ವಿಶ್ವಕಪ್‌ಗೆ ಮುನ್ನ, ಬಳಿಕ ಐಸೊಲೇಶನ್‌ನಲ್ಲಿರಿ: ಫಾ ಡು ಪ್ಲೆಸಿಸ್ ಸಲಹೆ

ಕೇಪ್‌ಟೌನ್, ಮೇ 14: ಟಿ20 ವಿಶ್ವಕಪ್‌ಗೂ ಮುನ್ನ ಮತ್ತು ಬಳಿಕ ಆಟಗಾರರು ಐಸೊಲೇಶನ್ ಪಾಲಿಸುವಂತೆ ದಕ್ಷಿಣ ಆಫ್ರಿಕಾ ಕ್ರಿಕೆಟರ್ ಫಾ ಡು ಪ್ಲೆಸಿಸ್ ಸಲಹೆ ನೀಡಿದ್ದಾರೆ. ವಿಶ್ವಕಪ್‌ ವೇಳೆ ಅಪಾಯ ತಪ್ಪಿಸುವುದಕ್ಕಾಗಿ ಡು ಪ್ಲೆಸಿಸ್ ಈ ಸಲಹೆ ನೀಡಿದ್ದಾರೆ.

ಕೊರೊನಾವೈರಸ್ ಭೀತಿಗೆ ವಿಶ್ವದಾದ್ಯಂತ ಎಲ್ಲಾ ಕ್ರಿಕೆಟ್ ಪಂದ್ಯಾಟಗಳು ರದ್ದು ಇಲ್ಲವೆ ಮುಂದೂಡಲ್ಪಟ್ಟಿವೆ. ಮಾರಕ ಸೋಂಕಿನಿಂದಾಗಿ ಜನಪ್ರಿಯ ಆಟ ಕ್ರಿಕೆಟ್‌ಗೆ ಕತ್ತಲೆಯ ಕಾರ್ಮೋಡ ಕವಿದಂತಾಗಿದೆ. ಸದ್ಯದ ವೇಳಾ ಪಟ್ಟಿಯ ಪ್ರಕಾರ ಅಕ್ಟೋಬರ್ ನವೆಂಬರ್‌ ಹೊತ್ತಿಗೆ ವಿಶ್ವಕಪ್‌ ಟೂರ್ನಿ ಆರಂಭಗೊಳ್ಳಲಿದೆ.

ವಿಶ್ವಕಪ್ ಟೂರ್ನಿಯ ಸಲುವಾಗಿ ಆಸ್ಟ್ರೇಲಿಯಾಕ್ಕೆ ಪ್ರವಾಸ ಕೈಗೊಳ್ಳುವ ಆಟಗಾರರು ಎರಡು ವಾರಗಳ ಕಾಲ ಪ್ರತ್ಯೇಕತೆ (ಐಸೊಲೇಶನ್) ಪಾಲಿಸಿ, ಟೂರ್ನಿ ಮುಗಿದ ಬಳಿಕವೂ ಐಸೊಲೇಶನ್ ಪಾಲಿಸುವಂತೆ ಫಾ ಡು ಪ್ಲೆಸಿಸ್ ಹೇಳಿದ್ದಾರೆ.

'ನನಗೆ ಖಾತರಿಯಿಲ್ಲ. ಆದರೆ ಈಗಿನ ಪರಿಸ್ಥಿಯಂತೆ ವಿದೇಶಕ್ಕೆ ಪ್ರವಾಸ ಕೈಗೊಳ್ಳುವುದು ಅನೇಕ ರಾಷ್ಟ್ರಗಳಿಗೆ ಸಮಸ್ಯೆ ತರಲಿದೆ. ಹೀಗಾಗಿ ಡಿಸೆಂಬರ್-ಜನವರಿ ವೇಳೆಗೆ ಪರಿಸ್ಥಿತಿ ಕೊಂಚ ತಿಳಿಯಾಗುವ ಬಗ್ಗೆ ಮಾತುಗಳು ಕೇಳಿಬರುತ್ತಿವೆ. ಏನೇ ಇರಲಿ, ಆಸ್ಟ್ರೇಲಿಯಾಕ್ಕೆ ತಲುಪಿದ 2 ವಾರಕ್ಕೆ ಮೊದಲು ಮತ್ತು ಟೂರ್ನಿಯ ಬಳಿಕ ಆಟಗಾರರು ಐಸೊಲೇಶನ್ ಪಾಲಿಸಬೇಕು,' ಎಂದು ಬಾಂಗ್ಲಾ ಕ್ರಿಕೆಟಿಗ ತಮೀಮ್ ಇಕ್ಬಾಲ್ ಜೊತೆ ಫೇಸ್ಬುಕ್ ಲೈವ್‌ನಲ್ಲಿ ಮಾತನಾಡುತ್ತ ಡು ಪ್ಲೆಸಿಸ್ ಹೇಳಿದ್ದಾರೆ.