ಭಾರತದ ಮಾಜಿ ಕ್ರಿಕೆಟಿಗ ಅಜೆಯ್ ಜಡೆಜಾಗೆ 5,000 ರೂ. ದಂಡ

ಗೋವಾ: ಭಾರತೀಯ ಕ್ರಿಕೆಟ್ ತಂಡದ ಮಾಜಿ ಆಟಗಾರ ಅಜಯ್ ಜಡೇಜಾಗೆ 5000 ರೂ. ದಂಡ ಹಾಕಲಾಗಿದೆ. ಗೋವಾದ ಗ್ರಾಮ ನಾಚಿನೋಲದಲ್ಲಿ ಕಸ ಎಸೆದಿದ್ದಕ್ಕೆ ಜಡೇಜಾಗೆ ಅಲ್ಲಿನ ಗ್ರಾಮದ ಸರ್ಪಂಚ್ ದಂಡ ವಿಧಿಸಿದ್ದಾರೆ. ಜಡೇಜಾಗೆ ಉತ್ತರ ಗೋವಾದ ಅಲ್ಡೋನಾ ಗ್ರಾಮದಲ್ಲಿ ಬಂಗಲೆಯಿದೆ.

ಕಸ ಎಸೆದಿದ್ದಕ್ಕಾಗಿ ಅಜಯ್ ಜಡೇಜಾಗೆ 5000 ರೂ. ದಂಡ ವಿಧಿಸಿರುವುದಾಗಿ ಅಲ್ಲಿನ ಸರ್ಪಂಚ್ ತೃಪ್ತಿ ಬಂದೋಡ್ಕರ್ ತಿಳಿಸಿದ್ದಾರೆ. 90ರ ದಶಕದ ಜನಪ್ರಿಯ ಕ್ರಿಕೆಟರ್ ಜಡೇಜಾ ಯಾವುದೇ ಗಡಿಬಿಡಿಯಿಲ್ಲದೆ ದಂಡ ಪಾವತಿಸಿರುವುದಾಗಿ ಬಂದೋಡ್ಕರ್ ಮಾಹಿತಿ ನೀಡಿದ್ದಾರೆ.

"ನಮ್ಮ ಗ್ರಾಮದಲ್ಲಿ ಕಸದ ಸಮಸ್ಯೆಯಿಂದ ನಾವು ಬಳಲುತ್ತಿದ್ದೇವೆ. ಹೊರಗಿನ ಕಸವನ್ನು ಸಹ ಹಳ್ಳಿಯಲ್ಲಿ ಎಸೆಯಲಾಗುತ್ತದೆ, ಆದ್ದರಿಂದ ನಾವು ಕೆಲವು ಯುವಕರನ್ನು ಕಸದ ಚೀಲಗಳನ್ನು ಸಂಗ್ರಹಿಸಲು ಮತ್ತು ಅಪರಾಧಿಗಳನ್ನು ಗುರುತಿಸಲು ನೇಮಿಸಿದ್ದೇವೆ," ಎಂದು ತೃಪ್ತಿ ಹೇಳಿದ್ದಾರೆ.

50ರ ಹರೆಯದ ಅಜಯ್ ಜಡೇಜಾ, ಭಾರತದ ಪರ 15 ಟೆಸ್ಟ್‌ ಪಂದ್ಯಗಳಲ್ಲಿ 576 ರನ್, 196 ಏಕದಿನ ಪಂದ್ಯಗಳಲ್ಲಿ 5359 ರನ್ ಬಾರಿಸಿದ್ದಾರೆ. ಬಲಗೈ ಬ್ಯಾಟ್ಸ್‌ಮನ್ ಆಗಿದ್ದ ಜಡೇಜಾ, ಏಕದಿನದಲ್ಲಿ 6 ಶತಕಗಳ ದಾಖಲೆ ಹೊಂದಿದ್ದಾರೆ. ಜಡೇಜಾ ಮೂಲತಃ ಗುಜರಾತ್‌ನವರು.