ಮಂಗಳವಾರ ಸಿಪಿಎಲ್ 2020ಗೆ ಚಾಲನೆ: ಟೂರ್ನಿಯ ನೇರಪ್ರಸಾರ ಹಾಗೂ ಸಮಯ

ಕೆರಿಬಿಯನ್ ಪ್ರೀಮಿಯರ್ ಲೀಗ್ ಆಗಸ್ಟ್ 18 ರಿಂದ ಚಾಲನೆ ಪಡೆದುಕೊಳ್ಳಲಿದೆ. ಮೊದಲ ದಿನ ಎರಡು ಪಂದ್ಯಗಳು ನಡೆಯಲಿದ್ದು ಅಭಿಮಾನಿಗಳು ಕುತೂಹಲದಿಂದ ಕಾಯುತ್ತಿದ್ದಾರೆ. ಆದರೆ ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಈ ಪಂದ್ಯಗಳನ್ನು ಹೇಗೆ ವೀಕ್ಷಿಸಬಹುದು. ಎಷ್ಟು ಗಂಟೆಗೆ ಪಂದ್ಯ ಆರಂಭವಾಗಲಿದೆ ಎಂಬುದಕ್ಕೆ ಈ ವರದಿಯಲ್ಲಿ ಉತ್ತರ ದೊರೆಯಲಿದೆ.

ಮಂಗಳವಾರ ಉದ್ಘಾಟನೆಗೊಳ್ಳಲಿರುವ ಸಿಪಿಎಲ್ ಟೂರ್ನಿಯಲ್ಲಿ ಮೊದಲ ದಿನ ಎರಡು ಪಂದ್ಯಗಳು ನಡೆಯಲಿದೆ. ಉದ್ಘಾಟನಾ ಪಂದ್ಯದಲ್ಲಿ ಟ್ರಿನ್ಬಾಗೊ ನೈಟ್‌ ರೈಡರ್ಸ್ ಹಾಗೂ ಕಳೆದ ಬಾರಿಯ ರನ್ನರ್​ಅಪ್ ತಂಡ ಗಯಾನ ವಾರಿಯರ್ಸ್‌ ಕಾದಾಟವನ್ನು ನಡೆಸಲಿವೆ. ಎರಡನೇ ಪಂದ್ಯ ಕಳೆದ ಬಾರಿಯ ಚಾಂಪಿಯನ್ ತಂಡ ಹಾಗೂ ಬಾರ್ಬೇಡೊಸ್‌ ಟ್ರೈಡೆಂಟ್ಸ್‌ ಮತ್ತು ಸೇಂಟ್‌ ಕಿಟ್ಸ್‌ ಅಂಡ್‌ ನೆವೀಸ್‌ ಪೇಟ್ರಿಯಟ್ಸ್ ತಂಡಗಳು ಮುಖಾಮುಖಿಯಾಗಲಿವೆ.

ಪಂದ್ಯದ ಆರಂಭ: ಸಿಪಿಎಲ್‌ನಲ್ಲಿ ನಡೆಯುವ ಮೊದಲ ಪಂದ್ಯ ಭಾರತೀಯ ಕಾಲಮಾನ 7:30ಕ್ಕೆ ಆರಂಭವಾಗಲಿದೆ. ಇದು ಈ ಬಾರಿಯ ಐಪಿಎಲ್ ಸಮಯಕ್ಕೆ ಮೊದಲ ಬಾರಿಗೆ ಹೊಂದಿಕೆಯಾಗುತ್ತಿದೆ. ಎರಡನೇ ಪಂದ್ಯ ಮಾತ್ರ ಭಾರತೀಯ ಅಭಿಮಾನಿಗಳಿಗೆ ಪೂರಕವಾಗಿಲ್ಲ. ನಸುಕಿನ ಜಾವ 3 ಗಂಟೆಗೆ ಎರಡನೇ ಪಂದ್ಯ ಆರಂಭವಾಗಲಿದೆ.

ನೇರಪ್ರಸಾರ: ಈ ಬಾರಿಯ ಕೆರಿಬಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯನ್ನು ಟಿವಿಯಲ್ಲಿ ವೀಕ್ಷಿಸುವ ಭಾರತೀಯ ಅಭಿಮಾನಿಗಳು ಸ್ಟಾರ್ ನೆಟ್‌ವರ್ಕ್‌ನಲ್ಲಿ ವೀಕ್ಷಿಸಬಹುದಾಗಿದೆ. ಇನ್ನು ಆನ್‌ಲೈನ್ ಬಳಕೆದಾರರು ಸ್ಟಾರ್‌ ನೆಟ್‌ವರ್ಕ್‌ನ ಡಿಸ್ನಿ+ಹಾಟ್‌ಸ್ಟಾರ್ ಮೂಲಕ ವೀಕ್ಷಿಸಬಹುದಾಗಿದೆ. ಇದರ ಜೊತೆಗೆ 'ಡ್ರೀಮ್ 11'ನ 'ಫ್ಯಾನ್ ಕೋಡ್‌'ನಲ್ಲೂ ಪಂದ್ಯದ ನೇರಪ್ರಸಾರವನ್ನು ವೀಕ್ಷಿಸಬಹುದು ಎಂದು ಸಿಪಿಎಲ್ ತಿಳಿಸಿದೆ.