ಟಿ20 ಕ್ರಿಕೆಟ್‌ನಲ್ಲಿ ವಿಂಡೀಸ್ ಆಲ್ ರೌಂಡರ್ ಡ್ವೇನ್ ಬ್ರಾವೋ ವಿಶಿಷ್ಠ ದಾಖಲೆ

ಸಿಪಿಎಲ್‌ನಲ್ಲಿ 100 ವಿಕೆಟ್

ಸೇಂಟ್ ಲೂಸಿಯಾ ಝೌಕ್ಸ್ ಆರಂಭಿಕ ಬ್ಯಾಟ್ಸ್‌ಮನ್ ರಹಕೀಮ್ ಕಾರ್ನ್‌ವಾಲ್ (18 ರನ್) ವಿಕೆಟ್ ಮುರಿಯುವುದರೊಂದಿಗೆ ಬ್ರಾವೋ ಟಿ20ಯಲ್ಲಿ 500 ವಿಕೆಟ್ ಮೈಲಿಗಲ್ಲು ನೆಟ್ಟಿದ್ದಾರೆ. ಅಷ್ಟೇ ಅಲ್ಲ, ಸಿಪಿಎಲ್‌ನಲ್ಲಿ 100 ವಿಕೆಟ್ ಪಡೆದ ಮೊದಲ ಬೌಲರ್ ಆಗಿಯೂ ಬ್ರಾವೋ ಗುರುತಿಸಿಕೊಂಡಿದ್ದಾರೆ.

ದ್ವಿತೀಯ ಸ್ಥಾನದಲ್ಲಿ ಮಾಲಿಂಗ

ಬ್ರಾವೋ ಬಿಟ್ಟರೆ ಟಿ20 ಮಾದರಿಯಲ್ಲಿ 400 ವಿಕೆಟ್ ಕೂಡ ಪಡೆದ ಬೌಲರ್‌ಗಳಿಲ್ಲ. ಬ್ರಾವೋ ಬಳಿಕ ಶ್ರೀಲಂಕಾ ವೇಗಿ ಲಸಿತ್ ಮಾಲಿಂಗ ದ್ವಿತೀಯ ಸ್ಥಾನದಲ್ಲಿದ್ದಾರೆ. ಮಾಲಿಂಗ ಟಿ20 ಕ್ರಿಕೆಟ್ ಮಾದರಿಯಲ್ಲಿ 390 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಅಂತಾರಾಷ್ಟ್ರೀಯ ಟಿ20ಯಲ್ಲಿ 71 ಪಂದ್ಯಗಳಲ್ಲಿ 59 ವಿಕೆಟ್‌ ಸಾಧನೆ ಬ್ರಾವೋ ಹೊಂದಿದ್ದಾರೆ.

ಸಿಪಿಎಲ್, ಐಪಿಎಲ್ ಎರಡರಲ್ಲೂ ಯಶಸ್ವಿ

36ರ ಹರೆಯದ ಡ್ವೇನ್ ಬ್ರಾವೋ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಪ್ರತಿನಿಧಿಸುತ್ತಿದ್ದಾರೆ. ಐಪಿಎಲ್‌ನಲ್ಲೂ ಯಶಸ್ವಿ ಬೌಲರ್ ಎನಿಸಿರುವ ಬ್ರಾವೋ 118 ವಿಕೆಟ್ ಮುರಿದಿದ್ದಾರೆ. ಐಪಿಎಲ್‌ನಲ್ಲಿ ಸಿಎಸ್‌ಕೆ ಪ್ರತಿನಿಧಿಸಿ, ಸಿಪಿಎಲ್‌ನಲ್ಲಿ ಟಿಕೆಆರ್‌ ಪ್ರತಿನಿಧಿಸಿ 3 ಬಾರಿ ಟ್ರೋಫಿ ಗೆದ್ದ ಹಿರಿಮೆ ಬ್ರಾವೋ ಅವರದ್ದು.

ಬ್ರಾವೋ ವೇಗದ ದಾಖಲೆಗಳು

ಚುಟುಕು ಮಾದರಿ ಕ್ರಿಕೆಟ್ ಟಿ20ಯಲ್ಲಿ 300, 400 ಮತ್ತು 500 ವಿಕೆಟ್‌ಗಳನ್ನು ವೇಗವಾಗಿ ಪಡೆದ ದಾಖಲೆಯೂ ಬ್ರಾವೋ ಹೆಸರಿನಲ್ಲಿದೆ. ಇನ್ನು ಹೆಚ್ಚು ಟಿ20 ಕ್ರಿಕೆಟ್ ಪಂದ್ಯಗಳಲ್ಲಿ ಪಾಲ್ಗೊಂಡ ದಾಖಲೆ ಪರಿಗಣಿಸಿದರೆ ಬ್ರಾವೋ ದ್ವಿತೀಯ ಸ್ಥಾನ ಪಡೆಯುತ್ತಾರೆ. ಮೊದಲ ಸ್ಥಾನದಲ್ಲಿ ವೆಸ್ಟ್ ಇಂಡೀಸ್ ಮತ್ತೊಬ್ಬ ಅನುಭವಿ ಕೀರನ್ ಪೊಲಾರ್ಡ್ ಬರುತ್ತಾರೆ.