಾರ ಸ್ಟೀವ್ ಸ್ಮಿತ್.

ಮಿಚೆಲ್ ಸ್ಟಾರ್ಕ್ ಹೇಳಿದ್ದಿಷ್ಟು

ಇನ್ನು ಆಸ್ಟ್ರೇಲಿಯಾದ ಸ್ಟಾರ್ ವೇಗಿ ಮಿಚೆಲ್ ಸ್ಟಾರ್ಕ್ "ಭಾರತದಲ್ಲಿ ಟೆಸ್ಟ್ ಸರಣಿ ಗೆದ್ದರೆ ಅದು ನಮ್ಮ ತಂಡಕ್ಕೆ ಬಹಳ ವಿಶೇಷವಾಗಿರಲಿದೆ. ಇದು ವಿದೇಶದಲ್ಲಿ ಆಡುವ ತಾಣಗಳ ಪೈಕಿ ಟೆಸ್ಟ್ ಗೆಲ್ಲಲು ಅತ್ಯಂತ ಕಠಿಣ ಸ್ಥಳವಾಗಿದೆ. ಇಂಥಾ ಪ್ರದೇಶದಲ್ಲಿ ಬಲಿಷ್ಠವಾಗಿರುವ ಭಾರತ ತಂಡದ ವಿರುದ್ಧ ಗೆಲುವು ಸಾಧಿಸಿದರೆ ಅದು ಅತ್ಯಂತ ವಿಶೇಷವಾಗಿರುತ್ತದೆ" ಎಂದಿದ್ದಾರೆ.

ಕಳೆದ ಬಾರಿ ಅತ್ಯುತ್ತಮ ಅವಕಾಶವಿತ್ತು ಎಂದ ಹೇಜಲ್‌ವುಡ್

ಇನ್ನು ಈ ಸಂದರ್ಭದಲ್ಲಿ ಆಸ್ಟ್ರೇಲಿಯಾದ ಮತ್ತೋರ್ವ ಸ್ಟಾರ್ ವೇಗಿ ಜೋಶ್ ಹೇಜಲ್‌ವುಡ್ ಕಳೆದ ಬಾರಿ ಭಾರತ ಪ್ರವಾಸ ಕೈಗೊಂಡಿದ್ದಾಗ ಟೆಸ್ಟ್ ಸರಣಿ ಗೆಲ್ಲಲು ಅತ್ಯುತ್ತಮ ಅವಕಾಶವಿತ್ತು ಎಂದಿದ್ದಾರೆ. "ನಾವು ಕಳೆದ ಬಾರಿ ಒಂದು ಟೆಸ್ಟ್ ಪಂದ್ಯವನ್ನು ಗೆದ್ದಿದ್ದೆವು. ಆ ಸಂದರ್ಭದಲ್ಲಿ ಸರಣಿ ಗೆಲ್ಲಲು ಅದ್ಭುತವಾದ ಅವಕಾಶವಿತ್ತು. ಆದರೆ ಆ ಅವಕಾಶವನ್ನು ನಾವು ಸರಿಯಾಗಿ ಬಳಸಿಕೊಳ್ಳಲಿಲ್ಲ. ಹೀಗಾಗಿ ಈ ಬಾರಿ ಅದಕ್ಕಾಗಿ ನಾವು ಎದುರು ನೋಡುತ್ತಿದ್ದೇವೆ" ಎಂದಿದ್ದಾರೆ.

ಇನ್ನು ಆಸ್ಟ್ರೇಲಿಯಾದ ಆರಂಬಿಕ ಆಟಗಾರ ಡೇವಿಡ್ ವಾರ್ನರ್ ಪ್ರತಿಕ್ರಿಯೆ ನೀಡಿದ್ದು "ಕಳೆದ ಆಶಸ್ ಸರಣಿಯಲ್ಲಿ ಭಾಗವಾಗಿದ್ದು ಅದ್ಭುತವಾದ ಅನುಭವ. ಆದರೆ ಭಾರತ ಪ್ರವಾಸ ಕೈಗೊಂಡು ಭಾರತವನ್ನು ಟೆಸ್ಟ್ ಕ್ರಿಕೆಟ್‌ನಲ್ಲಿ ಸೋಲಿಸುವುದೆಂದರೆ ಅದು ನಮ್ಮ ಪಾಲಿಗೆ ಬಹಳ ಕಠಿಣವಾದ ಸವಾಲಾಗಿದೆ" ಎಂದಿದ್ದಾರೆ ಡೇವಿಡ್ ವಾರ್ನರ್.