ಸಿಪಿಎಲ್ 2020: ಟ್ರಿನ್‌ಬಾಗೊ ನೈಟ್ ರೈಡರ್ಸ್ ವಿರುದ್ಧ ತಂಡಗಳು ಗರಂ

ಟ್ರಿನಿಡಾಡ್ ಆ್ಯಂಡ್ ಟೊಬಾಗೊ, ಆಗಸ್ಟ್ 12: ಆಕರ್ಷಣೀಯ ಕೆರಿಬಿಯನ್ ಪ್ರೀಮಿಯರ್ ಲೀಗ್ ಶುರುವಾಗಲು ಇನ್ನು ಕೇವಲ 1 ವಾರವಷ್ಟೆ ಬಾಕಿ ಉಳಿದಿದೆ. ಆಗಸ್ಟ್ 18ರಿಂದ ಸಿಪಿಎಲ್ ಆರಂಭವಾಗಲಿದೆ. ಆದರೆ ಟೂರ್ನಿ ಸಮೀಪಿಸುತ್ತಿರುವಾಗಲೇ ಫ್ರಾಂಚೈಸಿಗಳ ಮಧ್ಯೆ ಅಸಮಾಧಾನ ಬೆಳೆಯಲಾರಂಭಿಸಿದೆ.

ಕೊರೊನಾವೈರಸ್ ಭೀತಿಯ ಕಾರಣ ಸಿಪಿಎಲ್ ಟೂರ್ನಿಯಲ್ಲಿ ಪಾಲ್ಗೊಳ್ಳುವ ತಂಡಗಳು ಬಯೋ ಸೆಕ್ಯೂರ್ ಬಬಲ್ (ಜೈವಿಕ ಸುರಕ್ಷಾ ಪರದೆ) ಒಳಗೆ ಇರಲು ಮಾರ್ಗ ಸೂಚಿ ನೀಡಲಾಗಿತ್ತು. ಅದರಂತೆ ಕಳೆದ ಒಂದು ವಾರದಿಂದಲೂ ಬಹುತೇಕ ತಂಡಗಳು ಜೈವಿಕ ಸುರಕ್ಷಾ ತಾಣದಲ್ಲಿದ್ದು ಅಲ್ಲೇ ಅಭ್ಯಾಸ ನಡೆಸುತ್ತಿದೆ.

ಆದರೆ ಟೂರ್ನಿಯ 6 ತಂಡಗಳಲ್ಲಿ ಟ್ರಿನ್‌ಬಾಗೊ ನೈಟ್ ರೈಡರ್ಸ್ ತಂಡ ಬಯೋ ಸೆಕ್ಯೂರ್ ಬಬಲ್ ಒಳಗೆ ಇನ್ನೂ ಪ್ರವೇಶಿಸಿಲ್ಲ. ಬದಲಿಗೆ ಬಯೋ ಸೆಕ್ಯೂರ್ ಬಬಲ್‌ನಿಂದ ಹೊರಗಿದ್ದು ಅಭ್ಯಾಸ ನಡೆಸುತ್ತಿದೆ. ಇದು ಉಳಿದ ತಂಡಗಳ ಅಸಮಾಧಾನಕ್ಕೆ ಕಾರಣವಾಗಿದೆ.

ನೈಟ್ ರೈಡರ್ಸ್ ತಂಡದಲ್ಲಿ ಕೀರನ್ ಪೊಲಾರ್ಡ್, ಡ್ವೇನ್ ಬ್ರಾವೋ, ಡ್ಯಾರೆನ್ ಬ್ರಾವೋ, ಸುನಿಲ್ ನರೇನ್, ಲೆಂಡ್ಲ್ ಸಿಮನ್ಸ್‌ ಅವರಂತ ಅಂತಾರಾಷ್ಟ್ರೀಯ ಆಟಗಾರರಲ್ಲದೆ ಜೇಡನ್ ಸೀಲ್ಸ್‌ನಂತ ಪ್ರತಿಭಾನ್ವಿತ ಆಟಗಾರರಿದ್ದಾರೆ. ಇಂಥ ತಂಡವೇ ಸುರಕ್ಷಾ ಮಾರ್ಗಸೂಚಿ ಮೀರಿರುವುದು ಇತರ ತಂಡಗಳನ್ನು ಕೆಣಕಿದೆ.

ತಂಡದಲ್ಲಿನ ತಾರತಮ್ಯದ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿರುವ ಸೇಂಟ್ ಲೂಸಿಯಾ ಝೌಕ್ಸ್ ತಂಡದ ನಾಯಕ ಡ್ಯಾರೆನ್ ಸಾಮಿ, 'ಎಲ್ಲರೂ ಬಯೋ ಸೆಕ್ಯೂರ್ ಬಬಲ್‌ನಲ್ಲಿರುವಾಗ ಕೆಲವರಷ್ಟೇ ಕೊರೊನಾ ಸೋಂಕಿತರ ಪ್ರದೇಶದಲ್ಲಿ ಅಭ್ಯಾಸ ಮಾಡಿ, ಬಳಿಕ ಸೆಲ್ಫ್ ಐಸೊಲೇಶನ್ ಇಲ್ಲದೆ ಬಬಲ್‌ನೊಳಗೆ ಪ್ರವೇಶಿಸುತ್ತಾರೆಂದರೆ ಏನರ್ಥ?,' ಎಂದು ಪ್ರಶ್ನಿಸಿದ್ದಾರೆ.