World Cup 2023: ವಿಶ್ವಕಪ್ ತಂಡ ತೊರೆದು ತವರಿಗೆ ಮರಳಿದ ಬಾಂಗ್ಲಾದೇಶ ಸ್ಟಾರ್ ಬ್ಯಾಟ್ಸ್‌ಮನ್; ಕಾರಣವೇನು?

ಬಾಂಗ್ಲಾದೇಶ ತಂಡದ ಸ್ಟಾರ್ ಬ್ಯಾಟರ್ ಲಿಟ್ಟನ್ ದಾಸ್ ಅವರು ಕುಟುಂಬ ತುರ್ತುಸ್ಥಿತಿ ಕಾರಣದಿಂದಾಗಿ 2023ರ ಐಸಿಸಿ ಏಕದಿನ ವಿಶ್ವಕಪ್ ಪಂದ್ಯಾವಳಿ ಮಧ್ಯದಲ್ಲಿ ತವರಿಗೆ ಮರಳಿದ್ದು, ಬಾಂಗ್ಲಾ ಹುಲಿಗಳಿಗೆ ಹಿನ್ನಡೆ ಉಂಟಾಗಿದೆ.

ಆದಾಗ್ಯೂ, ದಿನಾಜ್‌ಪುರ ಮೂಲದ ಕ್ರಿಕೆಟಿಗ ತಂಡದ ತರಬೇತಿ ಅವಧಿಗೂ ಮುನ್ನ ಶುಕ್ರವಾರ, ನವೆಂಬರ್ 3ರಂದು ಬಾಂಗ್ಲಾದೇಶ ರಾಷ್ಟ್ರೀಯ ತಂಡವನ್ನು ಸೇರಿಕೊಳ್ಳಲಿದ್ದಾರೆ.

ಲಿಟ್ಟನ್ ದಾಸ್ ಕುರಿತ ಬೆಳವಣಿಗೆಗಳನ್ನು ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿಯ (ಬಿಸಿಬಿ) ಮಾಧ್ಯಮ ಮತ್ತು ಸಂವಹನ ವ್ಯವಸ್ಥಾಪಕ ರಬೀದ್ ಇಮಾಮ್ ದೃಢಪಡಿಸಿದ್ದಾರೆ.

"ತಮ್ಮ ಕುಟುಂಬದ ತುರ್ತುಪರಿಸ್ಥಿತಿಯಿಂದಾಗಿ, ಲಿಟ್ಟನ್ ದಾಸ್ ರಜೆ ತೆಗೆದುಕೊಂಡಿದ್ದಾರೆ ಮತ್ತು ನವೆಂಬರ್ 3ರಂದು ದೆಹಲಿಯಲ್ಲಿ ನಿಗದಿಪಡಿಸಲಾದ ತಂಡದ ಅಭ್ಯಾಸ ಅವಧಿಗೆ ಮುಂಚಿತವಾಗಿ ತಂಡವನ್ನು ಸೇರಿಕೊಳ್ಳುತ್ತಾರೆ," ಎಂದು ರಬೀದ್ ಇಮಾಮ್ ಅವರು ದಿ ಡೈಲಿ ಸ್ಟಾರ್‌ಗೆ ತಿಳಿಸಿದ್ದಾರೆ.

ವರದಿಗಳ ಪ್ರಕಾರ, 29 ವರ್ಷದ ಬಾಂಗ್ಲಾದೇಶ ತಂಡದ ಕ್ರಿಕೆಟಿಗ ಲಿಟ್ಟನ್ ದಾಸ್ ಮತ್ತು ಅವರ ಪತ್ನಿ ದೆಬೋಸ್ರಿ ಬಿಸ್ವಾಸ್ ಸೋಂಚಿತಾ ತಮ್ಮ ಮೊದಲ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ.

ಲಿಟ್ಟನ್ ದಾಸ್ ಶುಕ್ರವಾರವೇ ಹಿಂದಿರುಗಲಿರುವುದರಿಂದ, ನವದೆಹಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ಸೋಮವಾರ, ನವೆಂಬರ್ 6ರಂದು ಶ್ರೀಲಂಕಾ ವಿರುದ್ಧ ಬಾಂಗ್ಲಾದೇಶ ತಂಡದ ಅಂತಿಮ ಲೀಗ್ ಪಂದ್ಯದಲ್ಲಿ ಆಡುವ ನಿರೀಕ್ಷೆಯಿದೆ.

ಆಡಿದ ಏಳು ಪಂದ್ಯಗಳಲ್ಲಿ ಲಿಟ್ಟನ್ ದಾಸ್ 32.14ರ ಸರಾಸರಿಯಲ್ಲಿ 225 ರನ್ ಗಳಿಸಿದ್ದಾರೆ ಮತ್ತು 78.39ರ ಸ್ಟ್ರೈಕ್ ರೇಟ್‌ನೊಂದಿಗೆ ಎರಡು ಅರ್ಧಶತಕಗಳು ಮತ್ತು ಇಂಗ್ಲೆಂಡ್ ವಿರುದ್ಧ ಧರ್ಮಶಾಲಾ ಸ್ಟೇಡಿಯಂನಲ್ಲಿ ಅತ್ಯುತ್ತಮ ಸ್ಕೋರ್ 76 ರನ್ ಗಳಿಸಿದ್ದಾರೆ.

2023ರ ಏಕದಿನ ವಿಶ್ವಕಪ್‌ನ ಅಂಕಪಟ್ಟಿಯಲ್ಲಿ ಒಂಬತ್ತನೇ ಸ್ಥಾನದಲ್ಲಿರುವ ಬಾಂಗ್ಲಾದೇಶ ತಂಡ 2023ರ ವಿಶ್ವಕಪ್‌ನಿಂದ ಅಧಿಕೃತವಾಗಿ ಹೊರಬಿದ್ದ ಮೊದಲ ತಂಡವಾಗಿದೆ.

ಆದರೆ, ಶ್ರೀಲಂಕಾ ಮತ್ತು ಆಸ್ಟ್ರೇಲಿಯಾ ವಿರುದ್ಧದ ಮುಂದಿನ ಎರಡು ಪಂದ್ಯಗಳನ್ನು ಗೆದ್ದರೆ, ಪಾಕಿಸ್ತಾನದಲ್ಲಿ ನಡೆಯುವ 2025ರ ಚಾಂಪಿಯನ್ಸ್ ಟ್ರೋಫಿಗೆ ಅರ್ಹತೆ ಪಡೆಯುವ ಅವಕಾಶವನ್ನು ಬಾಂಗ್ಲಾದೇಶ ತಂಡ ಇನ್ನೂ ಹೊಂದಿದೆ.

ಧರ್ಮಶಾಲಾದಲ್ಲಿ ಹಶ್ಮತುಲ್ಲಾ ಶಾಹಿದಿ ನಾಯಕತ್ವದ ಅಫ್ಘಾನಿಸ್ತಾನ ವಿರುದ್ಧ ಶಕೀಬ್ ಅಲ್ ಹಸನ್ ಪಡೆ ಆರು ವಿಕೆಟ್‌ಗಳ ಗೆಲುವಿನೊಂದಿಗೆ ತಮ್ಮ ಅಭಿಯಾನ ಪ್ರಾರಂಭಿಸಿದರು.

ಆದರೆ, ಆ ಬಳಿಕ ಸತತ ಆರು ಪಂದ್ಯಗಳಲ್ಲಿ ಸೋತಿದೆ. ಲಿಟ್ಟನ್ ದಾಸ್ ಮತ್ತು ಮಹಮ್ಮದುಲ್ಲಾ ರಿಯಾದ್ ಹೊರತುಪಡಿಸಿ, ಬಾಂಗ್ಲಾದೇಶದ ಯಾವುದೇ ಬ್ಯಾಟರ್‌ಗಳು ಪ್ರತಿರೋಧ ನೀಡಲು ವಿಫಲರಾಗಿದ್ದಾರೆ.