ವಾಸಿಮ್ ಜಾಫರ್ ಈ ತಮಾಷೆಯ ಮೀಮ್‌ ಹಿಂದೆ ಗಂಭೀರ ಕತೆಯಿದೆ!

WTCಗೆ ಸಂಬಂಧಿಸಿ ಮೀಮ್

ಮೇ 24ರ ಸೋಮವಾರ ಟ್ವಿಟರ್‌ನಲ್ಲಿ ಒಂದು ತಮಾಷೆಯ ಮೀಮ್‌ ಅನ್ನು ವಾಸಿಮ್ ಜಾಫರ್ ಪೋಸ್ಟ್‌ ಮಾಡಿದ್ದಾರೆ. ಈ ಮೀಮ್‌ ಮುಂಬರಲಿರುವ ಭಾರತ-ನ್ಯೂಜಿಲೆಂಡ್‌ ನಡುವಿನ ಐಸಿಸಿ ವರ್ಲ್ಡ್ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ ಪಂದ್ಯಕ್ಕೆ ಸಂಬಂಧಿಸಿದೆ. ಟೆಸ್ಟ್ ಚಾಂಪಿಯನ್‌ಶಿಪ್‌ ಫೈನಲ್ ಪಂದ್ಯದಲ್ಲಿ ಅಂಪೈರಿಂಗ್ ಯಾರು ಮಾಡಬೇಕು ಎಂಬ ವಿಚಾರವನ್ನು ಮುಂದಿಟ್ಟುಕೊಂಡು ಜಾಫರ್ ಮೀಮ್ ತಯಾರಿಸಿದ್ದಾರೆ.

ಬೇಕು/ಬೇಡ ಎಂದು ತಮಾಷೆ

ಜಾಫರ್ ಹಾಕಿಕೊಂಡಿರುವ ಪೋಸ್ಟ್‌ನಲ್ಲಿ ಬೇಕು, ಬೇಡ ಎಂಬುದಕ್ಕೆ ವೈರಲ್ ಆಗಿದ್ದ ವ್ಯಕ್ತಿಯ ಶೈಲಿಯಲ್ಲಿ ಜಾಫರ್ ಕೂಡ ಪೋಸ್ ನೀಡಿದ್ದಾರೆ. ವರ್ಲ್ಡ್ ಟೆಸ್ಟ್‌ ಚಾಂಪಿಯನ್‌ಶಿಪ್‌ ಫೈನಲ್‌ ಅಂಪೈರಿಂಗ್‌ಗೆ ಸಂಬಂಧಿಸಿ ಇಬ್ಬರು ಜನಪ್ರಿಯ ಅಂಪೈರ್‌ಗಳ ಚಿತ್ರ ಹಾಕಿಕೊಂಡಿದ್ದಾರೆ. ಮೇಲಿನ ಚಿತ್ರದಲ್ಲಿ ಇಂಗ್ಲೆಂಡ್‌ನ ಅಂಪೈರ್ ರಿಚರ್ಡ್ ಕೆಟಲ್ಬರೋ ಇದ್ದರೆ, ಕೆಳಗಿನ ಚಿತ್ರದಲ್ಲಿ ಶ್ರೀಲಂಕಾದ ಅಂಪೈರ್ ಕುಮಾರ್ ಧರ್ಮಸೇನಾ ಅವರ ಚಿತ್ರವಿದೆ. ಕೆಟಲ್ಬರೋ ಅಂಪೈರಿಂಗ್ ಬೇಡ, ಧರ್ಮಸೇನಾ ಅಂಪೈರಿಂಗ್ ಇರಲಿ ಎಂಬರ್ಥದಲ್ಲಿ ಹೀಗೆ ತಮಾಷೆ ಮಾಡಲಾಗಿದೆ.

ಮೀಮ್ ಹಿಂದಿದೆ ಗಂಭೀರ ಕತೆ!

ವರ್ಲ್ಡ್ ಟೆಸ್ಟ್‌ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ರಿಚರ್ಡ್ ಕೆಟಲ್ಬರೋ ಅಂಪೈರಿಂಗ್ ಬೇಡ, ಧರ್ಮಸೇನಾ ಅಂಪೈರ್ ಬೇಕು ಎಂದ ಜಾಫರ್ ತಮಾಷೆಯಾಗಿ ತಯಾರಿಸಿರುವ ಈ ಮೀಮ್‌ ಹಿಂದೆ ಒಂದು ಗಂಭೀರ ಕತೆಯಿದೆ. ಅದೇನೆಂದರೆ ರಿಚರ್ಡ್ ಕೆಟಲ್ಬರೋ ಅಂಪೈರ್ ಆಗಿದ್ದ ಐಸಿಸಿ ಪ್ರಮುಖ ಪಂದ್ಯಗಳಲ್ಲಿ ಭಾರತ ಗೆದ್ದಿದ್ದೇ ಇಲ್ಲ.

ಕುತೂಹಲಕಾರಿ ಕಾರಣ ಇಲ್ಲಿದೆ

ರಿಚರ್ಡ್ ಕೆಟಲ್ಬರೋ ಅಂಪೈರ್‌ ಆಗಿದ್ದ 2014ರ ಟಿ20 ವಿಶ್ವಕಪ್‌ ಫೈನಲ್‌ (ಶ್ರೀಲಂಕಾ ವಿರುದ್ಧ), 2015ರಲ್ಲಿ ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧದ ಐಸಿಸಿ ವಿಶ್ವಕಪ್‌ ಸೆಮಿಫೈನಲ್, 2017ರಲ್ಲಿ ಪಾಕಿಸ್ತಾನ ವಿರುದ್ಧದ ಚಾಂಪಿಯನ್ಸ್ ಟ್ರೋಫಿ, 2019ರ ವಿಶ್ವಕಪ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧದ ಸೆಮಿಫೈನಲ್‌ ಇದರಲ್ಲಿ ಯಾವುದರಲ್ಲೂ ಭಾರತ ಗೆದ್ದಿಲ್ಲ. ಅದೇ ಧರ್ಮಸೇನಾ ಅವರು ಇಂಗ್ಲೆಂಡ್-ನ್ಯೂಜಿಲೆಂಡ್ 2019ರ ವಿಶ್ವಕಪ್‌ ಫೈನಲ್‌ನಲ್ಲಿ 4 ಓವರ್ ಥ್ರೋ ರನ್ ಕೊಡುಗೆ ನೀಡಿದ್ದರು.