Big Bash League: ಕ್ಯಾಚ್ ಹಿಡಿಯಲು ಹೋಗಿ ಆಟಗಾರರು ಮುಖಾಮುಖಿ; ಆಸ್ಪತ್ರೆಗೆ ದಾಖಲು

ಕ್ರಿಕೆಟ್ ಆಟದಲ್ಲಿ ಹಲವು ಬಾರಿ ಆಟಗಾರರು ಪಂದ್ಯ ಗೆಲ್ಲಲು ತಮ್ಮ ಪ್ರಾಣವನ್ನೇ ಪಣಕ್ಕಿಡುತ್ತಾರೆ. ಸುರಕ್ಷತೆಯ ಹೊರತಾಗಿಯೂ, ಆಟಗಾರರ ನಿಷ್ಠೆ ಕೆಲವೊಮ್ಮೆ ಅಗಾಧವಾಗುತ್ತದೆ. ಅದು ಬ್ಯಾಟರ್ ಆಗಿರಲಿ ಅಥವಾ ಫೀಲ್ಡರ್ ಆಗಿರಲಿ. ಇದಕ್ಕೆ ದೊಡ್ಡ ಉದಾಹರಣೆ ಬಿಗ್ ಬ್ಯಾಷ್ ಲೀಗ್ (ಬಿಬಿಎಲ್) ಪಂದ್ಯದಲ್ಲಿ ನಡೆದ ಒಂದು ಘಟನೆ. ಒಂದು ಕ್ಯಾಚ್ ಇಬ್ಬರು ಆಟಗಾರರನ್ನು ಆಸ್ಪತ್ರೆಗೆ ದಾಖಲಾಗುವಂತೆ ಮಾಡಿದೆ. ಬಿಗ್ ಬ್ಯಾಷ್ ಲೀಗ್‌ನಲ್ಲಿ ಸಿಡ್ನಿ ಥಂಡರ್ಸ್ ಮತ್ತು ಪರ್ತ್ ಸ್ಕಾರ್ಚರ್ ನಡುವಿನ ಪಂದ್ಯದಲ್ಲಿ ಈ ದುರಂತ ನಡೆದಿದೆ.

ಸಿಡ್ನಿ ಥಂಡರ್ಸ್ ಮತ್ತು ಪರ್ತ್ ಸ್ಕಾರ್ಚರ್ ನಡುವಿನ ರೋಚಕ ಪಂದ್ಯದಲ್ಲಿ ಡೇನಿಯಲ್ ಸ್ಯಾಮ್ ಹಾಗೂ ಕ್ಯಾಮರೂನ್ ಬ್ಯಾಂಕ್ರಾಫ್ಟ್ ಕ್ಯಾಚ್ ಹಿಡಿಯಲು ಹೋಗಿ ಗಾಯಗೊಂಡಿದ್ದಾರೆ. ಇಬ್ಬರು ಮುಖಾಮುಖಿ ಡಿಕ್ಕಿ ಹೊಡೆದುಕೊಂಡಿರುವ ಎಲ್ಲರನ್ನೂ ಬೆಚ್ಚಿ ಬೀಳಿಸಿದೆ. ಇಬ್ಬರೂ ಡಿಕ್ಕಿ ಹೊಡೆದಿದ್ದರಿಂದ ತಕ್ಷಣ ಅವರನ್ನು ಪಂದ್ಯದ ಮಧ್ಯದಿಂದಲೇ ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ಆದರೆ, ಇಬ್ಬರೂ ಆಟಗಾರರು ಅಪಾಯದಿಂದ ಪಾರಾಗಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.

ಡೇನಿಯಲ್ ಸ್ಯಾಮ್ ಹಾಗೂ ಕ್ಯಾಮರೂನ್ ಬ್ಯಾಂಕ್ರಾಫ್ಟ್ ಇಬ್ಬರು ಡಿಕ್ಕಿ ಹೊಡೆದುಕೊಂಡು ಮೈದಾನದಲ್ಲಿ ಬಿದ್ದರು. ಇಬ್ಬರ ನಡುವಿನ ಡಿಕ್ಕಿ ನಂತರ ಪಂದ್ಯದಲ್ಲಿ ಗೊಂದಲ ಉಂಟಾಯಿತು. ಪಂದ್ಯ ಕೆಲಕಾಲ ನಿಂತಿತು. ವೈದ್ಯರು ಮೈದಾನಕ್ಕೆ ಧಾವಿಸಿ ಇಬ್ಬರಿಗೂ ಚಿಕಿತ್ಸೆ ನೀಡಲು ಪ್ರಯತ್ನಿಸಿದರು. ಆದರೆ ಹೆಚ್ಚಿನ ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಬೇಕಾಯಿತು. ಇದೀಗ ಗಾಯದಿಂದ ಸ್ವಲ್ಪ ಇಬ್ಬರೂ ಚೇತರಿಸಿಕೊಂಡಿದ್ದು, ಪರಸ್ಪರ ಮಾತನಾಡುತ್ತಿರುವುದು ಕಂಡುಬಂದಿದೆ.

ನಡೆದಿದ್ದೇನು?

ಪರ್ತ್ ಸ್ಕಾರ್ಚರ್ ಬ್ಯಾಟಿಂಗ್ ಮಾಡುವಾಗ ಕೂಪರ್ ಕೊನೊಲಿ ಕ್ರೀಸ್‌ನಲ್ಲಿದ್ದರು. ಇತ್ತ ಸಿಡ್ನಿ ಥಂಡರ್ಸ್ ಪರ ವೇಗಿ
ಲಾಕಿ ಫರ್ಗುಸನ್ ಬೌಲಿಂಗ್ ದಾಳಿಗಿಳಿದಿದ್ದರು. ಈ ವೇಳೆ ಲಾಕಿ ಫರ್ಗುಸನ್ ಓವರ್‌ನ ಎರಡನೇ ಎಸೆತದಲ್ಲಿ ಕೂಪರ್ ಕೊನೊಲಿ ಅವರು ಮಿಡ್‌ವಿಕೆಟ್ ಕಡೆಗೆ ಚೆಂಡನ್ನು ಫ್ಲಿಕ್ ಮಾಡಿದರು. ಚೆಂಡು ಗಾಳಿಯಲ್ಲಿ ಎತ್ತರಕ್ಕೆ ಹಾರಿತು. ಡೇನಿಯಲ್ ಸ್ಯಾಮ್ ಮತ್ತು ಕ್ಯಾಮರೂನ್ ಬ್ಯಾಂಕ್ರಾಫ್ಟ್ ಅವರು ಚೆಂಡನ್ನು ನೋಡುತ್ತಾ ಓಡಿ ಬಂದರು. ಆದರೆ ಇಬ್ಬರು ಮುಖಾಮುಖಿಯಾಗುವುದನ್ನು ಗಮನಿಸಲಿಲ್ಲ. ಇದರಿಂದಾಗಿ ಅವರು ಪರಸ್ಪರ ಡಿಕ್ಕಿ ಹೊಡೆದುಕೊಂಡರು. ಆದಾಗ್ಯೂ, ಇಬ್ಬರ ಬದಲಿ ಆಟಗಾರರು ಪಂದ್ಯದಲ್ಲಿ ಕಾಣಿಸಿಕೊಂಡರು. ಈ ಪಂದ್ಯವನ್ನು ಕೊನೆಯಲ್ಲಿ ಸಿಡ್ನಿ ಥಂಡರ್ಸ್ 4 ವಿಕೆಟ್‌ಗಳಿಂದ ಗೆದ್ದು ಬೀಗಿತ್ತು.