IPL Partnerships: ಐಪಿಎಲ್‌ನಲ್ಲಿ ದಾಖಲಾದ ಗರಿಷ್ಠ ಜೊತೆಯಾಟಗಳ ಬಗ್ಗೆ ಮಾಹಿತಿ ಇಲ್ಲಿದೆ

ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನಲ್ಲಿ ಬ್ಯಾಟರ್‌ಗಳ ಆರ್ಭಟ ಜೋರಾಗಿ ಇರುತ್ತದೆ. ಈ ಲೀಗ್‌ನಲ್ಲಿ ಒಬ್ಬ ಬ್ಯಾಟರ್‌ ನಿಂತು ರನ್ ಬಾರಿಸಲು ಆರಂಭಿಸಿದರೆ, ಅವನಿಂದ ಪ್ರೇರಣೆ ಪಡೆದು ಇನ್ನೊಬ್ಬ ಆಡಲು ಆರಂಭಿಸುತ್ತಾನೆ. ಆಗ ತಂಡಕ್ಕೆ ಅನುಕೂಲವಾಗುತ್ತದೆ. ಈ ಜೊತೆಯಾಟಗಳು ಐಪಿಎಲ್‌ ಪಂದ್ಯದ ಚಿತ್ರಣವನ್ನೇ ಬದಲಿಸುತ್ತವೆ. ಆರಂಭದಲ್ಲಿ ಎದುರಾಳಿಗಳನ್ನು ಕಾಡುವ ಈ ಬ್ಯಾಟರ್ಸ್‌ ಕೊನೆಗೆ ಫಲಿತಾಂಶದಲ್ಲಿ ತಮ್ಮ ತಂಡದ ಹೆಸರು ಬರೆದು ಬಿಡುತ್ತಾರೆ. ಅದೆಷ್ಟೋ ಮ್ಯಾಚ್‌ ವಿನ್ನಿಂಗ್ ಜೊತೆಯಾಟಗಳು ಬಂದಿವೆ. ಈ ಬಗ್ಗೆ ವರದಿ ಇಲ್ಲಿದೆ.

18ನೇ ಆವೃತ್ತಿಯ ಐಪಿಎಲ್‌ ಇನ್ನೇನು ಕೆಲವೇ ದಿನಗಳಲ್ಲಿ ಆರಂಭವಾಗಲಿದೆ. ಈ ಲೀಗ್‌ನಲ್ಲಿ ಆಟಗಾರರು ತಮ್ಮ ಸ್ತಿರ ಪ್ರದರ್ಶನದ ಪ್ರಭಾವದಿಂದ ತಂಡಕ್ಕೆ ನೆರವಾಗುತ್ತಾರೆ. ಐಪಿಎಲ್‌ ಜಯದಲ್ಲಿ ವಿಶೇಷ ಕೊಡುಗೆ ನೀಡುವ ಜೊತೆಯಾಟಗಳು ಸಾಕಷ್ಟು ಮೂಡಿಬಂದಿವೆ. ಈ ಪಟ್ಟಿಯಲ್ಲಿ ಆರ್‌ಸಿಬಿಗೆ ಅಗ್ರ ಸ್ಥಾನ.

ವಿರಾಟ್, ಎಬಿಡಿಗೆ ಅಗ್ರ ಸ್ಥಾನ

ಆರ್‌ಸಿಬಿ ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಹಾಗೂ ಎಬಿಡಿ ವಿಲಿಯರ್ಸ್‌ ಹಲವು ಬಾರಿ ಸಂಕಷ್ಟದಲ್ಲಿದ್ದ ತಂಡಕ್ಕೆ ಆಧಾರವಾಗಿದ್ದಾರೆ. ಇದೇ ರೀತಿ ಮೇ 10, 2022ರಲ್ಲಿ ನಡೆದ ಪಂದ್ಯದಲ್ಲಿ ಗುಜರಾತ್‌ ಲಯನ್ಸ್‌ ವಿರುದ್ಧದ ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡಿ ಗಮನ ಸೆಳೆದಿದ್ದರು. ಈ ವೇಳೆ ಈ ಜೋಡಿ ಎರಡನೆ ವಿಕೆಟ್‌ಗೆ 229 ರನ್‌ ಜೊತೆಯಾಟದ ಕಾಣಿಕೆಯನ್ನು ನೀಡಿತು. ಆ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ಆರ್‌ಸಿಬಿ 20 ಓವರ್‌ಗಳಲ್ಲಿ 3 ವಿಕೆಟ್‌ಗೆ 248 ರನ್‌ ಸಿಡಿಸಿತ್ತು. ವಿರಾಟ್‌ 109 ರನ್‌ ಸಿಡಿಸಿದ್ದರು. ಸ್ಫೋಟಕ ಬ್ಯಾಟರ್‌ ಎಬಿಡಿ ಜಸ್ಟ್‌ 52 ಎಸೆತಗಳಲ್ಲಿ 10 ಬೌಂಡರಿ, 12 ಸಿಕ್ಸರ್‌ ಸಹಾಯದಿಂದ 129 ರನ್‌ ಚಚ್ಚಿ ತಂಡಕ್ಕೆ ಆಧಾರವಾಗಿದ್ದರು. ಈ ಪಂದ್ಯವನ್ನು ಆರ್‌ಸಿಬಿ 144 ರನ್‌ಗಳಿಂದ ಗೆದ್ದಿತ್ತು.

ಎರಡನೇ ಅತ್ಯುತ್ತಮ ಜೊತೆಯಾಟ ಸಹ ಇದೇ ಜೋಡಿಯಿಂದ ಮೂಡಿ ಬಂದಿರುವುದು ವಿಶೇಷ. ಮುಂಬೈ ಇಂಡಿಯನ್ಸ್‌ ವಿರುದ್ಧ ವಾಂಖೇಡೆಯಲ್ಲಿ ನಡೆದಿದ್ದ ಪಂದ್ಯದಲ್ಲಿ ಆರ್‌ಸಿಬಿ ಮೊದಲು ಬ್ಯಾಟ್ ಮಾಡಿ 20 ಓವರ್‌ಗಳಲ್ಲಿ 1 ವಿಕೆಟ್‌ಗೆ 235 ರನ್‌ ಸೇರಿಸಿತು. ಈ ವೇಳೆ ಮಿಸ್ಟರ್‌ 360 ಡಿಗ್ರಿ ಖ್ಯಾತಿಯ ಎಬಿಡಿ 59 ಎಸೆತಗಳಲ್ಲಿ 19 ಬೌಂಡರಿ, 4 ಸಿಕ್ಸರ್‌ ಸಹಾಯದಿಂದ ಅಜೇಯ 133 ರನ್‌ ಬಾರಿಸಿ ತಂಡಕ್ಕೆ ಆಧಾರವಾದರು. ಗುರಿಯನ್ನು ಬೆನ್ನಟ್ಟಿದ ಮುಂಬೈ 20 ಓವರ್‌ಗಳಲ್ಲಿ 7 ವಿಕೆಟ್‌ಗೆ 196 ರನ್‌ ಸೇರಿಸಿತು.