ರಹಾನೆ ಹೊಗಳಿದರೆ ಮುಂಬೈಯವನ ಹೊಗಳಿದೆ ಎನ್ನುತ್ತಾರೆ: ಗವಾಸ್ಕರ್

ಮೆಲ್ಬರ್ನ್: ಆಸ್ಟ್ರೇಲಿಯಾ ವಿರುದ್ಧದ ದ್ವಿತೀಯ ಟೆಸ್ಟ್‌ನಲ್ಲಿ ಅಜಿಂಕ್ಯ ರಹಾನೆಯವರ ಫೀಲ್ಡ್‌ ಸೆಟ್ಟಿಂಗ್‌ಗೆ ಮಾಜಿ ಬ್ಯಾಟ್ಸ್‌ಮನ್ ಸುನಿಲ್‌ ಗವಾಸ್ಕರ್ ಪ್ರಭಾವಿತರಾಗಿದ್ದಾರೆ. ಹಾಗಂತ ರಹಾನೆಯನ್ನು ಹೊಗಳಿದರೆ ಅದನ್ನೂ ತಪ್ಪಾಗಿ ಅರ್ಥೈಸಲಾಗುತ್ತದೆ ಎಂದು ಗವಾಸ್ಕರ್ ಹೇಳಿದ್ದಾರೆ.

ಆರಂಭಿಕ ಪಂದ್ಯದಲ್ಲಿ ಹೀನಾಯ ಸೋಲು ಕಂಡಿದ್ದ ಭಾರತ ತಂಡ ದ್ವಿತೀಯ ಟೆಸ್ಟ್‌ನ ಆರಂಭಿಕ ಇನ್ನಿಂಗ್ಸ್‌ನಲ್ಲಿ ಉತ್ತಮ ಬೌಲಿಂಗ್, ಫೀಲ್ಡಿಂಗ್‌ ಪ್ರದರ್ಶಿಸಿತ್ತು. ಆರಂಭಿಕ ಟೆಸ್ಟ್‌ನಲ್ಲಿ ಎಂದಿನ ನಾಯಕ ವಿರಾಟ್ ಕೊಹ್ಲಿ ತಂಡ ಮುನ್ನಡೆಸಿದ್ದರೆ, ದ್ವಿತೀಯ ಟೆಸ್ಟ್‌ನಲ್ಲಿ ನಾಯಕತ್ವದ ಜವಾಬ್ದಾರಿ ಅಜಿಂಕ್ಯ ರಹಾನೆ ವಹಿಸಿಕೊಂಡಿದ್ದರು.

ಸೋನಿ ಸ್ಪೋರ್ಟ್ಸ್ ನೆಟ್ವರ್ಕ್ ಜೊತೆ ಮಾತನಾಡಿದ ಸುನಿಲ್ ಗವಾಸ್ಕರ್ ತಮಾಷೆಯಾಗಿ, 'ಯಾವುದೇ ವಿಚಾರಕ್ಕೂ ನಾವು ಒಂದೇ ಕ್ಷಣಕ್ಕೆ ನಿರ್ಧಾರಕ್ಕೆ ಬರಬಾರದು. ನಾನು ಒಂದು ವೇಳೆ ಅಜಿಂಕ್ಯ ರಹಾನೆ ನಾಯಕತ್ವ ಅದ್ಭುತವಾಗಿದೆ ಎಂದರೆ, ನಾನು ಮುಂಬೈ ಹುಡುಗನಿಗೆ ಬೆಂಬಲಿಸುತ್ತಿದ್ದೇನೆ ಎಂದು ದೂರಲ್ಪಡುತ್ತೇನೆ. ಚರ್ಚೆಗಳಾಗುತ್ತವೆ,' ಎಂದಿದ್ದಾರೆ.

ಟಾಸ್ ಗೆದ್ದು ಬ್ಯಾಟಿಂಗ್‌ ಆಯ್ದುಕೊಂಡಿದ್ದ ಆಸ್ಟ್ರೇಲಿಯಾವನ್ನು ಟೀಮ್ ಇಂಡಿಯಾ 195 ರನ್‌ಗೆ ಕಟ್ಟಿ ಹಾಕಿತ್ತು. ರವಿಚಂದ್ರನ್ ಅಶ್ವಿನ್ 3, ಜಸ್‌ಪ್ರೀತ್‌ ಬೂಮ್ರಾ 4 ವಿಕೆಟ್‌ ಪಡೆದು ಮಿಂಚಿದ್ದರೆ, ಅಜಿಂಕ್ಯ ರಹಾನೆಯ ನಾಯಕತ್ವ, ಫೀಲ್ಡ್‌ ಸೆಟ್ಟಿಂಗ್‌ ಕೂಡ ಗಮನ ಸೆಳೆದಿತ್ತು. ರಹಾನೆಯನ್ನು ವೀರೇಂದ್ರ ಸೆಹ್ವಾಗ್, ಗ್ಲೆನ್ ಮೆಗ್ರಾತ್, ವಿವಿಎಸ್‌ಲಕ್ಷ್ಮಣ್ ಸೇರಿದಂತೆ ಹಲವಾರು ಮಂದಿ ಶ್ಲಾಘಿಸಿದ್ದರು.