ಕ್ರಿಕೆಟ್‌ನಿಂದ ನಿವೃತ್ತಿ ಬಳಿಕ ಧೋನಿ ಏನ್ಮಾಡ್ತಾರೆ ಗೊತ್ತಾ?

ಹೊಸದಿಲ್ಲಿ, ಮೇ 20: ಟೀಮ್‌ ಇಂಡಿಯಾದ ಮಾಜಿ ನಾಯಕ ಕ್ಯಾಪ್ಟನ್‌ ಕೂಲ್‌ ನಾಯಕ ಎಂ.ಎಸ್‌ ಧೋನಿ ತಮ್ಮ ವೃತ್ತಿ ಜೀವನದ ಕೊನೆಯ ವಿಶ್ವಕಪ್‌ ಟೂರ್ನಿಯನ್ನಾಡಲುಸಜ್ಜಾಗಿದ್ದಾರೆ.

ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಆತಿಥ್ಯದಲ್ಲಿ ಮೇ 30ರಂದು ಆರಂಭವಾಗಲಿರುವ ಏಕದಿನ ಕ್ರಿಕೆಟ್‌ ವಿಶ್ವಕಪ್‌ನ 12ನೇ ಆವೃತ್ತಿ ನಂತರ ಧೋನಿ ಏಕದಿನ ಕ್ರಿಕೆಟ್‌ನಿಂದ ನಿವೃತ್ತಿ ಹೊಂದುತ್ತಾರೆಂಬುದು ಬಹುತೇಕರ ಅಭಿಪ್ರಾಯ. ಅಂದಹಾಗೆ ಧೋನಿ ನಿವೃತ್ತಿ ಬಳಿಕ ಏನ್ಮಾಡ್ತಾರೆ? ಎಂಬ ಚರ್ಚೆಗಳು ಈಗಾಗಲೇ ಶುರುವಾಗಿದೆ. ಇದೀಗ ಈ ಚರ್ಚೆಗೆ ಧೋನಿಯೇ ತುಪ್ಪ ಸುರಿದಿದ್ದು, ನಿವೃತ್ತಿ ನಂತರದ ದಿನಗಳಲ್ಲಿ ಮಾಡುವುದಾದರೂ ಏನು ಎಂಬುದರ ಸುಳಿವನ್ನು ನೀಡಿದ್ದಾರೆ.

ಸಮಾಜಿಕ ಜಾಲತಾಣಗಳಲ್ಲಿ ವಿಡಿಯೊ ಒಂದು ವೈರಲ್‌ ಆಗಿದ್ದು, ಧೋನಿ ತಮ್ಮೊಳಗಿನ ಕಲೆಗಾರನನ್ನು ಅನಾವರಣ ಪಡಿಸಿದ್ದಾರೆ. ಈ ವಿಡಿಯೊದಲ್ಲಿ ಧೋನಿ ತಾವು ರಚಿಸಿರುವ ಪೇಂಟಿಂಗ್‌ (ಚಿತ್ರಕಲೆ)ಗಳನ್ನು ಪ್ರದರ್ಶಿಸಿದ್ದಾರೆ. ಅಲ್ಲದೆ ಬಾಲ್ಯದಿಂದಲೂ ತಮಗೆ ಕಲೆಗಾರನಾಗುವ ಅತೀವ ಆಸೆಯಿತ್ತು ಎಂದು ಹೇಳಿಕೊಂಡಿದ್ದಾರೆ.

ವಿಡಿಯೊದಲ್ಲಿ ನೂತನ ಹೇರ್‌ ಸ್ಟೈಲ್‌ ಮೂಲಕ ಮಿಂಚಿರುವ 37 ವರ್ಷದ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ಧೋನಿ, "ನಿಮ್ಮೆಲ್ಲರೊಂದಿಗೆ ಒಂದು ರಹಸ್ಯವನ್ನು ಹಂಚಿಕೊಳ್ಳಬೇಕೆಂದಿದ್ದೇನೆ. ನನ್ನ ಬಾಲ್ಯದಿಂದಲೂ ನಾನು ಕಲೆಗಾರನಾಗಬೇಕೆಂದಿದ್ದೆ. ಇದೀಗ ಕ್ರಿಕೆಟ್‌ ಆಡಿದ್ದು ಸಾಕಾಗಿದೆ. ಇದೀಗ ನಾನು ಏನು ಮಾಡಬೇಕೆಂದು ಬಯಸಿದ್ದೆನೋ ಅದನ್ನು ಮಾಡುವ ಕಾಲ ಬಂದಿದೆ. ಹೀಗಾಗಿ ಕೆಲ ಪೇಂಟಿಂಗ್‌ಗಳನ್ನು ಮಾಡಿದ್ದೇನೆ,'' ಎಂದು ಹೇಳಿದ್ದಾರೆ.

ಇದರೊಂದಿಗೆ ವಿಶ್ವಕಪ್‌ ಬಳಿಕ ಧೋನಿ 50 ಓವರ್‌ಗಳಿಗೆ ಗುಡ್‌ ಬೈ ಹೇಳುವುದು ಬಹುತೇಕ ಖಾತ್ರಿಯಾದಂತಿದೆ. 2011ರಲ್ಲಿ ಭಾರತಕ್ಕೆ ಏಕದಿನ ಕ್ರಿಕೆಟ್‌ ವಿಶ್ವಕಪ್‌ ಗೆದ್ದುಕೊಟ್ಟ ಧೋನಿ, ಒಡಿಐನಲ್ಲಿ 341 ಪಂದ್ಯಗಳಿಂದ 10,500 ರನ್‌ಗಳನ್ನು ಗಳಿಸಿದ್ದಾರೆ. ಇದರಲ್ಲಿ 10 ಶತಕಗಳು ಮತ್ತು 71 ಅರ್ಧಶತಕಗಳು ಸೇರಿವೆ. 2014ರಲ್ಲಿ ಆಸ್ಟ್ರೇಲಿಯಾ ಪ್ರವಾಸ ಮಧ್ಯದಲ್ಲೇ ಧೋನಿ ಟೆಸ್ಟ್‌ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿದ್ದರು.