ಟೆಸ್ಟ್ ಸರಣಿಯಲ್ಲಿ ಟೀಮ್ ಇಂಡಿಯಾದ ಸೋಲಿಗೆ ರಿಷಭ್ ಪಂತ್ ಕಾರಣವೆ?!

ಪಂತ್‌ ಗಳಿಸಿದ್ದು ಕೇವಲ 60 ರನ್

ನ್ಯೂಜಿಲೆಂಡ್‌ ವಿರುದ್ಧದ ಟೆಸ್ಟ್ ಸರಣಿಗಾಗಿ ಟೀಮ್ ಇಂಡಿಯಾದಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ದ ಯುವ ಬಿರುಗೈ ಬ್ಯಾಟ್ಸ್‌ಮನ್ ರಿಷಭ್ ಪಂತ್ ಎರಡು ಪಂದ್ಯ(4 ಇನ್ನಿಂಗ್ಸ್‌)ಗಳಲ್ಲೂ ಆಡಿದ್ದರು. ಆದರೆ ಈ ನಾಲ್ಕೂ ಇನ್ನಿಂಗ್ಸ್‌ಗಳಲ್ಲೂ ಪಂತ್‌ ಗಳಿಸಿದ್ದು ಕೇವಲ 60 ರನ್ (19, 25, 12, 4 ರನ್) ಮಾತ್ರ.

ಚಾನ್ಸ್ ಕೊಟ್ಟರೂ ಬಳಸಿಕೊಳ್ಳುತ್ತಿಲ್ಲ

ಪಂತ್‌ಗೆ ಬಹಳಷ್ಟು ಪಂದ್ಯಗಳಲ್ಲಿ ಚಾನ್ಸ್‌ ಕೊಡುತ್ತಿದ್ದರೂ ಪಂತ್‌ ಅದನ್ನು ಸರಿಯಾಗಿ ಬಳಸಿಕೊಳ್ಳುತ್ತಿಲ್ಲ. ಗಮನಾರ್ಹ ಪ್ರದರ್ಶನ ನೀಡುತ್ತಿಲ್ಲ. ಹೀಗಾಗಿ ಕ್ರಿಕೆಟ್‌ ಜಗತ್ತು ಪಂತ್‌ ಅವರತ್ತ ಬೊಟ್ಟು ಮಾಡಿ ಮಾತಾಡುತ್ತಿದೆ. ಹೀಗಾಗಿಯೇ ಪಂತ್‌ಗೆ ಪದೇ ಪದೇ ಅವಕಾಶ ನೀಡುತ್ತಿರುವ ಬಗ್ಗೆ ವಿವರಣೆ ನೀಡಿ ಕೊಹ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ್ದಾರೆ.

'ಪಂತ್‌ ಶ್ರಮವಹಿಸುತ್ತಿದ್ದಾರೆ'

'ತವರಿನ ಸರಣಿ ಮತ್ತು ವಿದೇಶಿ ಸರಣಿಗಳಲ್ಲೂ ನಾವು ಪಂತ್‌ಗೆ ಸಾಕಷ್ಟು ಅವಕಾಶಗಳನ್ನು ನೀಡಿದ್ದೇವೆ. ಆದರೆ ಪಂತ್ ಅಷ್ಟೇನೂ ಆಡುತ್ತಿಲ್ಲ. ಹಾಗಂತ ಆತ ನಿಜಕ್ಕೂ ಶ್ರಮವಹಿಸಿ ಅಭ್ಯಾಸ ನಡೆಸಿದ್ದಾನೆ. ಹೀಗಿರುವಾಗ ಆತನ ಬದಲು ಬೇರೆಯವರಿಗೆ ಯಾವಾಗ ಅವಕಾಶ ನೀಡಲು ಸರಿಯಾದ ಸಮಯ ಯಾವುದು ಅನ್ನುವುದನ್ನು ತಿಳಿದುಕೊಳ್ಳುವ ಅಗತ್ಯವಿದೆ,' ಎಂದು ಕೊಹ್ಲಿ, ಪಂತ್‌ ಅವರ ಪರ ವಹಿಸಿ ಮಾತನಾಡಿದ್ದಾರೆ.

ಸೋಲಿಗೆ ನಿಜವಾದ ಕಾರಣ

ಮಾತು ಮುಂದುವರೆಸಿದ ಕೊಹ್ಲಿ, 'ಒಟ್ಟಾರೆಯಾಗಿ ಹೇಳೋದಾದ್ರೆ ನಾವ್ಯಾರೂ ಈ ಟೆಸ್ಟ್ ಸರಣಿಯಲ್ಲಿ ಸರಿಯಾಗಿ ಆಡಲಿಲ್ಲ. ಸೋಲಿಗೆ ಪಂತ್‌ ಒಬ್ಬನನ್ನೇ ಗುರಿ ಮಾಡುವುದು ಸರಿಯಲ್ಲ. ಆತನನ್ನು ನಾವೊಂದು ತಂಡವಾಗಿ ಪರಿಗಣಿಸಿದ್ದೇವೆ. ಅದು ಬ್ಯಾಟಿಂಗ್ ತಂಡ ಅಥವಾ ಇಡೀ ತಂಡ ಏನೇ ಇರಲಿ. ಸೋಲಿಗೆ ತಂಡ ಕಾರಣವೇ ಹೊರತು ಅವರೊಬ್ಬರೇ ಅಲ್ಲ, ಎಂದು ಕೊಹ್ಲಿ ವಿವರಿಸಿದರು.

ಚಾಂಪಿಯನ್‌ಶಿಪ್‌ನಲ್ಲಿ ಭಾರತಕ್ಕೆ ಹಿನ್ನಡೆ

ಕಿವೀಸ್ ಟೆಸ್ಟ್ ಸರಣಿಗೂ ಮುನ್ನ ಐಸಿಸಿ ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ ಭರ್ಜರಿ ಮುನ್ನಡೆಯಲ್ಲಿತ್ತು. ಆದರೆ ನ್ಯೂಜಿಲೆಂಡ್ ಎದುರಿನ ಸೋಲಿನಿಂದಾಗಿ ಈಗ ಭಾರತ ಎರಡು ಪಂದ್ಯ ಸೋತಂತಾಗಿದೆ. ಒಟ್ಟು 4 ಸರಣಿಗಳಲ್ಲಿ (9 ಪಂದ್ಯಗಳು) 7 ಪಂದ್ಯಗಳನ್ನು ಗೆದ್ದು 2 ಪಂದ್ಯಗಳನ್ನು ಸೋತಿದೆ. ಸದ್ಯ 360 ಪಾಯಿಂಟ್ಸ್‌ನಿಂದ ಭಾರತ ಅಂಕಪಟ್ಟಿಯ ಮೊದಲ ಸ್ಥಾನದಲ್ಲಿದೆ. ದ್ವಿತೀಯ ಸ್ಥಾನದಲ್ಲಿ ಆಸ್ಟ್ರೇಲಿಯಾ (296 ಪಾಯಿಂಟ್ಸ್), ತೃತೀಯ ಸ್ಥಾನದಲ್ಲಿ ನ್ಯೂಜಿಲೆಂಡ್ (180) ಇದೆ.