Euro 2024 Awards: ಪ್ರಶಸ್ತಿ ವಿಜೇತರ ಸಂಪೂರ್ಣ ಪಟ್ಟಿ, ಬಹುಮಾನ ಮೊತ್ತದ ವಿವರ

2024ರ ಯುಇಎಫ್ಎ ಯುರೋ ಪಂದ್ಯಾವಳಿಯು ಯುರೋಪ್‌ನ ಅತಿದೊಡ್ಡ ಫುಟ್ಬಾಲ್ ಪಂದ್ಯಾವಳಿಯಾಗಿದ್ದು, ಯುರೋಪ್‌ನ 24 ಗಣ್ಯ ರಾಷ್ಟ್ರಗಳ ನಡುವೆ ಸುಮಾರು ಒಂದು ತಿಂಗಳ ಕಾಲ ನಡೆದ ರೋಚಕ ಪಂದ್ಯಗಳ ನಂತರ ಭಾನುವಾರ, ಜುಲೈ 14ರಂದು ಕೊನೆಗೊಂಡಿತು.

ಯುರೋಪ್‌ನ ಬೃಹತ್ ಫುಟ್ಬಾಲ್ ಪಂದ್ಯಾವಳಿಯು ಸ್ಪೇನ್ ಮತ್ತು ಇಂಗ್ಲೆಂಡ್ ನಡುವಿನ ಹೈ--ವೋಲ್ಟೇಜ್ ಫೈನಲ್‌ ಪಂದ್ಯದೊಂದಿಗೆ ಮುಕ್ತಾಯಗೊಂಡಿತು. ಫೈನಲ್‌ನಲ್ಲಿ ಇಂಗ್ಲೆಂಡ್ ತಂಡನ್ನು 2-1 ಅಂತರದ ಗೋಲುಗಳಿಂದ ಸೋಲಿಸುವ ಮೂಲಕ ಸ್ಪೇನ್ ಇತಿಹಾಸ ಮರುಸೃಷ್ಟಿಸಿತು.

ಸ್ಪೇನ್ ಯುರೋ ಇತಿಹಾಸದಲ್ಲಿ ನಾಲ್ಕನೇ ಬಾರಿಗೆ ಚಾಂಪಿಯನ್ ಪಟ್ಟಕ್ಕೇರಿತು. ಇದು ಕಳೆದ ಐದು ಆವೃತ್ತಿಗಳಲ್ಲಿ ಸ್ಪೇನ್‌ಗೆ ಮೂರನೇ ಯುರೋ ಪ್ರಶಸ್ತಿಯಾಗಿದ್ದು, 2012ರಲ್ಲಿ ಯುರೋ ಗೆದ್ದ ನಂತರ ಸ್ಪೇನ್‌ಗೆ ಯುರೋಪಿಯನ್ ವಿಜಯೋತ್ಸವದ ವೈಭವವು 12 ವರ್ಷಗಳ ನಂತರ ಬಂದಿದೆ.

ಕೋಲ್ ಪಾಲ್ಮರ್ ಅವರ ಗೋಲಿನ ಮೂಲಕ ಇಂಗ್ಲೆಂಡ್ ಸಮಬಲ ಸಾಧಿಸುವ ಮೊದಲು, ನಿಕೊ ವಿಲಿಯಮ್ಸ್ ಸ್ಪೇನ್‌ಗೆ ಗೋಲಿನ ಖಾತೆ ತೆರೆದರು. ಆದರೆ ಮೈಕೆಲ್ ಒಯಾರ್ಜಾಬಲ್ 86ನೇ ನಿಮಿಷದಲ್ಲಿ ಗೋಲು ಬಾರಿಸಿ ಸ್ಪೇನ್‌ಗೆ ಯುರೋ ಗೆದ್ದುಕೊಟ್ಟರು.

ಫೈನಲ್ ಪಂದ್ಯದ ನಂತರ, ಯುರೋ ಪಂದ್ಯಾವಳಿಯ ಅಗ್ರ ಆಟಗಾರರಿಗೆ ಅನೇಕ ವೈಯಕ್ತಿಕ ಮತ್ತು ತಂಡ ಪ್ರಶಸ್ತಿಗಳನ್ನು ನೀಡಲಾಯಿತು.

ಪಂದ್ಯಾವಳಿಯ ಅಗ್ರ ಮೂರು ಗೋಲು ಸ್ಕೋರರ್‌ಗಳಿಗೆ ಗೋಲ್ಡನ್ ಬೂಟ್, ಸಿಲ್ವರ್ ಬೂಟ್ ಮತ್ತು ಕಂಚಿನ ಬೂಟ್ ಸೇರಿದಂತೆ ಇತರ ಹಲವು ವೈಯಕ್ತಿಕ ಪ್ರಶಸ್ತಿಗಳನ್ನು ನೀಡಲಾಯಿತು. ಪಂದ್ಯಾವಳಿಯ ಅತ್ಯುತ್ತಮ ಕಿರಿಯ ಆಟಗಾರ ಪ್ರಶಸ್ತಿಯನ್ನೂ ಪಡೆದರು.

ಯುರೋ 2024ರ ಫೈನಲ್ ಪಂದ್ಯದ ಆಟಗಾರ: ನಿಕೊ ವಿಲಿಯಮ್ಸ್ (ಸ್ಪೇನ್)

ನಿಕೊ ವಿಲಿಯಮ್ಸ್ ಫೈನಲ್‌ನಲ್ಲಿ ಗೋಲು ಗಳಿಸಿದ ಬಳಿಕ, ಪಂದ್ಯ ಶ್ರೇಷ್ಠ ಆಟಗಾರ ಪ್ರಶಸ್ತಿ ಪಡೆದರು. ಸ್ಪ್ಯಾನಿಷ್ ಆಕ್ರಮಣಕಾರ ಇಂಗ್ಲೆಂಡ್ ವಿರುದ್ಧ ಅತ್ಯುತ್ತಮವಾಗಿ ಕಂಡುಬಂದರು.

ಯುರೋ 2024ರ ಪಂದ್ಯಾವಳಿಯ ಯುವ ಆಟಗಾರ: ಲ್ಯಾಮಿನ್ ಯಮಲ್ (ಸ್ಪೇನ್)

ಯುರೋ 2024ರ ಪಂದ್ಯಾವಳಿಯಲ್ಲಿ ಲ್ಯಾಮಿನ್ ಯಮಲ್ ಒಂದು ಗೋಲು ಗಳಿಸಿದರು ಮತ್ತು 4 ಅಸಿಸ್ಟ್‌ಗಳನ್ನು ಮಾಡಿದರು. 17 ವರ್ಷದ ಆಟಗಾರ ಹಲವಾರು ದಾಖಲೆಗಳನ್ನು ಮುರಿದರು ಮತ್ತು ಭವಿಷ್ಯದಲ್ಲಿ ಖಂಡಿತವಾಗಿ ಸ್ಟಾರ್ ಫುಟ್ಬಾಲಿಗನಾಗಲಿದ್ದಾರೆ.

ಯುರೋ 2024ರ ಪಂದ್ಯಾವಳಿ ಶ್ರೇಷ್ಠ ಆಟಗಾರ: ರೋಡ್ರಿ (ಸ್ಪೇನ್)

ರೋಡ್ರಿ ಅವರು ಸ್ಪೇನ್‌ ತಂಡಕ್ಕಾಗಿ ಮಿಡ್‌ಫೀಲ್ಡ್‌ನಲ್ಲಿ ಅವರ ಅದ್ಭುತ ಪ್ರದರ್ಶನದ ನಂತರ, ಪಂದ್ಯಾವಳಿ ಶ್ರೇಷ್ಠ ಆಟಗಾರ ಪ್ರಶಸ್ತಿಯನ್ನು ಗೆದ್ದರು. ಮ್ಯಾನ್ ಸಿಟಿ ಆಟಗಾರ ಫೈನಲ್‌ನಲ್ಲಿ ಗಾಯದ ಕಾರಣದಿಂದ ಹಾಫ್‌ಟೈಮ್‌ನಲ್ಲಿ ಹೊರಗುಳಿದರೂ, ಪ್ರಶಸ್ತಿಗೆ ಭಾಜನರಾದರು.

ಯುರೋ 2024ರ ಗೋಲ್ಡನ್ ಬೂಟ್ ವಿಜೇತರು

ಇಂಗ್ಲೆಂಡ್ ಮತ್ತು ಸ್ಪೇನ್ ನಡುವಿನ ಫೈನಲ್ ಪಂದ್ಯವು ಟ್ರೋಫಿಯ ಸ್ಪಷ್ಟ ವಿಜೇತರನ್ನು ಉತ್ಪಾದಿಸಲು ವಿಫಲವಾಯಿತು. ಆರು ಆಟಗಾರರ ನಡುವೆ ಯುರೋ 2024ರ ಗೋಲ್ಡನ್ ಬೂಟ್ ಹಂಚಿಕೊಳ್ಳುತ್ತಾರೆ ಎಂದು UEFA ಹೇಳಿದೆ. ಪಂದ್ಯಾವಳಿಯಲ್ಲಿ ಆರು ಆಟಗಾರರು ತಲಾ ಮೂರು ಗೋಲುಗಳನ್ನು ಗಳಿಸಿದರು ಮತ್ತು ಎಲ್ಲರಿಗೂ ಗೋಲ್ಡನ್ ಬೂಟ್ ನೀಡಲಾಯಿತು.

ಗೋಲ್ಡನ್ ಬೂಟ್ ವಿಜೇತರು - ಕೋಡಿ ಗಕ್ಪೊ (ನೆದರ್ಲ್ಯಾಂಡ್ಸ್), ಹ್ಯಾರಿ ಕೇನ್ (ಇಂಗ್ಲೆಂಡ್), ಡ್ಯಾನಿ ಓಲ್ಮೊ (ಸ್ಪೇನ್), ಜಮಾಲ್ ಮುಸಿಯಾಲಾ (ಜರ್ಮನಿ), ಇವಾನ್ ಸ್ಕ್ರಾನ್ಜ್ (ಸ್ಲೋವಾಕಿಯಾ) ಮತ್ತು ಜಾರ್ಜಸ್ ಮಿಕೌಟಾಡ್ಜೆ (ಜಾರ್ಜಿಯಾ).

ಯುರೋ 2024: ಸ್ಪೇನ್ ಮತ್ತು ಇಂಗ್ಲೆಂಡ್ ಬಹುಮಾನ ಮೊತ್ತ

ಸ್ಪೇನ್: 28.25 ಯುರೋ ಮಿಲಿಯನ್
ಇಂಗ್ಲೆಂಡ್: 24.25 ಯುರೋ ಮಿಲಿಯನ್