Virat Kohli: ವಿರಾಟ್ ಕೊಹ್ಲಿ ಐಪಿಎಲ್ ಸಂಬಳಕ್ಕೆ ಎಷ್ಟು ತೆರಿಗೆ ಕಟ್ಟುತ್ತಾರೆ?

ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‍‌ಸಿಬಿ) ಅನುಭವಿ ಬ್ಯಾಟರ್‍‌ ವಿರಾಟ್ ಕೊಹ್ಲಿ ಐಪಿಎಲ್ 2025ರ ಟೂರ್ನಿಯನ್ನು ಅದ್ಭುತ ಶೈಲಿಯಲ್ಲಿ ಪ್ರಾರಂಭಿಸಿದ್ದಾರೆ. ಕೋಲ್ಕತ್ತಾದ ಈಡನ್ ಗಾರ್ಡನ್ಸ್‌ನಲ್ಲಿ ಶನಿವಾರ ನಡೆದ ಐಪಿಎಲ್ 2025ರ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧದ ಉದ್ಘಾಟನಾ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಅಮೋಘ ಬ್ಯಾಟಿಂಗ್ ಪ್ರದರ್ಶನ ಮಾಡಿದರು. ಕೊಹ್ಲಿ 36 ಎಸೆತಗಳಲ್ಲಿ 4 ಬೌಂಡರಿ ಮತ್ತು 3 ಸಿಕ್ಸರ್ ಸಹಾಯದಿಂದ ಅಜೇಯ 59 ರನ್ ಗಳಿಸಿದರು. ಅವರ ಅರ್ಧಶತಕದ ನೆರವಿನಿಂದ ಆರ್‌ಸಿಬಿ 7 ವಿಕೆಟ್‌ಗಳಿಂದ ಸುಲಭವಾಗಿ ಜಯಗಳಿಸಿತು.

ವಿರಾಟ್ ಕೊಹ್ಲಿ ಐಪಿಎಲ್ 2025ರ ಮೊದಲ ಪಂದ್ಯದಲ್ಲೇ ಉತ್ತಮ ಪ್ರದರ್ಶನ ನೀಡಿರುವುದು ಆರ್‍‌ಸಿಬಿ ಅಭಿಮಾನಿಗಳಿಗೆ ಸಂತಸ ತಂದಿದೆ. ಅವರ ಜನಪ್ರಿಯತೆಯು ವರ್ಷಗಳಿಂದ ಉತ್ತುಂಗದಲ್ಲಿದೆ. ಐಪಿಎಲ್‌ನಲ್ಲಿ ಅವರು 20 ಕೋಟಿ ರೂ.ಗಳಿಗಿಂತ ಹೆಚ್ಚು ಸಂಬಳ ಪಡೆಯುವ ಆಟಗಾರರಲ್ಲಿ ಒಬ್ಬರು.

ಐಪಿಎಲ್ 2025ರ ಮೆಗಾ ಹರಾಜಿಗೂ ಮುನ್ನ ವಿರಾಟ್ ಕೊಹ್ಲಿ ಅವರನ್ನು ಆರ್‌ಸಿಬಿ 21 ಕೋಟಿ ರೂ.ಗೆ ಉಳಿಸಿಕೊಂಡಿತು. ಇದು ಅವರ ಹಿಂದಿನ ಸಂಬಳಕ್ಕಿಂತ ಶೇ. 40 ರಷ್ಟು ಹೆಚ್ಚಾಗಿದೆ. ಕೊಹ್ಲಿ ಆರ್‌ಸಿಬಿ ತಂಡದ ನಾಯಕನಲ್ಲದಿರಬಹುದು, ಆದರೆ ಅವರೇ ತಂಡದ ನಿಜವಾದ ನಾಯಕ.

ಕೊಹ್ಲಿ ಸಂಬಳ

ವಿರಾಟ್ ಕೊಹ್ಲಿ 2008 ರಿಂದ 2010 ರವರೆಗಿನ ಐಪಿಎಲ್‌ನಲ್ಲಿ ಪಡೆದ ಸಂಭಾವನೆ ಕೇವಲ 12 ಲಕ್ಷ ರೂ. 2010 ರ ನಂತರ, 2011-13 ರ ಅವಧಿಯಲ್ಲಿ ಅವರ ಸಂಬಳ ವೇಗವಾಗಿ 8.28 ಕೋಟಿ ರೂ.ಗೆ ಏರಿತು. 2014 ರಿಂದ 2017 ರವರೆಗಿನ ಅವರ ಐಪಿಎಲ್ ಸಂಬಳ 12.5 ಕೋಟಿ ರೂ. 2018 ರಿಂದ 2021 ರವರೆಗಿನ ಅವರ ಸಂಬಳ 17 ಕೋಟಿ ರೂ. ಆದಾಗ್ಯೂ, 2022 ರಿಂದ 2024 ರ ಅವಧಿಯಲ್ಲಿ ಅವರ ಸಂಬಳ 15 ಕೋಟಿ ರೂ.ಗೆ ಇಳಿದಿತ್ತು. ಈಗ ಅದು ಶೇ. 40 ರಷ್ಟು ಹೆಚ್ಚಾಗಿ 21 ಕೋಟಿ ರೂ.ಗೆ ತಲುಪಿದೆ.

ಆರ್‌ಸಿಬಿ ದುಬಾರಿ ಆಟಗಾರ

ವಿರಾಟ್ ಕೊಹ್ಲಿ ಐಪಿಎಲ್‌ನ 18 ಸೀಸನ್‌ಗಳಲ್ಲಿ ಒಟ್ಟು 179.70 ಕೋಟಿ ರೂ. ಸಂಬಳ ಗಳಿಸಿದ್ದಾರೆ. ವಿರಾಟ್ ಆರ್‌ಸಿಬಿ ತಂಡದಲ್ಲಿ ಅತ್ಯಂತ ದುಬಾರಿ ಆಟಗಾರ. ಅವರ ನಂತರ ಜೋಶ್ ಹ್ಯಾಜಲ್‌ವುಡ್ (ರೂ. 12.50 ಕೋಟಿ) ಮತ್ತು ಭುವನೇಶ್ವರ್ ಕುಮಾರ್ (ರೂ. 10.75 ಕೋಟಿ) ಇದ್ದಾರೆ.

ಕೊಹ್ಲಿ ಆರ್‌ಸಿಬಿ ಉದ್ಯೋಗಿಯಲ್ಲ ಆದರೆ, ಐಪಿಎಲ್ ಒಪ್ಪಂದ ಶುಲ್ಕವನ್ನು ಪಡೆಯುತ್ತಿದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ, ಈ ಆದಾಯವನ್ನು 1961 ರ ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 28 ರ ಅಡಿಯಲ್ಲಿ "ವ್ಯವಹಾರ ಅಥವಾ ವೃತ್ತಿಯಿಂದ ಬರುವ ಆದಾಯ' ಎಂದು ವರ್ಗೀಕರಿಸಲಾಗಿದೆ. ಅವರ ಐಪಿಎಲ್ ಗಳಿಕೆ 15 ಲಕ್ಷ ರೂ. ಮೀರಿದೆ, ಆದ್ದರಿಂದ ಅವರಿಗೆ ಸಂಪೂರ್ಣ ಮೊತ್ತದ ಮೇಲೆ ಶೇ. 30 ರಷ್ಟು ತೆರಿಗೆ ವಿಧಿಸಲಾಗುತ್ತದೆ.

ಹೊಸ ತೆರಿಗೆ ನಿಯಮದ ಪ್ರಕಾರ, ವಿರಾಟ್ ಕೊಹ್ಲಿ ಅವರ ಒಟ್ಟು ತೆರಿಗೆ ಹೊಣೆಗಾರಿಕೆ 8.19 ಕೋಟಿ ರೂ.ಗಳಾಗಿದೆ. ಅವರ 21 ಕೋಟಿ ರೂ. ಸಂಬಳದಲ್ಲಿ ತೆರಿಗೆ ಕಡಿತಗೊಂಡ ನಂತರ ಸುಮಾರು 12.81 ಕೋಟಿ ರೂ. ಸಿಗಲಿದೆ. ಅವರು ವ್ಯವಹಾರ ವೆಚ್ಚಗಳನ್ನು (ಏಜೆಂಟ್ ಶುಲ್ಕಗಳು, ಫಿಟ್‌ನೆಸ್ ವೆಚ್ಚಗಳು, ಬ್ರ್ಯಾಂಡ್ ನಿರ್ವಹಣೆಯಂತಹ) ಹೊಂದಿದ್ದರೆ, ತೆರಿಗೆ ವಿಧಿಸಬಹುದಾದ ಆದಾಯವನ್ನು ಲೆಕ್ಕಾಚಾರ ಮಾಡುವ ಮೊದಲು ಅವರು ಸೆಕ್ಷನ್ 37(1) ಅಡಿಯಲ್ಲಿ ಕಡಿತವನ್ನು ಪಡೆಯಬಹುದು ಎಂಬುದನ್ನು ಗಮನಿಸುವುದು ಮುಖ್ಯ. ಇದಲ್ಲದೆ, ಇತರ ಆದಾಯದ ಮೂಲಗಳಿಗೂ (ಜಾಹೀರಾತು, ಹೂಡಿಕೆ, ಇತ್ಯಾದಿ) ಪ್ರತ್ಯೇಕವಾಗಿ ತೆರಿಗೆ ವಿಧಿಸಲಾಗುತ್ತದೆ.