ಇಂಗ್ಲೆಂಡ್ vs ಆಸಿಸ್: ಚೇತರಿಸಿಕೊಂಡ ಸ್ಟೀವ್ ಸ್ಮಿತ್ 2ನೇ ಏಕದಿನಕ್ಕೆ ಲಭ್ಯ

ಅಭ್ಯಾಸದಲ್ಲಿ ತಲೆಗೆ ಏಟು

ಶುಕ್ರವಾರ ನಡೆದ ಮೊದಲ ಏಕದಿನ ಪಂದ್ಯಕ್ಕೆ ಮುನ್ನದಿನ ನಡೆದ ಅಭ್ಯಾಸದ ವೇಳೆ ಕೋಚಿಂಗ್ ಸಿಬ್ಬಂದಿ ಸದಸ್ಯರ ಎಸೆತ ಬ್ಯಾಟಿಂಗ್ ಅಭ್ಯಾಸದಲ್ಲಿ ತೊಡಗಿದ್ದ ಸ್ಮಿತ್ ತಲೆಗೆ ಬಡಿದಿತ್ತು. ಹೀಗಾಗಿ ಶುಕ್ರವಾರ ನಡೆದ ಪಂದ್ಯದಿಂದ ಅಂತಿಮ ಹಂತದಲ್ಲಿ ಹಿಂದಕ್ಕೆ ಸರಿದಿದ್ದರು. ಈ ಪಂದ್ಯವನ್ನು ಆಸ್ಟ್ರೇಲಿಯಾ 19 ರನ್‌ಗಳಿಂದ ಗೆದ್ದುಕೊಂಡಿದ್ದು 3 ಪಂದ್ಯಗಳ ಸರಣಿಯನ್ನು 1-0 ಅಂತರದಿಂದ ಮುನ್ನಡೆಪಡೆದುಕೊಂಡಿದೆ.

ಮುಂಜಾಗ್ರತಾ ಕ್ರಮವಾಗಿ ಹಿಂದಕ್ಕೆ ಸರಿದಿದ್ದ ಸ್ಮಿತ್

31 ವರ್ಷದ ಸ್ಟೀವ್ ಸ್ಮಿತ್ ಮುಂಜಾಗ್ರತಾ ಕ್ರಮವಾಗಿ ಮೊದಲ ಪಂದ್ಯದಿಂದ ಹಿಂದಕ್ಕೆ ಸರಿದಿದ್ದರು. ಈ ಮಧ್ಯೆ ಶುಕ್ರವಾರ ಹಾಗೂ ಶನಿವಾರದಂದು ಸ್ಟೀವ್ ಸ್ಮಿತ್ ಎರಡು ಕನ್ಕ್ಯುಶನ್ ಪರೀಕ್ಷೆಗೆ(ತಲೆಗೆ ಏಟಾದ ಸಂದರ್ಭದಲ್ಲಿ ಮೆದುಳಿನ ಕಾರ್ಯಾಚರಣೆ ತಿಳಿಯುವ ಪರೀಕ್ಷೆ ) ಒಳಪಟ್ಟಿದ್ದರು. ಎರಡರಲ್ಲೂ ಸಕಾರಾತ್ಮಕ ವರದಿ ಬಂದಿದೆ ಎಂದು cricket.com.au ತಿಳಿಸಿದೆ.

ಕಳೆದ ಆ್ಯಶಸ್‌ನಲ್ಲೂ ಸ್ಮಿತ್‌ಗೆ ಏಟು

ಸ್ಟೀವ್ ಸ್ಮಿತ್ ಕಳೆದ ಬಾರಿ ಲಾರ್ಡ್ಸ್‌ನಲ್ಲಿ ನಡೆದ ಆ್ಯಶಸ್ ಟೆಸ್ಟ್ ಪಂದ್ಯದಲ್ಲೂ ತಲೆಗೆ ಏಟು ತಿಂದಿದ್ದರು. ಪಂದ್ಯದ ವೇಲೆ ವೇಗಿ ಜೋಫ್ರಾ ಆರ್ಚರ್ ಎಸೆತ ನೇರವಾಗಿ ಸ್ಮಿತ್ ತಲೆಗೆ ಬಡಿದ ಪರಿಣಾಮ ಎರಡನೇ ಇನ್ನಿಂಗ್ಸ್‌ನಲ್ಲಿ ಸ್ಮಿತ್ ಕಣಕ್ಕಿಳಿದಿರಲಿಲ್ಲ. ಬಳಿಕ ಮುಂದಿನ ಪಂದ್ಯದಿಂದಲೂ ಸ್ಮಿತ್ ಹೊರಗುಳಿದಿದ್ದರು.