ಸನ್‌ರೈಸರ್ಸ್ ಹೈದರಾಬಾದ್ ತಂಡ ಖರೀದಿಗೆ ಮುಂದಾದ ಸೂಪರ್ ಸ್ಟಾರ್!

ಸಿನಿಮಾ ರಂಗದವರು ಐಪಿಎಲ್ ಫ್ರಾಂಚೈಸಿ ಜೊತೆ ಒಡನಾಟ

ಸಿನಿಮಾ ರಂಗದವರು ಐಪಿಎಲ್ ಫ್ರಾಂಚೈಸಿ ಜೊತೆ ಒಡನಾಟ ಹೊಂದಿರುವುದು ಹೊಸ ವಿಷಯವೇನಲ್ಲ. ಬಾಲಿವುಡ್ ನಟ ಸಲ್ಮಾನ್ ಖಾನ್ ಅಥವಾ ಅವರ ಸೋದರರು ಐಪಿಎಲ್ ತಂಡ ಹೊಂದಲು ಬಯಸಿದ್ದಾರೆ ಸುದ್ದಿಯಿದೆ. ಶ್ರೀಲಂಕಾ ಲೀಗ್‌ನಲ್ಲಿ ಇವರು ಹೂಡಿಕೆ ಮಾಡಿದ್ದಾರೆ. ಶಾರುಖ್ ಖಾನ್ ಜೂಹಿ ಚಾವ್ಲಾ, ಪ್ರೀತಿ ಜಿಂಟಾ ಈಗಾಗಲೇ ಐಪಿಎಲ್ ಫ್ರಾಂಚೈಸಿ ಜೊತೆ ಗುರುತಿಸಿಕೊಂಡಿದ್ದಾರೆ. ಸದ್ಯ ಶಿಲ್ಪಾ ಶೆಟ್ಟಿ ಅವರು ಫ್ರಾಂಚೈಸಿ ವ್ಯವಹಾರದಿಂದ ದೂರ ಉಳಿದಿದ್ದಾರೆ.

ಹೊಸ ತಂಡ ಸೇರ್ಪಡೆಯಾಗುತ್ತಿಲ್ಲ

ಕೆಲ ಸೀಸನ್ ನಂತರ ಕೆಲವು ತಂಡಗಳು ಮಾಯವಾಗಿವೆ ಅಥವಾ ಬೇರೆ ಹೆಸರಿನಲ್ಲಿ ಅಸ್ತಿತ್ವ ಉಳಿಸಿಕೊಂಡಿವೆ. ಕೊಚ್ಚಿ ಟಸ್ಕರ್ಸ್ ತಂಡ 2011 ರ ಒಂದು ಐಪಿಎಲ್‌ ಸರಣಿಯಲ್ಲಿ ಮಾತ್ರವೇ ಆಡಿತು. ಪುಣೆ ವಾರಿಯರ್ಸ್ ತಂಡವು 2011 ರಿಂದ 2013 , ರೈಸಿಂಗ್ ಪುಣೆ ಸೂಪರ್ ಜೈಂಟ್ ತಂಡವು 2016 ರಿಂದ 2018, ಗುಜರಾತ್ ಲಯನ್ಸ್ 2016 ರಿಂದ 2018 ರ ವರೆಗೆ ಆಡಿತ್ತು. ಡೆಕ್ಕನ್ ಚಾರ್ಜರ್ಸ್ ತಂಡವು 2008 ರಿಂದ 2012ರ ತನಕ ಆಡಿತ್ತು. ನಂತರ ಇದೇ ತಂಡ ಸನ್‌ರೈಸರ್ಸ್ ಹೈದರಾಬಾದ್ ಆಗಿ ಬದಲಾಗಿದೆ.

ಇಂಡಿಯನ್ ಪ್ರೀಮಿಯರ್ ಲೀಗ್ ನಲ್ಲಿ ಕೇರಳದಿಂದ ಕೊಚ್ಚಿ ಟಸ್ಕರ್ಸ್, ಗುಜರಾತ್ ರಾಜ್ಯದಿಂದ ಗುಜರಾತ್ ಲಯನ್ಸ್, ಮಹಾರಾಷ್ಟ್ರದಿಂದ ಪುಣೆ ವಾರಿಯರ್ಸ್, ರೈಸಿಂಗ್ ಪುಣೆ ಸೂಪರ್ ಜೈಂಟ್ ತಂಡಗಳು ಐಪಿಎಲ್‌ನಲ್ಲಿ ಆಡಿವೆ. ಈ ಮೂರು ತಂಡಗಳಲ್ಲಿ ಒಂದಕ್ಕೆ ಮತ್ತೆ ಅವಕಾಶ ದೊರಕುವ ಸಾಧ್ಯತೆ ಇದೆ ಎಂಬ ಸುದ್ದಿಯಿತ್ತು.

ಮಾರನ್ ಬ್ರದರ್ಸ್ ಜೊತೆ ಅರ್ಜುನ್ ಮಾತುಕತೆ

ಹೈದರಾಬಾದ್ ಮೂಲದ ಸನ್ ರೈಸರ್ಸ್ ಹೈದರಾಬಾದ್ ತಂಡಕ್ಕೆ ಚೆನ್ನೈನ ಕಳಾನಿಧಿ ಮಾರನ್ ಸೋದರರು ಹಣ ಹೂಡಿದ್ದಾರೆ. ಸನ್ ಸಮೂಹ ಸಂಸ್ಥೆಯ ಒಡೆತನದ ಈ ತಂಡದಲ್ಲಿ ಹೂಡಿಕೆ ಮಾಡಲು ನಟ ಅಲ್ಲು ಅರ್ಜುನ್ ಮುಂದಾಗಿದ್ದು ,ಈ ಬಗ್ಗೆ ಮಾತುಕತೆ ನಡೆಸಿದ್ದಾರೆ ಎಂಬ ಸುದ್ದಿ ಬಂದಿದೆ. ಅಲ್ಲು ಅರ್ಜುನ್ ಹಾಗೂ ಕನ್ನಡತಿ ರಶ್ಮಿಕಾ ಮಂದಣ್ಣ ಜೊತೆ ನಟಿಸುತ್ತಿರುವ ಪುಷ್ಪ ಚಿತ್ರ ತೆರೆಗೆ ಬರಲು ಸಜ್ಜಾಗಿದ್ದು, ಚಿತ್ರದ ಪ್ರಚಾರ ಕಾರ್ಯದಲ್ಲಿ ಅರ್ಜುನ್ ನಿರತರಾಗಿದ್ದಾರೆ. ಆದರೆ, ಸಮಯ ಸಿಕ್ಕಾಗ ಕ್ರಿಕೆಟ್ ಮೈದಾನಕ್ಕೆ ಬಂದು ನೆಚ್ಚಿನ ಹೈದರಾಬಾದ್ ತಂಡವನ್ನು ಪ್ರೋತ್ಸಾಹಿಸುವುದನ್ನು ಮಾತ್ರ ಮರೆಯುವುದಿಲ್ಲ.

ಅಲ್ಲು ಅರ್ಜುನ್ ಡ್ಯಾನ್ಸ್ ವಾರ್ನರ್ ಸ್ಟೆಪ್ಸ್

ಅಲ್ಲು ಅರ್ಜುನ್ ನರ್ತಿಸಿರುವ ಬುಟ್ಟ ಬೊಮ್ಮಾ ಹಾಡಿಗೆ ಹಲವು ಬಾರಿ ಹೆಜ್ಜೆ ಹಾಕಿರುವ ಸನ್ ರೈಸರ್ಸ್ ಹೈದರಾಬಾದ್ ತಂಡದ ನಾಯಕ ಡೇವಿಡ್ ವಾರ್ನರ್ ಅವರು ಒಂದು ದಿನ ಅರ್ಜುನ್ ಜೊತೆಗೆ ಇದೇ ಹಾಡಿಗೆ ಸ್ಟೆಪ್ ಹಾಕಲಿ ಎಂಬುದು ಅಭಿಮಾನಿಗಳ ಬಯಕೆಯಾಗಿದೆ. ಕೊವಿಡ್ 19 ಮಾರ್ಗಸೂಚಿ ನಡುವೆ ಪಂದ್ಯಗಳು ನಡೆಯುತ್ತಿದ್ದು, ಈ ವೇಳೆ ಸೆಲೆಬ್ರಿಟಿಗಳ ಭೇಟಿ ಕೂಡಾ ನಿರ್ಬಂಧಿಸಲಾಗಿದೆ. ಆದರೆ, ವಿಶೇಷ ಸಂದರ್ಭದಲ್ಲಿ ಇದೇ ಹಾಡಿಗೆ ಅರ್ಜುನ್ ಜೊತೆ ಕುಣಿಯುವುದಾಗಿ ವಾರ್ನರ್ ಭರವಸೆ ನೀಡಿದ್ದಾರೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಹೊಸ ಕ್ರೇಜ್ ಹುಟ್ಟು ಹಾಕಿರುವ ವಾರ್ನರ್ ಡ್ಯಾನ್ಸ್ ಮತ್ತೊಮ್ಮೆ ನೋಡಲು ಅಭಿಮಾನಿಗಳಂತೂ ಸದಾ ಸಿದ್ಧ ಎನ್ನಬಹುದು.