'ಬೇಸ್‌ಬಾಲ್ ಆಗಿ ಬದಲಾಗುತ್ತಿದೆ ಕ್ರಿಕೆಟ್'; KKR ವಿರುದ್ಧ ದಾಖಲೆ ಗೆಲುವಿನ ಬಳಿಕ PBKS ನಾಯಕ ಸ್ಯಾಮ್ ಕರ್ರಾನ್

ಶುಕ್ರವಾರ, ಏಪ್ರಿಲ್ 26ರಂದು ಕೋಲ್ಕತ್ತಾದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆದ ಕೋಲ್ಕತ್ತಾ ನೈಟ್ ರೈಡರ್ಸ್ ಮತ್ತು ಪಂಜಾಬ್ ಕಿಂಗ್ಸ್ ತಂಡಗಳ ನಡುವಿನ 2024ರ ಇಂಡಿಯನ್ ಪ್ರೀಮಿಯರ್ ಲೀಗ್‌ನ (ಐಪಿಎಲ್) ರೋಚಕ ಪಂದ್ಯವು ಟಿ20 ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ದಾಖಲೆ ರಚಿಸಿತು.

ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಪಂಜಾಬ್ ಕಿಂಗ್ಸ್ ತಂಡವು 262 ರನ್‌ಗಳ ವಿಶ್ವದಾಖಲೆಯ ಚೇಸ್‌ನೊಂದಿಗೆ ಟಿ20 ದಾಖಲೆ ಪುಸ್ತಕವನ್ನು ಪುನಃ ಬರೆದಿದೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಆತಿಥೇಯ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡ ಉತ್ತಮ ಆರಂಭಿಕ ಜೊತೆಯಾಟದ ನೆರವಿನಿಂದ ನಿಗದಿತ 20 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 261 ರನ್‌ಗಳನ್ನು ಕಲೆಹಾಕಿ ಆರಾಮದಾಯಕ ಸ್ಥಿತಿಯಲ್ಲಿತ್ತು.

ಆರಂಭಿಕರಾದ ಫಿಲ್ ಸಾಲ್ಟ್ 37 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 6 ಸಿಕ್ಸರ್‌ಗಳ ಸಮೇತ 75 ರನ್ ಮತ್ತು ಸುನಿಲ್ ನರೈನ್ 32 ಎಸೆತಗಳಲ್ಲಿ 9 ಬೌಂಡರಿ ಹಾಗೂ 4 ಸಿಕ್ಸರ್‌ಗಳ ಮೂಲಕ 71 ರನ್‌ಗಳ ತಲಾ ಅರ್ಧಶತಕಗಳ ಸಹಾಯದಿಂದ ಮತ್ತೊಂದು ರನ್ ಶಿಖರ ನಿರ್ಮಿಸಿತು.

ನಂತರ, ಅಸಾಧ್ಯ ಗುರಿ ಬೆನ್ನಟ್ಟಿದ ಪಂಜಾಬ್ ಕಿಂಗ್ಸ್ ಎಲ್ಲರ ಆಲೋಚನೆಗಳನ್ನು ತಲೆಕೆಳಗಾಗಿಸಿದರು. ಏಕೆಂದರೆ, ಆರಂಭಿಕ ಜಾನಿ ಬೈರ್‌ಸ್ಟೋವ್ ಕೇವಲ 48 ಎಸೆತಗಳಲ್ಲಿ 8 ಎಸೆತಗಳಲ್ಲಿ 9 ಅದ್ಭುತ ಸಿಕ್ಸರ್‌ಗಳ ಬಲದಿಂದ ಅಜೇಯ 108 ರನ್‌ಗಳ ಶತಕ ಸಿಡಿಸಿದರು.

ಇನ್ನು ಪ್ರಭ್‌ಸಿಮ್ರಾನ್ ಸಿಂಗ್ ಅವರು 20 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 5 ಸಿಕ್ಸರ್‌ಗಳಿಂದ ಸ್ಫೋಟಕ 54 ರನ್ ಮತ್ತು ಶಶಾಂಕ್ ಸಿಂಗ್ 28 ಎಸೆತಗಳಲ್ಲಿ 2 ಬೌಂಡರಿ ಹಾಗೂ 8 ಸಿಕ್ಸರ್‌ಗಳೊಂದಿಗೆ ಅಜೇಯ 68 ರನ್ ಗಳಿಸಿ ಇನ್ನೂ 8 ಎಸೆತಗಳು ಮತ್ತು 8 ವಿಕೆಟ್‌ಗಳಿಂದ ಬಾಕಿ ಇರುವಂತೆಯೇ ಗುರಿ ಬೆನ್ನಟ್ಟಿ ಪಂದ್ಯವನ್ನು ಗೆದ್ದರು.

ಬೇಸ್‌ಬಾಲ್ ಆಗಿ ಬದಲಾಗುತ್ತಿದೆ ಕ್ರಿಕೆಟ್

ಈ ಪಂದ್ಯದ ನಂತರ ಮಾತನಾಡಿದ ಪಂಜಾಬ್ ಕಿಂಗ್ಸ್ ತಂಡದ ಹಂಗಾಮಿ ನಾಯಕ ಸ್ಯಾಮ್ ಕುರ್ರಾನ್, ವಿಶೇಷವಾಗಿ ಟಿ20 ಸ್ವರೂಪದಲ್ಲಿ ಈ ರೀತಿಯ ಆಟದಿಂದ ವಿಸ್ಮಯಗೊಂಡರು. ಕ್ರಿಕೆಟ್ ಬೇಸ್‌ಬಾಲ್ ಆಗಿ ಬದಲಾಗುತ್ತಿದೆ ಎಂದು ಅಭಿಪ್ರಾಯಪಟ್ಟರು.

"ಕ್ರಿಕೆಟ್ ಬೇಸ್‌ಬಾಲ್ ಆಗಿ ಬದಲಾಗುತ್ತಿದೆ, ಅಲ್ಲವೇ? ನಾವು ಎಲ್ಲಿಂದ ಪ್ರಾರಂಭಿಸಿದ್ದೇವೆ ಮತ್ತು ಹೇಗೆ ಮುಗಿಸಿದ್ದೇವೆ ಎಂಬದು ನಂಬಲಸಾಧ್ಯವಾಗಿತ್ತು. ಅಂತಿಮವಾಗಿ ಎರಡು ಅಂಕಗಳಿಂದ ಸಂತೋಷವಾಯಿತು. ಇಂತಹ ಆಟಗಳು ಪ್ರಪಂಚದಿಂದ ಹೊರಗಿವೆ. ಆದರೆ ಮುಖ್ಯವಾಗಿ ನಾವು ತಂಡವಾಗಿ ಕೆಲವು ವಾರಗಳ ಕಠಿಣ ಸಮಯವನ್ನು ಹೊಂದಿದ್ದೇವೆ. ಕಳೆದ ಐದು ಪಂದ್ಯಗಳಲ್ಲಿ ಪಂಜಾಬ್ ಕಿಂಗ್ಸ್‌ನ ಮೊದಲ ಗೆಲುವಾಗಿತ್ತು," ಎಂದರು.

ಜಾನಿ ಬೈರ್‌ಸ್ಟೋವ್‌ಗೆ ನಿಜವಾಗಿಯೂ ಸಂತೋಷವಾಗಿದೆ

ಇಂಗ್ಲೆಂಡ್‌ನ ಆರಂಭಿಕ ಬ್ಯಾಟರ್ ಜಾನಿ ಬೇರ್‌ಸ್ಟೋವ್ ಅವರು ವೃತ್ತಿಜೀವನದ ಅತ್ಯುತ್ತಮ ಇನ್ನಿಂಗ್ಸ್‌ನೊಂದಿಗೆ ಪಂಜಾಬ್ ಕಿಂಗ್ಸ್ ತಂಡದ ಆಡುವ 11ರ ಬಳಗಕ್ಕೆ ಮರಳಿದರು.

ಕಳಪೆ ಫಾರ್ಮ್ ನಂತರ ಒಂದೆರಡು ಪಂದ್ಯಗಳಿಂದ ಕೈಬಿಡಲಾಗಿತ್ತು. ಆದರೆ ಪುನರಾಗಮನ ಪಂದ್ಯದಲ್ಲಿ ಜಾನಿ ಬೈರ್‌ಸ್ಟೋವ್ 8 ಬೌಂಡರಿ ಮತ್ತು 9 ಸಿಕ್ಸರ್‌ಗಳನ್ನು ಸಿಡಿಸಿದರು. ಪ್ರಭ್‌ಸಿಮ್ರಾನ್ ಸಿಂಗ್ ಜೊತೆಗಿನ 93 ರನ್‌ಗಳ ಆರಂಭಿಕ ಜೊತೆಯಾಟವು ದಾಖಲೆಯ ಬೆನ್ನಟ್ಟುವಿಕೆಗೆ ಮುನ್ನುಡಿ ಬರೆಯಿತು.

ಸ್ಯಾಮ್ ಕರ್ರಾನ್ ತನ್ನ ಸಹವರ್ತಿ ದೇಶವಾಸಿಯ ಅಸಾಧಾರಣ ಶತಕವನ್ನು ಮನತುಂಬಿ ಶ್ಲಾಘಿಸಿದರು, "ಈ ಶತಕದ ಆಟವು ಜಾನಿ ಬೈರ್‌ಸ್ಟೋವ್‌ಗೆ ನಿಜವಾಗಿಯೂ ಸಂತೋಷವಾಗಿದೆ. ಅವರು ಬಹಳ ಸಮಯದಿಂದ ಪ್ರವಾಸದಲ್ಲಿದ್ದರು. ತಂಡಕ್ಕೆ ರನ್ ಗಳಿಸಲು ನಿಜವಾಗಿಯೂ ಉತ್ಸುಕರಾಗಿ ಹಿಂತಿರುಗಿ ಬಂದಂತೆ ತೋರಿದರು. ತಂಡದಿಂದ ಒಂದೆರಡು ಪಂದ್ಯಗಳು ಹೊರಗುಳಿದರು ಮತ್ತು ತಾನು ಎಂತಹ ಅದ್ಭುತ ಆಟಗಾರ ಎಂಬುದನ್ನು ತೋರಿಸಿದರು. ಆದ್ದರಿಂದ, ನಾನು ಜಾನಿ ಬಗ್ಗೆ ಸಂತಸಗೊಂಡಿದ್ದೇನೆ," ಎಂದು ಹೇಳಿದರು.

ಜಾನಿ ಬೈರ್‌ಸ್ಟೋವ್ ಪಂಜಾಬ್ ಕಿಂಗ್ಸ್ ತಂಡದ ಪ್ರಮುಖ ಪ್ರದರ್ಶನಕಾರನಾಗಿದ್ದರೆ, 32 ವರ್ಷದ ಶಶಾಂಕ್ ಸಿಂಗ್ ಮತ್ತೊಂದು ಸ್ಫೋಟಕ ಅತಿಥಿ ಪಾತ್ರದೊಂದಿಗೆ ತನ್ನ ಪ್ರಗತಿಯ ಆವೃತ್ತಿಯನ್ನು ಮುಂದುವರೆಸಿದರು.

ಜಾನಿ ಬೈರ್‌ಸ್ಟೋವ್ ಜೊತೆಗೆ ಶಶಾಂಕ್ ಸಿಂಗ್ 84 ರನ್‌ಗಳ ಜೊತೆಯಾಟವನ್ನು ನಿರ್ಮಿಸಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ಸೋಲಿಗೆ ಸ್ಫೋಟಕ ಬ್ಯಾಟಿಂಗ್ ಮಾಡಿದರು.

ಇದೇ ವೇಳೆ ಸದ್ಯ ನಡೆಯುತ್ತಿರುವ ಐಪಿಎಲ್‌ನಲ್ಲಿ ಉತ್ತಮ ರನ್ ಗಳಿಸುತ್ತಿರುವ ಶಶಾಂಕ್ ಸಿಂಗ್ ಅವರನ್ನು ಆಲ್‌ರೌಂಡರ್ ಸ್ಯಾಮ್ ಕರ್ರಾನ್ ಕೂಡ ಹೊಗಳಿದರು.

"ನಾವು ಶಶಾಂಕ್ ಸಿಂಗ್‌ಗೆ ಹೆಚ್ಚಿನ ಜವಾಬ್ದಾರಿಯನ್ನು ನೀಡಿದ್ದೇವೆ ಮತ್ತು 4ನೇ ಸ್ಥಾನವನ್ನು ನೀಡಿದ್ದೇವೆ. ಅವರು ತಂಡಕ್ಕೆ ಋತುವಿನ ಹುಡುಕಾಟದ ಆಟಗಾರನಾಗಿದ್ದಾರೆ. ಶಶಾಂಕ್ ಸಿಂಗ್ ಮತ್ತು ಅಶುತೋಷ್ ಶರ್ಮಾ ನಂಬಲಾಗದ ಪ್ರದರ್ಶನ ನೀಡಿದ್ದಾರೆ ಮತ್ತು ನಾನು ನಿಜವಾಗಿಯೂ ಸಂತಸಗೊಂಡಿದ್ದೇನೆ," ಎಂದು ಪಂಜಾಬ್ ಕಿಂಗ್ಸ್ ಹಂಗಾಮಿ ನಾಯಕ ಸ್ಯಾಮ್ ಕುರ್ರಾನ್ ತಿಳಿಸಿದರು.