ಆರ್‌ಸಿಬಿಗಾಗಿ ಕಪ್ ಗೆಲ್ಲು ಎಂದು ಕೊಹ್ಲಿ ಬರ್ತ್‌ಡೇಗೆ ಶುಭ ಹಾರೈಸಿದ ಆಪ್ತ ಗೆಳೆಯ

ಟೀಮ್ ಇಂಡಿಯಾ ಹಾಗೂ ಆರ್‌ಸಿಬಿ ತಂಡದ ನಾಯಕ ವಿರಾಟ್ ಕೊಹ್ಲಿ ಇಂದು 32ನೇ ಹುಟ್ಟುಹಬ್ಬದ ಸಂಭ್ರಮದಲ್ಲಿದ್ದಾರೆ. ವಿರಾಟ್ ಕೊಹ್ಲಿಯ ಈ ವಿಶೇಷ ದಿನದಂದು ಲಕ್ಷಂತರ ಶಭಾಶಯಗಳು ಹರಿದುಬಂದಿದೆ. ಅನೇಕ ದಿಗ್ಗಜ ಕ್ರಿಕೆಟಿಗರು ಕೂಡ ಕೊಹ್ಲಿಗೆ ಹಾರೈಸಿದ್ದಾರೆ.

ಆರ್‌ಸಿಬಿ ತಂಡದ ಮಾಜಿ ಆಟಗಾರ ಟಿ20 ಕ್ರಿಕೆಟ್‌ನ ದಿಗ್ಗಜ ಕ್ರಿಸ್ ಗೇಲ್ ಕೂಡ ಹಳೇಯ ಗೆಳೆಯನಿಗೆ ಶುಭ ಹಾರೈಸಿದ್ದಾರೆ. ಈ ಶುಭಾಶಯದ ಜೊತೆಗೆ ಐಪಿಎಲ್ ಟ್ರೋಫಿ ಗೆದ್ದು ಮನೆಗೆ ತೆಗೆದುಕೊಂಡು ಹೋಗಲು ಕ್ರಿಸ್ ಗೇಲ್ ಹಾರೈಸಿದ್ದಾರೆ.

ಟ್ವಿಟ್ಟರ್‌ನಲ್ಲಿ ಗೇಲ್ " ಹುಟ್ಟುಹಬ್ಬದ ಶುಭಾಶಯಗಳು ಲೆಜೆಂಡ್, ವಿಷ್ ಯು ಮೆನಿ ಮೋರ್ ಕಾಕಾ, ಆರ್‌ಸಿಬಿಗಾಗಿ ಕಪ್‌ಅನ್ನು ಜಯಸಿಕೊಂಡು ಹೋಗು" ಎಂದು ಕ್ರಿಸ್ ಗೇಲ್ ಮನಸಾರೆ ಹಾರೈಸಿ ಟ್ವೀಟ್ ಮಾಡಿದ್ದಾರೆ. ಈ ಟ್ವಿಟ್‌ಗೆ ಸಾಕಷ್ಟು ಪ್ರತಿಕ್ರಿಯೆಗಳು ಹರಿದುಬರುತ್ತಿದೆ.

ಐಪಿಎಲ್‌ನಲ್ಲಿ ಕ್ರಿಸ್ ಗೇಲ್ ಹಾಗೂ ವಿರಾಟ್ ಕೊಹ್ಲಿ ಸುದೀರ್ಘಕಾಲ ಆರ್‌ಸಿಬಿ ತಂಡದ ಪರವಾಗಿ ಕಣಕ್ಕಿಳಿದಿದ್ದಾರೆ. ಆದರೆ 2018ರ ಐಪಿಎಲ್ ಬಳಿಕ ಗೇಲ್ ಆರ್‌ಸಿಬಿ ತಂಡದಿಂದ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಪಾಲಾಗಿದ್ದರು. ಈ ಬಾರಿಯ ಐಪಿಎಲ್‌ನಲ್ಲೂ ಗೇಲ್ ಪಂಜಾಬ್ ತಂಡದ ಪರವಾಗಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ.

ಕ್ರಿಸ್ ಗೇಲ್ ಪ್ರತಿನಿಧಿಸುವ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಈ ಬಾರಿಯ ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದರೂ ಪ್ಲೇಆಫ್ ಪ್ರವೇಶಿಸುವಲ್ಲಿ ವಿಫಲವಾಗಿದೆ. ಹೀಗಾಗಿ ಲೀಗ್‌ಹಂತದಿಂದಲೇ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಹೊರಬಿದ್ದಿದೆ.