ವೇಗಿ ಭುವನೇಶ್ವರ್ ಕುಮಾರ್‌ಗೆ ಐಸಿಸಿ ತಿಂಗಳ ಆಟಗಾರ ಪ್ರಶಸ್ತಿ

ನವದೆಹಲಿ: ಭಾರತದ ವೇಗಿ ಭುವನೇಶ್ವರ್ ಕುಮಾರ್‌ಗೆ ಮಾರ್ಚ್ ತಿಂಗಳ ಇಂಟರ್ ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ತಿಂಗಳ ಆಟಗಾರ ಪ್ರಶಸ್ತಿ ಲಭಿಸಿದೆ. ಇಂಗ್ಲೆಂಡ್ ವಿರುದ್ಧದ ನಿಯಮಿತ ಓವರ್‌ಗಳ ಸರಣಿಯಲ್ಲಿ ಭುವನೇಶ್ವರ್ ಅದ್ಭುತ ಪ್ರದರ್ಶನ ನೀಡಿದ್ದಕ್ಕಾಗಿ ಭುವಿಯನ್ನು ಪ್ರಶಸ್ತಿಗಾಗಿ ಪರಿಗಣಿಸಲಾಗಿದೆ.

31ರ ಹರೆಯದ ಭುವನೇಶ್ವರ್ ಕುಮಾರ್, ಭಾರತ-ಇಂಗ್ಲೆಂಡ್ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ 4.65 ಎಕಾನಮಿಯಂತೆ 6 ವಿಕೆಟ್ ಉರುಳಿಸಿದ್ದರು. ಇನ್ನು ಐದು ಪಂದ್ಯಗಳ ಟಿ20ಐ ಸರಣಿಯಲ್ಲಿ 6.38 ಎಕಾನಮಿಯಂತೆ 5 ವಿಕೆಟ್ ಪಡೆದಿದ್ದರು.

ಐಪಿಎಲ್ 2021: ಸುದ್ದಿ, ವಿಶ್ಲೇಷಣೆ, ಅಂಕಿ ಅಂಶಗಳುಳ್ಳ ವಿಶೇಷ ಪುಟದ ಲಿಂಕ್

ಇಂಗ್ಲೆಂಡ್ ಪ್ರವಾಸ ಸರಣಿಯ ವೇಳೆ ಭಾರತ ತಂಡಕ್ಕೆ ಮರಳಿದ್ದ ಭುವಿ ತಂಡಕ್ಕೆ ಸೇರಿಕೊಂಡಿದ್ದರ ಬಗ್ಗೆ ಖುಷಿ ತೋರಿಕೊಂಡಿದ್ದರು. 'ಭಾರತ ತಂಡದಿಂದ ಹೊರಗಿದ್ದು ಸಾಕಷ್ಟು ಅಂತರದ, ನೋವಿನ ದಿನಗಳನ್ನು ಕಳೆದ ಬಳಿಕ ಮತ್ತೆ ಭಾರತಕ್ಕೆ ಮರಳಲು ಬಹಳ ‍ಖುಷಿಯಾಗಿದೆ,' ಎಂದು ಭುವಿ ಹೇಳಿದ್ದರು.

ಈ ವರ್ಷದಿಂದ ಆರಂಭವಾಗಿರುವ ಈ ಐಸಿಸಿ ಪ್ಲೇಯರ್ ಆಫ್‌ ದ ಮಂಥ್ ಪ್ರಶಸ್ತಿ ದೊರೆತ ಮೂರನೇ ಭಾರತೀಯ ಆಟಗಾರ ಭುವನೇಶ್ವರ್. ಜನವರಿ ತಿಂಗಳ ಪ್ರಶಸ್ತಿ ಯುವ ಬ್ಯಾಟ್ಸ್‌ಮನ್‌ ರಿಷಭ್ ಪಂತ್‌ಗೆ, ಫೆಬ್ರವರಿ ತಿಂಗಳ ಪ್ರಶಸ್ತಿ ಸ್ಪಿನ್ನರ್‌ ಆರ್‌ ಅಶ್ವಿನ್‌ಗೆ ಸಿಕ್ಕಿತ್ತು. ಪಂತ್, ಭುವಿ ಮತ್ತು ಅಶ್ವಿನ್ ಎಲ್ಲರೂ ಸದ್ಯ ಐಪಿಎಲ್‌ನಲ್ಲಿ ಬ್ಯುಸಿಯಾಗಿದ್ದಾರೆ.