ಭಾರತದ ಟಿ10 ಫ್ರಾಂಚೈಸಿ ಮಾಲಕನಿಗೆ ನಿಷೇಧ ಹೇರಿದ ಐಸಿಸಿ

ನವದೆಹಲಿ, ಏಪ್ರಿಲ್ 29: ಯುಎಇಯಲ್ಲಿ 2018ರಲ್ಲಿ ನಡೆದಿದ್ದ ಟಿ10 ಲೀಗ್‌ನಲ್ಲಿ ಫ್ರಾಂಚೈಸಿ ಮಾಲಕನಾಗಿದ್ದ, ಭಾರತದ ಉದ್ಯಮಿ ದೀಪಕ್ ಅಗರ್ವಾಲ್ ಅವರನ್ನು ಇಂಟರ್ ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ಬುಧವಾರ (ಏಪ್ರಿಲ್ 29) ನಿಷೇಧಿಸಿದೆ. ಭ್ರಷ್ಟಾಚಾರಕ್ಕೆ ಸಂಬಂಧಿಸಿದ ತನಿಖೆಗೆ ಅಡ್ಡಿ ಪಡಿಸಿದ್ದಕ್ಕೆ ಐಸಿಸಿ ದೀಪಕ್ ಅವರನ್ನು ನಿಷೇಧಿಸಿದೆ.

ಅಸಲಿಗೆ ದೀಪಕ್ ಅಗರ್ವಾಲ್ ಅವರಿಗೆ 2 ವರ್ಷಗಳ ನಿಷೇಧ ಶಿಕ್ಷೆ ವಿಧಿಸಲಾಗಿತ್ತು. ಆದರೆ ಭ್ರಷ್ಟಾಚಾರ ವಿರೋಧಿ ಸಂಹಿತೆ ಉಲ್ಲಂಘಿಸಿರುವುದನ್ನು ಒಪ್ಪಿಕೊಂಡು, ಆ ಬಳಿಕ ತನಿಖೆಗೆ ಸಹಕರಿಸಿದ್ದಾಗಿ ಅಗರ್ವಾಲ್‌ಗೆ 6 ತಿಂಗಳ ನಿಷೇಧವನ್ನು ಐಸಿಸಿ ಕಡಿತಗೊಳಿಸಿದೆ.

ಸಿಂಧಿಸ್ ಟಿ10 ತಂಡದ ಮಾಲಕರಾಗಿರುವ ಅಗರ್ವಾಲ್, 2018ರ ಆವೃತ್ತಿಯಲ್ಲಿ ಭ್ರಷ್ಟಾಚಾರಕ್ಕೆ ಸಂಬಂಧಿಸಿ ದಾಖಲೆ ಹಾಳು ಮಾಡಿ ಬ್ರಷ್ಟಾಚಾರ ವಿರೋಧಿ ನೀತಿ ಉಲ್ಲಂಘಿಸಿದ್ದಾರೆ. ಭ್ರಷ್ಟಾಚಾರದಲ್ಲಿ ಭಾಗವಹಿಸಿದ್ದ ವ್ಯಕ್ತಿಯಲ್ಲಿ ಅಗರ್ವಾಲ್, ದಾಖಲೆಗಳನ್ನು ನಾಶ ಮಾಡಲು ತಿಳಿಸಿದ್ದರು ಎನ್ನಲಾಗಿದೆ.

'ಮಿಸ್ಟರ್ ಎಕ್ಸ್‌ ಅವರಲ್ಲಿ ಮಿಸ್ಟರ್ ಅಗರ್ವಾಲ್, ತಾವಿಬ್ಬರು ಸಂವಹನ ನಡೆಸಿದ ಎಲ್ಲಾ ಮೆಸೇಜ್‌ಗಳನ್ನು ಡಿಲೀಟ್ ಮಾಡಲು ಸೂಚಿಸಿದ್ದರು. ಅವರ ಮೊಬೈಲ್ ಫೋನ್‌ನಿಂದ ಇವರ ನಂಬರ್ ಅಳಿಸಿಹಾಕಿ ಬಳಿಕ ಆ್ಯಂಟಿ ಕರಪ್ಶನ್ ಇನ್ವೆಸ್ಟಿಗೇಶನ್‌ಗೆ ಹಾಜರಾಗುವಂತೆ ಅವರಲ್ಲಿ ತಿಳಿಸಿದ್ದರು,' ಎಂದು ಐಸಿಸಿ ಹೇಳಿದೆ.