World Cup 2023: ಲೀಗ್‌ನಲ್ಲಿ ಅಬ್ಬರ, ನಾಕೌಟ್‌ನಲ್ಲಿ ತತ್ತರ; ಟೀಮ್ ಇಂಡಿಯಾದ ನಿದ್ದೆಗೆಡಿಸಿದೆ ಈ ಅಂಕಿ-ಅಂಶ

ಪ್ರಸಕ್ತ 2023ರ ಐಸಿಸಿ ಏಕದಿನ ವಿಶ್ವಕಪ್‌ನಲ್ಲಿ ಟೀಮ್ ಇಂಡಿಯಾ ಭರ್ಜರಿ ಪ್ರದರ್ಶನವನ್ನು ನೀಡಿ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಕಾಯ್ದುಕೊಂಡು ಎಲ್ಲರಿಗಿಂತ ಮೊದಲು ಸೆಮಿಫೈನಲ್‌ಗೆ ಎಂಟ್ರಿ ಪಡೆಯಿತು.

ರೋಹಿತ್ ಶರ್ಮಾ ನೇತೃತ್ವದ ತಂಡ ಈ ಬಾರಿಯ ಏಕದಿನ ವಿಶ್ವಕಪ್ ಗೆಲ್ಲುವ ಹಾಟ್ ಫೆವರೀಟ್ ತಂಡ ಎಂದು ಕರೆಸಿಕೊಳ್ಳುತ್ತಿದೆ. ಬ್ಯಾಟಿಂಗ್, ಬೌಲಿಂಗ್ ಹಾಗೂ ಫೀಲ್ಡಿಂಗ್‌ನಲ್ಲಿ ಅಮೋಘ ಪ್ರದರ್ಶನ ನೀಡಿರುವ ಭಾರತಕ್ಕೆ ಈ ಒಂದು ಚಿಂತೆ ನಿಜಕ್ಕೂ ಕಾಡುತ್ತಿದೆ.

ಏಕೆಂದರೆ, ಈ ಅಂಕಿಅಂಶಗಳು ಭಾರತ ತಂಡದ ಚಿಂತೆಯನ್ನು ಹೆಚ್ಚಿಸಿದೆ. ಕಳೆದ 10 ವರ್ಷಗಳಲ್ಲಿ ಭಾರತ ತಂಡ ಐಸಿಸಿ ಟೂರ್ನಿಯಲ್ಲಿ ನೀಡಿದ ಪ್ರದರ್ಶನವೇ ಈ ಆತಂಕಕ್ಕೆ ಕಾರಣವಾಗಿದೆ. ಐಸಿಸಿಯ ಟೂರ್ನಿಯ ಲೀಗ್ ಹಂತದಲ್ಲಿ ಭಾರತ ಶೇಕಡಾ 86ರಷ್ಟು ಪಂದ್ಯಗಳಲ್ಲಿ ಜಯ ಸಾಧಿಸಿದ್ದರೆ, ನಾಕೌಟ್ ಹಂತದಲ್ಲಿ ಶೇಕಡಾ 89ರಷ್ಟು ನಿರಾಸೆ ಅನುಭವಿಸಿದೆ.

ಪ್ರಮುಖ ಪಂದ್ಯಗಳಲ್ಲಿ ಭಾರತ ತಂಡದ ವೈಫಲ್ಯದ ಭಯವನ್ನು ಅರ್ಥಮಾಡಿಕೊಳ್ಳಲು, ನಾವು ಐಸಿಸಿ ಪಂದ್ಯಾವಳಿಗಳಲ್ಲಿ ಟೀಮ್ ಇಂಡಿಯಾದ 48 ವರ್ಷಗಳ ಪ್ರಯಾಣವನ್ನು ನೋಡಬಹುದು.

1975ರಿಂದ 1983: ಭಾರತವು 1975 ಮತ್ತು 1979ರ ವಿಶ್ವಕಪ್‌ನಲ್ಲಿ ನಾಕೌಟ್‌ಗೆ ತಲುಪಲಿಲ್ಲ.

1983ರಲ್ಲಿ ಮೊದಲ ಬಾರಿಗೆ ನಾಕೌಟ್ ತಲುಪಿ ಚಾಂಪಿಯನ್ ಆಗಿತ್ತು

1984ರಿಂದ 2006: ಈ ವೇಳೆ ಭಾರತ 11 ಐಸಿಸಿ ಪಂದ್ಯಾವಳಿಗಳಲ್ಲಿ ಭಾಗವಹಿಸಿದೆ. ಈ ಪೈಕಿ 5ರಲ್ಲಿ ಸೆಮಿಫೈನಲ್ ಅಥವಾ ಫೈನಲ್‌ನಲ್ಲಿ ಸೋಲು ಅನುಭವಿಸಿದೆ. 1 ಫೈನಲ್‌ ಪಂದ್ಯ ಮಳೆಯಿಂದಾಗಿ ಪೂರ್ಣಗೊಳ್ಳಲಿಲ್ಲ, ಇದರಲ್ಲಿ ಭಾರತ ಜಂಟಿ ವಿಜೇತವಾಗಿದೆ. 5 ಟೂರ್ನಿಗಳಲ್ಲಿ ಭಾರತ ನಾಕೌಟ್ ಸುತ್ತಿಗೆ ತಲುಪಲು ವಿಫಲವಾಗಿದೆ.

1983ರ ವಿಶ್ವಕಪ್‌ನಿಂದ 2007ರ ಏಕದಿನ ವಿಶ್ವಕಪ್‌ವರೆಗೆ ಭಾರತವು ಒಂದೇ ಒಂದು ಐಸಿಸಿ ಪಂದ್ಯಾವಳಿಯನ್ನು ಗೆಲ್ಲಲು ಸಾಧ್ಯವಾಗಲಿಲ್ಲ ಎಂಬುದು ಗಮನಾರ್ಹ.

2007ರಿಂದ 2013: ಭಾರತ ಕ್ರಿಕೆಟ್ ತಂಡ 2007ರ ಟಿ20 ವಿಶ್ವಕಪ್‌ನಿಂದ 2013ರ ಚಾಂಪಿಯನ್ಸ್ ಟ್ರೋಫಿವರೆಗೆ 7 ಐಸಿಸಿ ಪಂದ್ಯಾವಳಿಗಳಲ್ಲಿ ಭಾಗವಹಿಸಿದೆ. ಇದರಲ್ಲಿ ಟೀಮ್ ಇಂಡಿಯಾ 3 ಬಾರಿ ನಾಕೌಟ್ ಸುತ್ತು ತಲುಪಿ ಮೂರರಲ್ಲೂ ಪ್ರಶಸ್ತಿ ಗೆದ್ದುಕೊಂಡಿತ್ತು.

2014ರಿಂದ 2023: ಸದ್ಯ ನಡೆಯುತ್ತಿರುವ ವಿಶ್ವಕಪ್‌ಗೂ ಮುನ್ನ ಭಾರತ ಐಸಿಸಿ 9 ಪಂದ್ಯಾವಳಿಗಳಲ್ಲಿ 8ರಲ್ಲಿ ನಾಕೌಟ್ ತಲುಪಿದ್ದು, ಒಂದೇ ಒಂದು ಪ್ರಶಸ್ತಿ ಗೆಲ್ಲಲು ಸಾಧ್ಯವಾಗಿಲ್ಲ ಎಂಬುದು ಸೋಜಿಗ.

2013ರ ಬಳಿಕ ಐಸಿಸಿ ಟೂರ್ನಿಯಲ್ಲಿ ಭಾರತದ ಪ್ರದರ್ಶನ ಹೀಗಿದೆ

2014 - ಟಿ20 ವಿಶ್ವಕಪ್ - ಭಾರತ vs ಶ್ರೀಲಂಕಾ ಫೈನಲ್‍: ಶ್ರೀಲಂಕಾ ತಂಡ ಭಾರತವನ್ನು 6 ವಿಕೆಟ್‌ಗಳಿಂದ ಮಣಿಸಿತು. ಇದೇ ಟೂರ್ನಿಯಲ್ಲಿ ಭಾರತ ತಂಡ ಲೀಗ್ ಹಂತದ 5 ಪಂದ್ಯ ಗೆದ್ದಿತು.

2015 - ಏಕದಿನ ವಿಶ್ವಕಪ್ - ಭಾರತ vs ಆಸ್ಟ್ರೇಲಿಯಾ ಸೆಮಿಫೈನಲ್: ಆತಿಥೇಯ ಆಸ್ಟ್ರೇಲಿಯಾ ತಂಡ 95 ರನ್‌ಗಳಿಂದ ಭಾರತವನ್ನು ಸೋಲಿಸಿತ್ತು. ಈ ಲೀಗ್‌ನಲ್ಲೂ ಭಾರತ ಸತತ 7 ಪಂದ್ಯಗಳಲ್ಲಿ ಗೆಲುವು ಸಾಧಿಸಿತ್ತು.

2016 - ಟಿ20 ವಿಶ್ವಕಪ್ - ಭಾರತ vs ವೆಸ್ಟ್‍ ಇಂಡೀಸ್ ಸೆಮಿಫೈನಲ್: ಭಾರತ ತಂಡವನ್ನು ವೆಸ್ಟ್‍ ಇಂಡೀಸ್ 7 ವಿಕೆಟ್‌ಗಳಿಂದ ಸೋಲಿಸಿತ್ತು. ಈ ವಿಶ್ವಕಪ್‌ನಲ್ಲಿ ಭಾರತ ಲೀಗ್ ಹಂತದಲ್ಲಿ ಒಂದು ಪಂದ್ಯವನ್ನು ಮಾತ್ರ ಸೋಲು ಅನುಭವಿಸಿತ್ತು.

2017 - ಚಾಂಪಿಯನ್ಸ್ ಟ್ರೋಫಿ - ಭಾರತ vs ಪಾಕಿಸ್ತಾನ ಫೈನಲ್: ಪ್ರಶಸ್ತಿ ಹಂತದ ಪಂದ್ಯದಲ್ಲಿ ಭಾರತ ತಂಡಕ್ಕೆ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ತಂಡ 180 ರನ್‌ಗಳ ಆಘಾತ ನೀಡಿತ್ತು. ಈ ಟೂರ್ನಿಯ ಲೀಗ್ ಹಂತದಲ್ಲೂ ಭಾರತ ಕೇವಲ 1 ಪಂದ್ಯದಲ್ಲಿ ಮಾತ್ರ ಸೋಲು ಕಂಡಿತ್ತು.

2019 - ಏಕದಿನ ವಿಶ್ವಕಪ್- ಭಾರತ vs ನ್ಯೂಜಿಲೆಂಡ್ ಸೆಮಿಫೈನಲ್: ಈ ಪಂದ್ಯದಲ್ಲಿ ಕಿವೀಸ್ ತಂಡ ಭಾರತ ವಿರುದ್ಧ 180 ರನ್‌ಗಳ ಜಯಭೇರಿ ಬಾರಿಸಿತು. ಈ ಏಕದಿನ ವಿಶ್ವಕಪ್‌ನಲ್ಲೂ ಭಾರತ ಲೀಗ್ ಹಂತದಲ್ಲಿ ಒಂದು ಸೋಲು ಕಂಡಿತ್ತು.

2021 - ಐಸಿಸಿ ಟೆಸ್ಟ್ ಚಾಂಪಿಯನ್ ಶಿಪ್ - ಭಾರತ vs ನ್ಯೂಜಿಲೆಂಡ್: ಫೈನಲ್‌ ಪಂದ್ಯದಲ್ಲಿ ಭಾರತ ತಂಡಕ್ಕೆ ಮತ್ತೊಮ್ಮೆ ನಿರಾಸೆ ಕಾಡಿತು, ಕಿವೀಸ್‍ಗೆ 8 ವಿಕೆಟ್ ಗೆಲುವು ದಕ್ಕಿತು. ಈ ಚಾಂಪಿಯನ್‌ಶಿಪ್‌ನಲ್ಲಿ ಭಾರತ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಪಡೆದಿತ್ತು.

2022 - ಟಿ20 ವಿಶ್ವಕಪ್ ಸೆಮಿಫೈನಲ್ - ಭಾರತ vs ಇಂಗ್ಲೆಂಡ್; ಇಂಗ್ಲೆಂಡ್‍ 10 ವಿಕೆಟ್‌ಗಳಿಂದ ಗೆದ್ದು, ಫೈನಲ್ ತಲುಪಿತ್ತು. ಈ ಲೀಗ್‌ನಲ್ಲೂ ಭಾರತ 1 ಪಂದ್ಯದಲ್ಲಿ ಮಾತ್ರ ಸೋಲು ಕಂಡಿತ್ತು.

2023 - ಐಸಿಸಿ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್- ಭಾರತ vs ಆಸ್ಟ್ರೇಲಿಯಾ: ಸತತ ಎರಡನೇ ಬಾರಿ ಸತತ ಫೈನಲ್ ಪ್ರವೇಶಿಸಿದ್ದ ಭಾರತ ತಂಡ ಟ್ರೋಫಿ ಗೆಲ್ಲುವಲ್ಲಿ ಎಡವಿತ್ತು. ಈ ಚಾಂಪಿಯನ್‌ಶಿಪ್‌ನಲ್ಲೂ ಭಾರತ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಕಾಯ್ದುಕೊಂಡಿತ್ತು.