Brian Lara:'ಟೀಮ್ ಇಂಡಿಯಾದ ಈ ಪ್ಲೇಯರ್ ನನ್ನ 501* ಮತ್ತು 400* ರನ್‌ಗಳ ದಾಖಲೆ ಮುರಿಯುತ್ತಾನೆ'

ಟೀಮ್ ಇಂಡಿಯಾದ ಭರವಸೆಯ ಆಟಗಾರರಲ್ಲಿ ಶುಭಮನ್‌ ಗಿಲ್‌ ಒಬ್ಬರು. ಸಿಕ್ಕ ಅವಕಾಶದಲ್ಲಿ ಅಬ್ಬರಿಸುತ್ತಿರುವ ಗಿಲ್‌, ಭವಿಷ್ಯದ ಟೀಮ್ ಇಂಡಿಯಾದ ಸ್ಟಾರ್ ಪ್ಲೇಯರ್. ಈ ಪ್ಲೇಯರ್‌ ಆಟವನ್ನು ಕಂಡು ಅದೆಷ್ಟೋ ಕ್ರಿಕೆಟ್‌ ದಿಗ್ಗಜರು ಅವರ ಬೆನ್ನು ತಟ್ಟಿದ್ದಾರೆ.

ಶುಭಮನ್ ಗಿಲ್ ಒಬ್ಬ ಬೆಸ್ಟ್‌ ಬ್ಯಾಟ್ಸ್‌ಮನ್, ' ನಾನು 19 ನೇ ವಯಸ್ಸಿನಲ್ಲಿಅವರ ಶೇಕಡಾ 10 ರಷ್ಟು ಕೂಡ ಇರಲಿಲ್ಲ' ಎಂದು ಟೀಮ್ ಇಂಡಿಯಾದ ಮಾಜಿ ನಾಯಕ ವಿರಾಟ್‌ ಕೊಹ್ಲಿ ಈ ಮೊದಲೇ ಹೇಳಿದ್ದರು.

ಇದೀಗ ಕ್ರಿಕೆಟ್ ಜಗತ್ತಿನ ಶ್ರೇಷ್ಠ ಬ್ಯಾಟ್ಸ್‌ಮನ್‌ಗಳಲ್ಲಿ ಒಬ್ಬರಾಗಿರುವ ವೆಸ್ಟ್ ಇಂಡೀಸ್‌ನ ಬ್ರಿಯಾನ್ ಲಾರಾ ಅವರು ಭಾರತೀಯ ಬ್ಯಾಟ್ಸ್‌ಮನ್ ಶುಭಮನ್ ಗಿಲ್ ಬಗ್ಗೆ ದೊಡ್ಡ ಭವಿಷ್ಯ ನುಡಿದಿದ್ದಾರೆ.

ಶುಭಮನ್ ಗಿಲ್ ನನ್ನ 401* ಮತ್ತು 501* ರನ್‌ಗಳ ದಾಖಲೆಯನ್ನು ಮುರಿಯಬಹುದು ಎಂದು ಅನುಭವಿ ಬ್ರಿಯಾನ್ ಲಾರಾ ಹೇಳಿದ್ದಾರೆ. ಇದಲ್ಲದೆ, ಅವರು ಗಿಲ್ ಪ್ರಸ್ತುತ ಕಾಲದ 'ಅತ್ಯಂತ ಪ್ರತಿಭಾವಂತ' ಬ್ಯಾಟ್ಸ್‌ಮನ್ ಎಂದು ಬಣ್ಣಿಸಿದರು.

ಬ್ರಿಯಾನ್ ಲಾರಾ ಟೆಸ್ಟ್ ಮತ್ತು ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಗರಿಷ್ಠ ವೈಯಕ್ತಿಕ ಸ್ಕೋರ್ ಮಾಡಿದ ದಾಖಲೆಯನ್ನು ಹೊಂದಿದ್ದಾರೆ.

2004ರಲ್ಲಿ ಇಂಗ್ಲೆಂಡ್ ವಿರುದ್ಧ ಆಡಿದ ಪಂದ್ಯದಲ್ಲಿ ಅಜೇಯ 400* ರನ್‌ಗಳ ಇನ್ನಿಂಗ್ಸ್‌ ಆಡುವ ಮೂಲಕ ವಿಶ್ವದಾಖಲೆ ನಿರ್ಮಿಸಿದ್ದರು. ಇದರ ಹೊರತಾಗಿ, 1994 ರಲ್ಲಿ, ವೆಸ್ಟ್ ಇಂಡೀಸ್ ದಂತಕಥೆ, ಕೌಂಟಿ ಕ್ರಿಕೆಟ್‌ನಲ್ಲಿ ವಾರ್ವಿಕ್‌ಶೈರ್‌ ಪರ ಆಡುವಾಗ, ಡರ್ಹಾಮ್ ವಿರುದ್ಧ ಅಜೇಯ 501* ರನ್ ಗಳಿಸಿದರು.

ಪ್ರಸ್ತುತ ಟೆಸ್ಟ್ ಪಂದ್ಯಗಳ ಇನ್ನಿಂಗ್ಸ್‌ನಲ್ಲಿ ಒಟ್ಟು 400 ರನ್ ಗಳಿಸಿ ಉತ್ತಮವೆಂದು ಅಂದಾಜಿಸಲಾಗಿದೆ, ಶುಭಮನ್ ಗಿಲ್ ಅವರ 400* ಮತ್ತು 501* ರನ್‌ಗಳ ದಾಖಲೆಯನ್ನು ಮುರಿಯಬಹುದು ಎಂದು ಬ್ರಿಯಾನ್ ಲಾರಾ ಹೇಳಿದ್ದಾರೆ.

'ಆನಂದಬಜಾರ್ ಪತ್ರಿಕಾ' ಜೊತೆ ಮಾತನಾಡಿದ ಅನುಭವಿ ಬ್ರಿಯಾನ್ ಲಾರಾ, "ಶುಭಮನ್ ಗಿಲ್ ನನ್ನ ದಾಖಲೆಗಳನ್ನು ಮುರಿಯಬಹುದು" ಎಂದು ಹೇಳಿದರು.

"ಈ ಹೊಸ ಪೀಳಿಗೆಯಲ್ಲಿ ಗಿಲ್ ಅತ್ಯಂತ ಪ್ರತಿಭಾವಂತ ಬ್ಯಾಟ್ಸ್‌ಮನ್. ಮುಂಬರುವ ವರ್ಷಗಳಲ್ಲಿ ಅವರು ಕ್ರಿಕೆಟ್ ಅನ್ನು ಆಳುತ್ತಾರೆ. ಅವರು ನನ್ನ ದೊಡ್ಡ ದಾಖಲೆಗಳನ್ನು ಮುರಿಯುತ್ತಾರೆ ಎಂಬುದು ನನಗೆ ಖಚಿತವಾಗಿದೆ" ಎಂದು ಹೇಳಿದರು.

ವಿಶ್ವಕಪ್ ನಲ್ಲಿ ಗಿಲ್ ನೀಡಿರುವ ಪ್ರದರ್ಶನದ ಬಗ್ಗೆ ಮಾತನಾಡಿರುವ ಲಾರಾ, "ಅವರು ವಿಶ್ವಕಪ್‌ನಲ್ಲಿ ಶತಕ ಗಳಿಸಲಿಲ್ಲ, ಆದರೆ ಅವರು ಮೊದಲು ಆಡಿದ ಇತರ ಇನ್ನಿಂಗ್ಸ್‌ಗಳನ್ನು ನೋಡಬೇಕು. ಅವರು ಎಲ್ಲಾ ಮೂರು ಸ್ವರೂಪಗಳಲ್ಲಿ ಶತಕಗಳನ್ನು ಗಳಿಸಿದ್ದಾರೆ. ಅವರು ಏಕದಿನ ಕ್ರಿಕೆಟ್ ನಲ್ಲಿ ದ್ವಿಶತಕ ಬಾರಿಸಿದ್ದಾರೆ. ಏಕದಿನ ಮತ್ತು ಐಪಿಎಲ್‌ ನಲ್ಲಿ ಅನೇಕ ಉತ್ತಮ ಇನ್ನಿಂಗ್ಸ್‌ಗಳನ್ನು ಆಡಿದ್ದಾರೆ. ಅವರು ಭವಿಷ್ಯದಲ್ಲಿ ಅನೇಕ ಐಸಿಸಿ ಟೂರ್ನಿ ಆಡುತ್ತಾರೆ ಎಂದು ನನಗೆ ಖಾತ್ರಿಯಿದೆ.

ಗಿಲ್ ದಾಖಲೆ

24 ನೇ ವಯಸ್ಸಿನ, ಶುಭಮನ್ ಗಿಲ್ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅನೇಕ ದೊಡ್ಡ ದಾಖಲೆಗಳನ್ನು ನಿರ್ಮಿದ್ದಾರೆ. ಗಿಲ್ ಎಲ್ಲಾ ಮೂರು ಮಾದರಿಗಳಲ್ಲಿ ಶತಕ ಬಾರಿಸಿದ ಅತ್ಯಂತ ಕಿರಿಯ ಆಟಗಾರ. ಏಕದಿನದಲ್ಲಿ ದ್ವಿಶತಕ ಸಿಡಿಸಿದ ಅತ್ಯಂತ ಕಿರಿಯ ಆಟಗಾರ. ಗಿಲ್ 18 ಟೆಸ್ಟ್ ಪಂದ್ಯಗಳ 33 ಇನ್ನಿಂಗ್ಸ್‌ಗಳಲ್ಲಿ 32.20 ಸರಾಸರಿಯಲ್ಲಿ 966 ರನ್ ಗಳಿಸಿದ್ದಾರೆ.