ಬಾರ್ಡರ್-ಗವಾಸ್ಕರ್ ಟ್ರೋಫಿ: ಭಾರತವನ್ನು ಮಣಿಸಲು ಆಸಿಸ್ ತಂಡಕ್ಕೆ ಮಿಚೆಲ್ ಜಾನ್ಸನ್ ಸಲಹೆ

ಮೊದಲು ಬ್ಯಾಟಿಂಗ್‌ಗೆ ಜಾನ್ಸನ್ ಸಲಹೆ

ಈ ಸರಣಿಯಲ್ಲಿ ಆಸ್ಟ್ರೇಲಿಯಾ ತಂಡ ಭಾರತದ ವಿರುದ್ಧ ಮೇಲುಗೈ ಸಾಧಿಸಬೇಕಾದರೆ ಮೊದಲು ಬ್ಯಾಟಿಂಗ್ ನಡೆಸಬೇಕು ಎಂದಿದ್ದಾರೆ. "ಈ ಸರಣಿಯಲ್ಲಿ ಪಿಚ್‌ಗಳು ಸ್ಪಿನ್ನರ್‌ಗಳಿಗೆ ನೆರವು ನೀಡುವ ಕಾರಣ ಮೊದಲಿಗೆ ಬ್ಯಾಟಿಂಗ್‌ ನಡೆಸಿದರೆ ಉತ್ತಮ ರನ್ ಗಳಿಸಲು ಸಾಧ್ಯವಾಗಬಹುದು. ಈ ಮೂಲಕ ಭಾರತ ತಂಡದ ಮೇಲೆ ಒತ್ತಡವನ್ನು ಹೇರಲು ಅವಕಾಶ ದೊರೆಯುತ್ತದೆ. ಇನ್ನು ಈ ಸರಣಿಗೆ ಆಸ್ಟ್ರೇಲಿಯಾ ನಾಲ್ಕು ಸ್ಪಿನ್ನರ್‌ಗಳೊಂದಿಗೆ ತೆರಳಿದೆ. ಇದರಲ್ಲಿ ನಾಥನ್ ಲಿಯಾನ್ ಅನುಭವಕ್ಕೆ ಭಾರತೀಯ ಬ್ಯಾಟರ್‌ಗಳು ಗೌರವ ನೀಡಬಹುದು. ಉಳಿದಂತೆ ಯಾರಿಗೂ ಭಯಪಡಲಾರರು" ಎಂದಿದ್ದಾರೆ ಮಿಚೆಲ್ ಜಾನ್ಸನ್.

ಸ್ಪಿನ್ನರ್‌ಗಳಿಗೆ ಭಾರತೀಯರು ಉತ್ತಮವಾಗಿ ಆಡುತ್ತಾರೆ

'ವೆಸ್ಟ್ ಆಸ್ಟ್ರೇಲಿಯನ್‌'ಗೆ ಬರೆದಿರುವ ಅಂಕಣದಲ್ಲಿ ಆಸ್ಟ್ರೇಲಿಯಾ ತಂಡಕ್ಕೆ ಕೆಲ ಎಚ್ಚರಿಕೆಗಳನ್ನು ಕೂಡ ಅವರು ನೀಡಿದ್ದಾರೆ. "ಆಸ್ಟ್ರೇಲಿಯಾದ ಸ್ಪಿನ್ನರ್ ನಾಥನ್ ಲಿಯಾನ್ ಅವರ ಅನುಭವಕ್ಕೆ ಹಾಗೂ ಅವರ ಟೆಸ್ಟ್ ದಾಖಲೆಗಳಿಗೆ ಭಾರತೀಯ ಬ್ಯಾಟರ್‌ಗಳು ಗೌರವ ನೀಡಬಹುದು. ಆದರೆ ಆಸ್ಟ್ರೇಲಿಯಾದ ಯಾವ ಸ್ಪಿನ್ನರ್‌ಗಳಿಗೂ ಅವರು ಭಯಪಡಲಾರರು. ಭಾರತೀಯ ಆಟಗಾರರು ಸ್ಪಿನ್ ವಿರುದ್ಧ ಪಾದವನ್ನು ಬಳಸಿಕೊಂಡು ಅದ್ಭುತವಾಗಿ ಆಡುತ್ತಾರೆ" ಎಂದಿದ್ದಾರೆ ಆಸಿಸ್ ತಂಡದ ಮಾಜಿ ವೇಗಿ.

2008ರಲ್ಲಿ ನಾಗ್ಪುರದಲ್ಲಿ ಟೆಸ್ಟ್‌ನಲ್ಲಿ ಮುಖಾಮುಖಿಯಾಗಿದ್ದವು ಭಾರತ ಆಸಿಸ್ ತಂಡಗಳು

ಇನ್ನು ನಾಗ್ಪುರದಲ್ಲಿ ಭಾರತ ಹಾಗೂ ಆಸ್ಟ್ರೇಲಿಯಾ ತಂಡಗಳು 2008ರ ಬಳಿಕ ಇದೇ ಮೊದಲ ಬಾರಿಗೆ ಮುಖಾಮುಖಿಯಾಗಿತ್ತಿದೆ. 2008ರಲ್ಲಿ ನಡೆದಿದ್ದ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡವನ್ನು ಭಾರತ 172 ರನ್‌ಗಳ ಅಂತರದಿಂದ ಸೋಲಿಸಿತ್ತು. ಅಂದಿನ ಆಸ್ಟ್ರೇಲಿಯಾ ತಂಡದಲ್ಲಿ ವೇಗದ ಬೌಲಿಂಗ್ ವಿಭಾಗದಲ್ಲಿ ಬ್ರೇಟ್‌ ಲೀ ಜೊತೆಗೆ ಮಿಚೆಲ್ ಜಾನ್ಸನ್ ಕೂಡ ನೇತೃತ್ವ ವಹಿಸಿಕೊಂಡಿದ್ದರು.

"ಆಸ್ಟ್ರೇಲಿಯಾ ನಾಗ್ಪುರದಲ್ಲಿ 2008ರ ಬಳಿಕ ಇದೇ ಮೊದಲ ಬಾರಿಗೆ ಟೆಸ್ಟ್ ಆಡುತ್ತಿದೆ. ಅಂದಿನ ಪಂದ್ಯದಲ್ಲಿ ಜೇಸನ್ ಕ್ರೇಜಾ 12 ವಿಕೆಟ್ ಪಡೆದಿದ್ದರು. ಇಲ್ಲಿನ ಪಿಚ್ ಫ್ಲ್ಯಾಟ್ ಆಗಿರಲಿದ್ದು ಹುಲ್ಲು ಇರುವ ಸಾಧ್ಯತೆಯಿಲ್ಲ. ಹೆಚ್ಚಿನ ಸ್ಪಿನ್ ಇಲ್ಲದಿದ್ದರೂ ವೇಗಿಗಳಿಗೆ ಹೆಚ್ಚಿನ ನೆರವು ದೊರೆಯುವ ಸಾಧ್ಯತೆಯಿಲ್ಲ. ಈ ಪಿಚ್‌ನಲ್ಲಿ ನಾಥನ್ ಲಿಯಾನ್ ಬೌಲಿಂಗ್ ನಡೆಸುವುದನ್ನು ಆನಂದಿಸಬೇಕು" ಎಂದಿದ್ದಾರೆ ಮಿಚೆಲ್ ಜಾನ್ಸನ್.