ಬ್ಯಾಟಿಂಗ್ ಆರ್ಡರ್ 6ರ ಬಗ್ಗೆ ತುಟಿ ಬಿಚ್ಚಿದ ಕನ್ನಡಿಗ ಮನೀಶ್ ಪಾಂಡೆ

ಪಾಂಡೆಗೆ 6ನೇ ಬ್ಯಾಟಿಂಗ್ ಕ್ರಮಾಂಕ

ಭಾರತ 'ಎ' ಪರ ಟಾಪ್ ಬ್ಯಾಟಿಂಗ್ ಆರ್ಡರ್‌ನಲ್ಲಿ ಬರುವ ಮನೀಶ್ ಪಾಂಡೆ, ವೆಲ್ಲಿಂಗ್ಟನ್‌ನಲ್ಲಿ ನಡೆದಿದ್ದ ಶುಕ್ರವಾರದ ಪಂದ್ಯದಲ್ಲಿ 6ನೇ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಬಂದಿದ್ದರು. ಪಾಂಡೆಗೂ ಮುನ್ನ ಆಲ್ ರೌಂಡರ್ ಶಿವಂ ದೂಬೆ 5ನೇ ಕ್ರಮಾಂಕದಲ್ಲಿ ಬಂದು 9 ಎಸೆತಗಳಿಗೆ ಕೇವಲ 12 ರನ್ ಬಾರಿಸಿ ಔಟ್ ಆಗಿದ್ದರು.

ಮೊದಲೇ ಬಂದಿದ್ದರೆ ರನ್‌ ಹೆಚ್ಚುತ್ತಿತ್ತಾ?

ವೆಲ್ಲಿಂಗ್ಟನ್‌ನ ವೆಸ್ಟ್‌ಪ್ಯಾಕ್‌ ಸ್ಟೇಡಿಯಂನಲ್ಲಿ ನಡೆದಿದ್ದ ಪಂದ್ಯದಲ್ಲಿ ಒಂದು ವೇಳೆ ಪಾಂಡೆ ಇನ್ನೂ ಮೊದಲ ಬ್ಯಾಟಿಂಗ್‌ ಆರ್ಡರ್‌ನಲ್ಲಿ ಬಂದಿದ್ದರೆ ತಂಡದ ಮೊತ್ತ ಹೆಚ್ಚುವ ಸಾಧ್ಯತೆಯಿತ್ತು. ಮನೀಶ್‌ ಪಾಂಡೆಗೆ 6ರ ಬದಲು ಇನ್ನೂ ಕೊಂಚ ಉತ್ತಮ ಬ್ಯಾಟಿಂಗ್‌ ಆರ್ಡರ್‌ ನೀಡಬೇಕು ಅನ್ನೋದು ಕೆಲ ಕ್ರಿಕೆಟ್‌ ಪ್ರೇಮಿಗಳ ವಾದ. ಈ ಬಗ್ಗೆ ಸುದ್ದಿಗಾರರ ಪ್ರಶ್ನೆಗೆ ಪಾಂಡೆ ಉತ್ತರಿಸಿದ್ದಾರೆ.

ನನಗೆ ಬೇರೆ ಆಯ್ಕೆಗಳಿಲ್ಲ

ತಾನು 6ನೇ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಬರುವ ಬಗ್ಗೆ ಪ್ರತಿಕ್ರಿಯಿಸಿರುವ ಪಾಂಡೆ, 'ನನಗೆ ಬೇರೆ ಆಯ್ಕೆಗಳಿಲ್ಲ. ಆದರೆ ಆ ಕ್ರಮಾಂಕವೂ ನನಗೆ ಖುಷಿಯೆ. ಸಾಮಾನ್ಯವಾಗಿ ನಾನು ಟಾಪ್‌ ಆರ್ಡರ್‌ನಲ್ಲಿ ಅಂದರೆ 3 ಅಥವಾ 4ರಲ್ಲಿ ಆಡುವುದರಿಂದ ಇಲ್ಲಿ 6ನೇ ಬ್ಯಾಟಿಂಗ್‌ ಕ್ರಮಾಂಕಕ್ಕೆ ಮನಸ್ಸನ್ನು ತಯಾರುಗೊಳಿಸಿಕೊಳ್ಳಬೇಕಿದೆ,' ಎಂದರು.

ಟಾಪ್‌ ಆರ್ಡರ್‌ಗೆ ಭಾರೀ ಪೈಪೋಟಿ

ಮಾತು ಮುಂದುವರೆಸಿದ ಪಾಂಡೆ, 'ಟೀಮ್ ಇಂಡಿಯಾದಲ್ಲಿ ಟಾಪ್ ಬ್ಯಾಟಿಂಗ್‌ ಆರ್ಡರ್‌ಗೆ ತುಂಬಾ ಪೈಪೋಟಿಯಿದೆ. ಆದರೆ ನಿಮ್ಮ ಅವಕಾಶಕ್ಕೆ ನೀವು ಕಾಯಬೇಕಾಗುತ್ತದೆ,' ಎಂದು ಪ್ರತಿಕ್ರಿಯಿಸಿದರು. ಒಟ್ಟಿನಲ್ಲಿ 4ನೇ ಪಂದ್ಯದಲ್ಲಿ ಪಾಂಡೆ, ತಂಡ ಗೆಲ್ಲಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಶಾರ್ದೂಲ್ ಠಾಕೂರ್‌ರೊಂದಿಗೆ 47 ರನ್ ಜೊತೆಯಾಟವೂ ನೀಡಿದ್ದ ಪಾಂಡೆ ಸುಲಭವಾಗಿ ಸೋಲಬೇಕಿದ್ದ ಪಂದ್ಯದಲ್ಲಿ ತಂಡವನ್ನು ಕಾಪಾಡಿದ್ದರು.