ವಿಜಯ್ ಹಜಾರೆ: ಪಡಿಕ್ಕಲ್ ಬ್ಯಾಟಿಂಗ್ ಅಬ್ಬರ, ಮತ್ತೊಂದು ದಾಖಲೆ!

ಅತ್ಯಧಿಕ ರನ್ ಪಟ್ಟಿಯಲ್ಲಿ ನಂ.1

ಐಪಿಎಲ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಆಡುವ ದೇವದತ್ ಪಡಿಕ್ಕಲ್ ಈ ಬಾರಿಯ ವಿಜಯ್ ಹಜಾರೆಯಲ್ಲಿ ಅಬ್ಬರದ ಬ್ಯಾಟಿಂಗ್‌ ಮುಂದುವರೆಸುತ್ತಲೇಯಿದ್ದಾರೆ. ಕೇವಲ 6 ಇನ್ನಿಂಗ್ಸ್‌ಗಳನ್ನಾಡಿರುವ ಪಡಿಕ್ಕಲ್, 673 ರನ್ ಬಾರಿಸಿದ್ದಾರೆ. ಟೂರ್ನಿಯಲ್ಲಿ ಅತೀ ಹೆಚ್ಚು ರನ್ ಗಳಿಸಿರುವ ಬ್ಯಾಟ್ಸ್‌ಮನ್‌ಗಳ ಪಟ್ಟಿಯಲ್ಲಿ ಪಡಿಕ್ಕಲ್ ಈಗ ನಂ.1 ಸ್ಥಾನದಲ್ಲಿದ್ದಾರೆ.

ಸತತ 4 ಪಂದ್ಯಗಳಲ್ಲಿ ಶತಕ

ಸೋಮವಾರ (ಮಾರ್ಚ್ 8) ಕೇರಳ ವಿರುದ್ಧದ ಪಂದ್ಯದಲ್ಲಿ ಪಡಿಕ್ಕಲ್ 119 ಎಸೆತಗಳಲ್ಲಿ 101 ರನ್ ಬಾರಿಸಿದ್ದರು. ಇದರಲ್ಲಿ 10 ಫೋರ್ಸ್, 2 ಸಿಕ್ಸರ್ ಸೇರಿತ್ತು. ಪಡಿಕ್ಕಲ್ ಮತ್ತು ನಾಯಕ ಸಮರ್ಥ್ ಆರ್‌ (158 ಎಸೆತಗಳಲ್ಲಿ 192 ರನ್) ಬ್ಯಾಟಿಂಗ್‌ ಬಲದೊಂದಿಗೆ ಕರ್ನಾಟಕ 50 ಓವರ್‌ಗೆ 3 ವಿಕೆಟ್ ಕಳೆದು 338 ರನ್ ಗಳಿಸಿತ್ತು.ಅಷ್ಟೇ ಅಲ್ಲ, ಪಂದ್ಯವನ್ನು ಭರ್ಜರಿ 80 ರನ್‌ನಿಂದ ಗೆದ್ದುಕೊಂಡಿತು. ಪಡಿಕ್ಕಲ್ ಇದಕ್ಕೂ ಮುನ್ನ ಒಡಿಶಾ (152), ಕೇರಳ (126*), ರೈಲ್ವೇಸ್ (145*) ವಿರುದ್ಧವೂ ಶತಕ ಬಾರಿಸಿದ್ದರು.

ಸತತ ಶತಕಗಳ ದಾಖಲೆ

ಕ್ರಿಕೆಟ್‌ ಪಂದ್ಯದಲ್ಲಿ ಅತೀ ಹೆಚ್ಚು ಶತಕಗಳನ್ನು (ನಿಯಮಿತ ಓವರ್‌ಗಳಲ್ಲಿ) ಬಾರಿಸಿದ ದಾಖಲೆ ಶ್ರೀಲಂಕಾದ ಕುಮಾರ ಸಂಗಕ್ಕಾರ ಅವರ ಹೆಸರಿನಲ್ಲಿದೆ. ಸಂಗಕ್ಕಾರ ಅವರು 2015ರ ವಿಶ್ವಕಪ್‌ನಲ್ಲಿ ಸತತ ಐದು ಶತಕಗಳನ್ನು ಬಾರಿಸಿದ್ದರು. ಅದು ಬಿಟ್ಟರೆ ದಕ್ಷಿಣ ಆಫ್ರಿಕಾದ ಅಲ್ವಿರೋ ಪೀಟರ್ಸನ್ ಅವರು 2015-16ರ 'ಮೊಮೆಂಟಮ್' ಒನ್‌ ಡೇ ಕಪ್‌ ಟೂರ್ನಿಯಲ್ಲಿ ಸತತ ನಾಲ್ಕು ಶತಕಗಳನ್ನು ಬಾರಿಸಿದ್ದರು. ಅಂದ್ಹಾಗೆ ಈ ಬಾರಿಯ ಐಪಿಎಲ್‌ನಲ್ಲಿ ಪಡಿಕ್ಕಲ್ ಆರ್‌ಸಿಬಿ ತಂಡದಲ್ಲಿ ಹೆಚ್ಚು ನಿರೀಕ್ಷೆ ಮೂಡಿಸಿದ್ದಾರೆ.