'ಎಂಎಸ್ ಧೋನಿಯ ಒಂದು ದಾಖಲೆ ಯಾವತ್ತಿಗೂ ಮುರಿಯಲಾಗಲ್ಲ': ಗಂಭೀರ್

ಒಂದು ದಾಖಲೆ ಮುರಿಯಲು ಸಾಧ್ಯವಿಲ್ಲ

ಧೋನಿಯ ನಿವೃತ್ತಿಯ ಬಗ್ಗೆ ಮಾತನಾಡಿದ ಗೌತಮ್ ಗಂಭೀರ್, ಧೋನಿ ವೃತ್ತಿ ಜೀವನದ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದರು. ಎಂಎಸ್‌ಡಿ ಮಾಡಿರುವ ಯಾವುದೇ ದಾಖಲೆಗಳನ್ನು ಮುರಿಯಹುದೇನೋ. ಆದರೆ ಆತ ಮಾಡಿದ ಒಂದು ದಾಖಲೆ ಮಾತ್ರ ಯಾವತ್ತಿಗೂ ಮುರಿಲಾಗದು. ಆ ದಾಖಲೆ ದಾಖಲೆಯಾಗೇ ಕೊನೆವರೆಗೂ ಉಳಿಯುತ್ತದೆ ಎಂದು ಗಂಭೀರ್ ಹೇಳಿಕೊಂಡಿದ್ದಾರೆ.

ಯಾವುದು ಆ ಮುರಿಯದ ದಾಖಲೆ?

ಸ್ಟಾರ್ ಸ್ಪೋರ್ಟ್ಸ್‌ನ ಕ್ರಿಕೆಟ್ ಕನೆಕ್ಟ್ ಜೊತೆ ಮಾತನಾಡಿದ ಗಂಭೀರ್, 'ಧೋನಿಯ ಮುರಿಯದ ದಾಖಲೆ ಬಗ್ಗೆ ಮಾತನಾಡುವುದಾದರೆ, ಧೋನಿಯ ಮೂರು ಐಸಿಸಿ ಟ್ರೋಫಿಗಳ ದಾಖಲೆ ಯಾವತ್ತಿಗೂ ಉಳಿಯಲಿದೆ. ಯಾವುದೇ ನಾಯಕ ಈ ಸಾಧನೆ ಮಾಡಲು ಸಾಧ್ಯವಿಲ್ಲ ಎಂದು ನಾನು ಭಾವಿಸುತ್ತೇನೆ,' ಎಂದಿದ್ದಾರೆ.

ರೋಹಿತ್ ದಾಖಲೆ ಸರಿಗಟ್ಟಬಹುದು

ಮಾತು ಮುಂದುವರೆಸಿದ ಗಂಭೀರ್, 'ಅದು ಟಿ20 ವಿಶ್ವಕಪ್, ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಅಥವಾ ಐಸಿಸಿ ವಿಶ್ವಕಪ್ ಏನೆ ಇರಲಿ. ಈ ದಾಖಲೆ ಮುರಿಯಲಂತೂ ಆಗಲ್ಲ ಅಂತ ನಾನು ಬೇಕಾದ್ರೆ ಬೆಟ್ ಕಟ್ತೀನಿ. ಶತಕಗಳ ದಾಖಲೆ ಮುರಿಯಬಹುದು. ನಾಳೆ ಯಾರೋಬ್ಬರೋ ಬಂದು ರೋಹಿತ್ ಶರ್ಮಾರ ದ್ವಿಶತಕಗಳ ದಾಖಲೆ ಮುರಿಯಬಹುದು. ಆದರೆ ಯಾವುದೇ ನಾಯಕನಿಂದಲೂ ಮೂರು ಐಸಿಸಿ ಟ್ರೋಫಿಗಳನ್ನು ಗೆದ್ದ ದಾಖಲೆ ಮುರಿಯಲು ಸಾಧ್ಯವೇ ಇಲ್ಲ,' ಎಂದರು.

ಧೋನಿ ಹೆಸರಲ್ಲಿ ವಿಶ್ವ ದಾಖಲೆ

ಗಂಭೀರ್ ಹೇಳಿಕೆಗೆ ಕಾರಣವಿದೆ. ಧೋನಿ ಹೆಸರಲ್ಲಿ ಇಂಥದ್ದೊಂದು ಅಪರೂಪದ ವಿಶ್ವದಾಖಲೆಯಿದೆ. ಕ್ರಿಕೆಟ್ ಇತಿಹಾಸದಲ್ಲೇ ಐಸಿಸಿ ಮೂರು ಪ್ರಮುಖ ಟ್ರೋಫಿಗಳನ್ನು, ಐಸಿಸಿ ಎಲ್ಲಾ ಪ್ರೋಫಿಗಳನ್ನು ಗೆದ್ದ ಮೊದಲ ಮತ್ತು ಏಕಮಾತ್ರ ನಾಯಕ ಧೋನಿ. ಧೋನಿ ನಾಯಕತ್ವದಲ್ಲಿ ಭಾರತ 2007ರ ಐಸಿಸಿ ವರ್ಲ್ಡ್ ಟಿ20, 2010 ಮತ್ತು 2016ರಲ್ಲಿ ಏಷ್ಯಾಕಪ್‌, 2011ರಲ್ಲಿ ಐಸಿಸಿ ಕ್ರಿಕೆಟ್ ವಿಶ್ವಕಪ್ ಮತ್ತು 2013ರಲ್ಲಿ ಚಾಂಪಿಯನ್ಸ್ ಟ್ರೋಫಿ ಜಯಿಸಿತ್ತು.