ಕ್ಯಾಚಿಂಗ್ ಅಭ್ಯಾಸಕ್ಕೆ ಅಪ್ಪ ಸಹಾಯ ಮಾಡುತ್ತಿದ್ದಾರೆ: ವೃದ್ಧಿಮಾನ್ ಸಹಾ

ಕೋಲ್ಕತ್ತಾ, ಜೂನ್ 5: ದಕ್ಷಿಣ ಕೋಲ್ಕತ್ತಾದಲ್ಲಿರುವ ಟೀಮ್ ಇಂಡಿಯಾ ಬ್ಯಾಟ್ಸ್‌ಮನ್ ವೃದ್ಧಿಮಾನ್ ಸಹಾ ಅವರ ಮನೆಯಲ್ಲಿ ಇಬ್ಬರು ಅಪ್ಪಂದಿರಿದ್ದಾರೆ. ಒಂದು, ಇತ್ತೀಚೆಗಷ್ಟೇ ಗಂಡು ಮಗು ಅನ್ವೆಗೆ ಅಪ್ಪನಾಗಿರುವ ವೃದ್ಧಿಮಾನ್ ಸಹಾ ಮತ್ತು ಸಹಾ ತಂದೆ ಪ್ರಶಾಂತ. ಇಬ್ಬರೂ ಸದ್ಯ ಹೆತ್ತವರ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಭಾರತದ ಕೌಶಲಭರಿತ ವಿಕೆಟ್ ಕೀಪರ್‌ಗಳಲ್ಲಿ ಗುರುತಿಸಿಕೊಂಡಿರುವ ವೃದ್ಧಿಮಾನ್ ಸಹಾ, ಕೊರೊನಾ ವೈರಸ್ ಲಾಕ್‌ಡೌನ್ ಸಂದರ್ಭದಲ್ಲಿ ತನ್ನ ತಂದೆಯ ಸಹಾಯದೊಂದಿಗೆ ವಿಕೆಟ್ ಕೀಪಿಂಗ್ ಅಭ್ಯಾಸ ಮಾಡುತ್ತಿರುವುದಾಗಿ ಹೇಳಿಕೊಂಡಿದ್ದಾರೆ. ಕೋಲ್ಕತ್ತಾದ ಭವ್ಯ ಅಪಾರ್ಟ್‌ಮೆಂಟ್ 'ಸೌತ್ ಸಿಟಿ'ಯಲ್ಲಿ ಸದ್ಯ ಸಹಾ ಕುಟುಂಬ ವಾಸವಿದೆ.

'ಈ ಅಪಾರ್ಟ್‌ಮೆಂಟ್‌ನಲ್ಲಿದ್ದುಕೊಂಡು ಯಾವೆಲ್ಲ ದೈಹಿಕ ಅಭ್ಯಾಸಗಳನ್ನು ಮಾಡಲಾಗುತ್ತದೋ ಅವೆಲ್ಲವನ್ನೂ ನಾನು ಮಾಡುತ್ತಿದ್ದೇನೆ. ಕೀಪರ್‌ಗಳಿಗೆ ಕೈ ಮತ್ತು ಕಣ್ಣಿನ ಚಲನೆ, ಎರಡರ ಕೋಆರ್ಡಿನೇಶನ್ ಬಹುಮುಖ್ಯವಾಗಿರುತ್ತದೆ. ಹೀಗಾಗಿ ಸಾಫ್ಟ್‌ಬಾಲನ್ನು ಗೋಡೆಗೆ ಎಸೆದು ನಾನು ಕ್ಯಾಚಿಂಗ್ ಅಭ್ಯಾಸ ನಡೆಸುತ್ತಿದ್ದೇನೆ,' ಎಂದು ಪಿಟಿಐ ಜೊತೆ ಮಾತನಾಡಿದ ವೃದ್ಧಿಮಾನ್ ಸಹಾ ಹೇಳಿಕೊಂಡಿದ್ದಾರೆ.

'ಈ ಸಮಯದಲ್ಲಿ ಫ್ಲ್ಯಾಟ್‌ನ ಒಳಗೆ ನನಗೆ ನನ್ನ ತಂದೆ ಪ್ರಶಾಂತ ಸಹಾ ಕೂಡ ಕ್ಯಾಚಿಂಗ್ ಅಭ್ಯಾಸಕ್ಕೆ ಸಹಾಯ ಮಾಡುತ್ತಿದ್ದಾರೆ,' ಎಂದು ಸಹಾ ಹೇಳಿದರು. 'ಫ್ಲ್ಯಾಟ್‌ನ ಒಳಗೆ ನಿಮಗೆ ಕ್ಯಾಚಿಂಗ್ ಅಭ್ಯಾಸ ನಡೆಸುವಷ್ಟು ಜಾಗವಿದೆಯೇ ಎಂದು ಕೇಳಿದಾಗ, 'ಹೌದು, ನಾನು ಎರಡೂ ಬದಿಗೂ ಜಿಗಿದು ಕ್ಯಾಚ್ ಹಿಡಿಯಬಲ್ಲೆ. ಅಷ್ಟು ಜಾಗವಿದೆ,' ಎಂದು ಸಹಾ ಉತ್ತರಿಸಿದ್ದಾರೆ.