Joe Root: ಬ್ರಿಯಾನ್ ಲಾರಾ ದಾಖಲೆ ಹಿಂದಿಕ್ಕಿ, ತೆಂಡೂಲ್ಕರ್ ಸಾರ್ವಕಾಲಿಕ ದಾಖಲೆ ಸಮೀಪಿಸಿದ ಜೋ ರೂಟ್

ಶನಿವಾರ, ಜುಲೈ 27ರಂದು ಇಂಗ್ಲೆಂಡ್‌ನ ಜೋ ರೂಟ್ ಅವರು ಟೆಸ್ಟ್ ಕ್ರಿಕೆಟ್‌ನಲ್ಲಿ ವೆಸ್ಟ್ ಇಂಡೀಸ್ ಲೆಜೆಂಡ್ ಬ್ರಿಯಾನ್ ಲಾರಾ ಅವರ ದಾಖಲೆಯನ್ನು ಹಿಂದಿಕ್ಕಿದ್ದಾರೆ.

ಬರ್ಮಿಂಗ್ಹ್ಯಾಮ್‌ನಲ್ಲಿ ನಡೆದ ಇಂಗ್ಲೆಂಡ್ ಮತ್ತು ವೆಸ್ಟ್ ಇಂಡೀಸ್ ನಡುವಿನ ಮೂರನೇ ಟೆಸ್ಟ್‌ ಪಂದ್ಯದ 2ನೇ ದಿನದ ಮೊದಲ ಸೆಷನ್‌ನಲ್ಲಿ ಬಲಗೈ ಬ್ಯಾಟರ್ ಅದ್ಭುತ ಸಾಧನೆ ಮಾಡಿದರು.

ಈ ಮೂಲಕ ಇಂಗ್ಲೆಂಡ್‌ನ ಸ್ಟಾರ್ ಬ್ಯಾಟರ್ ಜೋ ರೂಟ್ ಟೆಸ್ಟ್ ಕ್ರಿಕೆಟ್‌ನಲ್ಲಿ ವೆಸ್ಟ್ ಇಂಡೀಸ್ ಲೆಜೆಂಡ್ ಬ್ರಿಯಾನ್ ಲಾರಾ ಅವರ ರನ್‌ಗಳ ದಾಖಲೆಯನ್ನು ಹಿಂದಿಕ್ಕಿ 7ನೇ ಸ್ಥಾನಕ್ಕೇರಿದರು.

ಬ್ರಿಯಾನ್ ಲಾರಾ ಅವರ ವೃತ್ತಿಜೀವನದ ಒಟ್ಟು ಮೊತ್ತವಾದ 11,953 ರನ್‌ಗಳಿಗೆ ಕೇವಲ 14 ರನ್‌ಗಳ ಅಂತರದಲ್ಲಿ ಮೂರನೇ ಪಂದ್ಯವನ್ನು ಪ್ರವೇಶಿಸಿದ ಜೋ ರೂಟ್, ಮೊದಲ ದಿನದ ಸ್ಟಂಪ್‌ನಲ್ಲಿ ಅಜೇಯ 2 ರನ್‌ಗಳೊಂದಿಗೆ ಎರಡನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದರು.

ಇಂಗ್ಲೆಂಡ್‌ನ ಮೊದಲ ಇನ್ನಿಂಗ್ಸ್‌ನ 14ನೇ ಓವರ್‌ನಲ್ಲಿ ಜೇಡನ್ ಸೀಲ್ಸ್ ಅವರ ಎಸೆತವನ್ನು ಜೋ ರೂಟ್ ಅದ್ಭುತವಾಗಿ ನಡ್ಜ್ ಮಾಡಿ ಬ್ರಿಯಾನ್ ಲಾರಾ ಅವರ ರನ್‌ಗಳನ್ನು ಮೀರಿಸಿದರು. ಇದು ಅವರ ಪ್ರಸಿದ್ಧ ವೃತ್ತಿಜೀವನದಲ್ಲಿ ಮತ್ತೊಂದು ಮಹತ್ವದ ಸಾಧನೆಯನ್ನು ಗುರುತಿಸಿತು.

ವೆಸ್ಟ್ ಇಂಡೀಸ್‌ನ ಮಾಜಿ ನಾಯಕ ಲಾರಾ ಅವರು 131 ಪಂದ್ಯಗಳು ಮತ್ತು 232 ಇನ್ನಿಂಗ್ಸ್‌ಗಳಿಂದ 11,953 ಟೆಸ್ಟ್ ರನ್‌ಗಳೊಂದಿಗೆ ತಮ್ಮ ಪ್ರಸಿದ್ಧ ಅಂತಾರಾಷ್ಟ್ರೀಯ ವೃತ್ತಿಜೀವನವನ್ನು ಪೂರ್ಣಗೊಳಿಸಿದ್ದಾರೆ.

ಜೋ ರೂಟ್ ಇದೀಗ ತಮ್ಮ 143ನೇ ಟೆಸ್ಟ್ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್‌ ಲೆಜೆಂಡ್‌ನನ್ನು ಹಿಂದಿಕ್ಕಿದ್ದಾರೆ. ಅದು ಅವರ 261ನೇ ಇನ್ನಿಂಗ್ಸ್ ಆಗಿದೆ.

ಜೋ ರೂಟ್ ಅವರು ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಸಚಿನ್ ತೆಂಡೂಲ್ಕರ್, ರಿಕಿ ಪಾಂಟಿಂಗ್, ಜಾಕ್ವೆಸ್ ಕಾಲಿಸ್, ರಾಹುಲ್ ದ್ರಾವಿಡ್, ಅಲಸ್ಟೈರ್ ಕುಕ್ ಮತ್ತು ಕುಮಾರ್ ಸಂಗಕ್ಕಾರ ಅವರ ನಂತರದ ಸ್ಥಾನದಲ್ಲಿದ್ದಾರೆ.

ಸಚಿನ್ ತೆಂಡೂಲ್ಕರ್ ದಾಖಲೆ ಸಮೀಪಿಸಿದ ಜೋ ರೂಟ್

ಭಾರತದ ದಿಗ್ಗಜ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಅವರು ಟೆಸ್ಟ್ ಕ್ರಿಕೆಟ್‌ನಿಂದ ನಿವೃತ್ತರಾದಾಗ, ವಿಶ್ವದ ಯಾವುದೇ ಆಟಗಾರನು ಟೆಸ್ಟ್ ಸ್ವರೂಪದಲ್ಲಿ 15,921 ರನ್ ಗಳಿಸಿದ ಮಹಾನ್ ವಿಶ್ವದಾಖಲೆಯ ಮೊತ್ತವನ್ನು ಮೀರಿಸುತ್ತಾರೆ ಎಂದು ಯಾರೂ ನಂಬಿರಲಿಲ್ಲ.

ಆದರೆ ಇದೀಗ, ಜೋಸೆಫ್ ಎಡ್ವರ್ಡ್ ರೂಟ್ ಅಥವಾ ಜೋ ರೂಟ್ ಎಂದು ಕರೆಯಲ್ಪಡುವ ಇಂಗ್ಲೆಂಡ್ ಬ್ಯಾಟರ್, ಸಾರ್ವಕಾಲಿಕ ದಾಖಲೆಯನ್ನು ಹಿಂದಿಕ್ಕಲು ಸಮೀಪಿಸಿದ್ದಾರೆ.

ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರು

ಸಚಿನ್ ತೆಂಡೂಲ್ಕರ್ - 200 ಪಂದ್ಯ - 15,921 ರನ್‌ಗಳು
ರಿಕಿ ಪಾಂಟಿಂಗ್ - 168 ಪಂದ್ಯ - 13,378 ರನ್‌ಗಳು
ಜಾಕ್ವೆಸ್ ಕಾಲಿಸ್ - 166 ಪಂದ್ಯ - 13,289 ರನ್‌ಗಳು
ರಾಹುಲ್ ದ್ರಾವಿಡ್ - 164 ಪಂದ್ಯ - 13,288 ರನ್‌ಗಳು
ಅಲಸ್ಟೇರ್ ಕುಕ್ - 161 ಪಂದ್ಯ - 12,472 ರನ್‌ಗಳು
ಕುಮಾರ ಸಂಗಕ್ಕಾರ - 134 ಪಂದ್ಯ - 12,400 ರನ್‌ಗಳು
ಜೋ ರೂಟ್ - 143 ಪಂದ್ಯ - 11,990 ರನ್‌ಗಳು
ಬ್ರಿಯಾನ್ ಲಾರಾ - 131 - 11,953 ರನ್‌ಗಳು

ಸಚಿನ್ ತೆಂಡೂಲ್ಕರ್ ರನ್ ದಾಖಲೆ ಹಿಂದಿಕ್ಕುತ್ತಾರಾ ಜೋ ರೂಟ್?

ಪ್ರಸ್ತುತ ಬ್ಯಾಟರ್‌ಗಳಲ್ಲಿ ಜೋ ರೂಟ್ ಬಹುಶಃ ಯೋಚಿಸಲಾಗದಂತಹದನ್ನು ಮಾಡಬಹುದು. ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಸಚಿನ್ ತೆಂಡೂಲ್ಕರ್ ಅವರ ಸಂಖ್ಯೆಯನ್ನು ಮುರಿಯಬಹುದು.

33 ವರ್ಷದ ಜೋ ರೂಟ್ ಅತ್ಯಂತ ವಿಶ್ವಾಸಾರ್ಹ ಇಂಗ್ಲೆಂಡ್ ಆಟಗಾರ. ಅವರು ವರ್ಷಕ್ಕೆ ಸುಮಾರು 10 ಟೆಸ್ಟ್‌ಗಳನ್ನು ಆಡಿದರೆ ಇನ್ನೂ 4 ವರ್ಷಗಳಲ್ಲಿ ಇನ್ನೂ 40 ಟೆಸ್ಟ್‌ಗಳನ್ನು ಆಡಬಹುದು.

ಜೋ ರೂಟ್ ಅವರು ಸಚಿನ್ ತೆಂಡೂಲ್ಕರ್‌ ಅವರಿಂದ ಕೇವಲ 4000 ರನ್‌ಗಳ ಅಂತರದಲ್ಲಿದ್ದಾರೆ ಮತ್ತು ಅವರು ಸಾರ್ವಕಾಲಿಕ ಹೆಗ್ಗುರುತನ್ನು ಸುಲಭವಾಗಿ ಮುರಿಯಬಹುದು.