ಸ್ಫೋಟಕ ಶತಕ ಬಾರಿಸಿ ಟಿ20 ದಾಖಲೆ ಬರೆದ ಯೂನಿವರ್ಸ್ ಬಾಸ್ ಗೇಲ್

ಗೇಲ್ ಸ್ಫೋಟಕ ಶತಕ

ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಜಮೈಕಾ ತಲೈವಾಸ್ ಪರ ಆರಂಭಿಕ ಬ್ಯಾಟ್ಸ್‌ಮನ್ ಗೇಲ್ 116 (62 ಎಸೆತ), ಚಾಡ್ವಿಕ್ ವಾಲ್ಟನ್ 73 ರನ್ ಸೇರಿಸಿದ್ದರಿಂದ ತಂಡ 20 ಓವರ್‌ಗೆ 4 ವಿಕೆಟ್ ಕಳೆದು 241 ರನ್ ಮಾಡಿತು. ಕೈಟ್ಸ್‌ನ ಫ್ಯಾಬಿಯನ್ ಅಲೆನ್, ಅಲ್ಝಾರಿ ಜೋಸೆಫ್ ತಲಾ 2 ವಿಕೆಟ್ ಪಡೆದರು.

ಥಾಮಸ್, ಲೆವಿಸ್ ಅರ್ಧ ಶತಕ

ಗುರಿ ಬೆನ್ನತ್ತಿದ ಸೇಂಟ್ ಕೈಟ್ಸ್‌ ಆ್ಯಂಡ್ ನೆವಿಸ್ ಪ್ಯಾಟ್ರಿಯೋಟ್ಸ್‌ ತಂಡ, ಡೆವೊನ್ ಥಾಮಸ್ 71, ಎವಿನ್ ಲೆವಿಸ್ 53, ಲಾರಿ ಇವಾನ್ಸ್ 41, ಫ್ಯಾಬಿಯನ್ ಅಲೆನ್ 37, ಶಮರ್ ಬ್ರೂಕ್ಸ್ 27 ರನ್‌ನೊಂದಿಗೆ 18.5ನೇ ಓವರ್‌ಗೆ 6 ವಿಕೆಟ್ ನಷ್ಟದಲ್ಲಿ 242 ರನ್ ಮಾಡಿತು.

ಟಿ20 ದಾಖಲೆ

ಈ ಪಂದ್ಯದ ಶತಕದೊಂದಿಗೆ ಕ್ರಿಸ್‌ ಗೇಲ್ ಟಿ20 ಕ್ರಿಕೆಟ್‌ನಲ್ಲಿ ಅತೀ ಹೆಚ್ಚಿನ ಶತಕದ ದಾಖಲೆಗೂ ಗುರುತಿಸಿಕೊಂಡಿದ್ದಾರೆ. ಗೇಲ್ ಹೆಸರಿನಲ್ಲೀಗ 22 ಟಿ20 ಶತಕಗಳಿವೆ. ಇನ್ನು ಆಸ್ಟ್ರೇಲಿಯಾದ ಮೈಕೆಲ್ ಕ್ಲಿಂಗರ್ 8 ಟಿ20 ಶತಕಗಳೊಂದಿಗೆ ದ್ವಿತೀಯ ಸ್ಥಾನದಲ್ಲಿದ್ದಾರೆ.

ರೋಹಿತ್‌ಗೆ 4ನೇ ಸ್ಥಾನ

ಟಿ20 ಅತ್ಯಧಿಕ ಶತಕದ ದಾಖಲೆ ಸಾಲಿನಲ್ಲಿ 3ನೇ ಸ್ಥಾನದಲ್ಲಿರುವ ಡೇವಿಡ್ ವಾರ್ನರ್ (ಆಸ್ಟ್ರೇಲಿಯಾ), ಬ್ರೆಂಡನ್ ಮೆಕಲಮ್ (ನ್ಯೂಜಿಲೆಂಡ್), ಆ್ಯರನ್ ಫಿಂಚ್ (ಆಸ್ಟ್ರೇಲಿಯಾ), ಲ್ಯೂಕ್ ರೈಟ್ (ಇಂಗ್ಲೆಂಡ್) 7 ಶತಕಗಳನ್ನು ಬಾರಿಸಿದ್ದಾರೆ. ಟಿ20 6 ಶತಕ ಬಾರಿಸಿರುವ ರೋಹಿತ್ ಶರ್ಮಾ, ಶೇನ್ ವಾಟ್ಸನ್ (ಆಸ್ಟ್ರೇಲಿಯಾ) 4ನೇ ಸ್ಥಾನ ಪಡೆದುಕೊಂಡಿದ್ದಾರೆ.