IND vs AFG: ದೆಹಲಿಯಲ್ಲಿ ಸಂಚಾರ ನಿರ್ಬಂಧ; ಸ್ಟೇಡಿಯಂಗೆ ಹೋಗುವ ಮುನ್ನ ಈ ರೂಟ್ ಮ್ಯಾಪ್ ನೋಡಿ

ಇಂದು, ಅಂದರೆ 2026ರ ಸೆಪ್ಟೆಂಬರ್ 13ರ ಭಾನುವಾರ, ದೆಹಲಿಯಲ್ಲಿ ಮಧ್ಯಾಹ್ನ 2 ಗಂಟೆಯಿಂದಲೇ ಸಂಚಾರ ನಿರ್ಬಂಧ ಜಾರಿಯಾಗಲಿದೆ. ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ನಡೆಯಲಿರುವ ಭಾರತ ಮತ್ತು ಅಫ್ಘಾನಿಸ್ತಾನ ನಡುವಿನ ಟಿ20 ಪಂದ್ಯದ ಹಿನ್ನೆಲೆಯಲ್ಲಿ ದೆಹಲಿ ಸಂಚಾರ ಪೊಲೀಸರು ಈ ಸಂಚಾರ ಸಲಹೆ ಬಿಡುಗಡೆ ಮಾಡಿದ್ದಾರೆ. ಪಂದ್ಯ ಮುಗಿದ ನಂತರ ಭಾರೀ ಜನಸಂದಣಿ ಇರುವುದರಿಂದ ರಾತ್ರಿ 10:30ರವರೆಗೆ ಈ ನಿರ್ಬಂಧಗಳು ಮುಂದುವರಿಯಲಿವೆ. ಇದರ ಜೊತೆಗೆ ನಗರದ ಪ್ರಮುಖ ರಸ್ತೆಗಳಲ್ಲಿ ಬ್ರಿಕ್ಸ್ (BRICS) ಶೃಂಗಸಭೆಯ ಕಟ್ಟುನಿಟ್ಟಿನ ಭದ್ರತೆಯೂ ಇರಲಿದ್ದು, ರಸ್ತೆ ಸಂಚಾರದಲ್ಲಿ ಬದಲಾವಣೆಗಳನ್ನು ಮಾಡಲಾಗಿದೆ. ಹೀಗಾಗಿ, ವಾಹನ ಸವಾರರು ಸ್ಟೇಡಿಯಂ ಸುತ್ತಮುತ್ತಲಿನ ರಸ್ತೆಗಳ ಬದಲಿಗೆ ಪರ್ಯಾಯ ಮಾರ್ಗಗಳನ್ನು ಬಳಸುವುದು ಒಳಿತು.

ಮಧ್ಯಾಹ್ನದ ನಂತರ ಯಾವೆಲ್ಲ ರಸ್ತೆಗಳಲ್ಲಿ ಟ್ರಾಫಿಕ್ ಜಾಮ್ ಉಂಟಾಗಬಹುದು ಎಂಬುದನ್ನು ದೆಹಲಿ ಸಂಚಾರ ಪೊಲೀಸರು ಗುರುತಿಸಿದ್ದಾರೆ. ದೆಹಲಿ ಗೇಟ್ ಮತ್ತು ಐಟಿಒ ನಡುವಿನ ಬಹದ್ದೂರ್ ಶಾ ಝಫರ್ ಮಾರ್ಗದಲ್ಲಿ ಸಂಚರಿಸುವುದನ್ನು ತಪ್ಪಿಸಿ. ರಾಜ್‌ಘಾಟ್‌ನಿಂದ ದೆಹಲಿ ಗೇಟ್ ಮತ್ತು ಕಮ್ಲಾ ಮಾರ್ಕೆಟ್ ಕಡೆಗೆ ಹೋಗುವ ಜವಾಹರಲಾಲ್ ನೆಹರೂ ಮಾರ್ಗವನ್ನೂ ಬಳಸಬೇಡಿ. ತುರ್ಕಮಾನ್ ಗೇಟ್‌ನಿಂದ ದೆಹಲಿ ಗೇಟ್‌ಗೆ ಸಂಪರ್ಕಿಸುವ ಆಸಫ್ ಅಲಿ ರಸ್ತೆಯನ್ನು ಪಾಸ್ ಮಾಡಿ. ಇನ್ನು ದೀನ್ ದಯಾಳ್ ಉಪಾಧ್ಯಾಯ ಮಾರ್ಗದಿಂದ ಮಿಂಟೋ ರೋಡ್ ಮತ್ತು ಮಿರ್ದಾರ್ದ್ ಚೌಕ್ ಕಡೆಗೆ ನಿರ್ಬಂಧಗಳಿರಲಿವೆ. ರಾಜಘಾಟ್ ಮತ್ತು ಐಪಿ ಫ್ಲೈಓವರ್ ನಡುವಿನ ರಿಂಗ್ ರೋಡ್‌ನಲ್ಲಿ ಕೆಲವೊಮ್ಮೆ ರಸ್ತೆ ಬದಲಾವಣೆಗಳು ಇರಲಿವೆ.

IND vs AFG ಪಂದ್ಯ: ಕೊಟ್ಲಾಗೆ ಮೆಟ್ರೋ ಮತ್ತು ಪಾರ್ಕಿಂಗ್ ಪ್ಲಾನ್

ಬ್ರಿಕ್ಸ್ ಶೃಂಗಸಭೆಯ ಭದ್ರತೆ ಮತ್ತು ರಸ್ತೆ ಬದಲಾವಣೆಗಳ ನಡುವೆ, ಕ್ರೀಡಾಂಗಣ ತಲುಪಲು ದೆಹಲಿ ಮೆಟ್ರೋ ಅತ್ಯಂತ ವೇಗದ ಮತ್ತು ಸೂಕ್ತ ಮಾರ್ಗವಾಗಿದೆ. ದೆಹಲಿ ಗೇಟ್ ಮೆಟ್ರೋ ನಿಲ್ದಾಣದ ಗೇಟ್ 4 ಮತ್ತು 5 ಅಥವಾ ಐಟಿಒ ನಿಲ್ದಾಣದ ಗೇಟ್ 3 ರಿಂದ 5 ಅನ್ನು ಬಳಸಿ. ಈ ಎರಡೂ ನಿಲ್ದಾಣಗಳಿಂದ ಸ್ಟೇಡಿಯಂ ಪ್ರವೇಶ ದ್ವಾರಗಳು ನಡೆದುಕೊಂಡು ಹೋಗುವಷ್ಟು ಸಮೀಪದಲ್ಲಿವೆ. ರಶ್ ಇರುವ ಸಮಯದಲ್ಲಿ ಕನಿಷ್ಠ 20 ನಿಮಿಷ ಹೆಚ್ಚುವರಿ ಸಮಯವನ್ನು ಇಟ್ಟುಕೊಂಡು ಹೊರಡಿ. ಗೇಟ್ ಬದಲಾವಣೆಗಳಿದ್ದರೆ ತಕ್ಷಣ ತಿಳಿಯಲು ದೆಹಲಿ ಸಂಚಾರ ಪೊಲೀಸರ ಅಧಿಕೃತ ಸೋಶಿಯಲ್ ಮೀಡಿಯಾ ಪೇಜ್‌ಗಳ ಲೈವ್ ಅಪ್‌ಡೇಟ್ ನೋಡುತ್ತಿರಿ.

IND vs AFG ಸಂಚಾರ ನಿರ್ಬಂಧ: ಪಾರ್ಕ್ ಆಂಡ್ ರೈಡ್, ಕ್ಯಾಬ್ ಹಾಗೂ ಟೋಯಿಂಗ್ ನಿಯಮಗಳು

ಮಾತಾ ಸುಂದರಿ ರಸ್ತೆ, ರಾಜ್‌ಘಾಟ್ ಪವರ್ ಹೌಸ್ ರಸ್ತೆ ಮತ್ತು ವೇಲೋಡ್ರೋಮ್ ರಸ್ತೆಗಳಲ್ಲಿ ಉಚಿತ 'ಪಾರ್ಕ್ ಆಂಡ್ ರೈಡ್' ಸೌಲಭ್ಯ ಕಲ್ಪಿಸಲಾಗಿದೆ. ಇಲ್ಲಿ ವಾಹನ ನಿಲ್ಲಿಸಿ, ಶಟಲ್ ಬಸ್ ಅಥವಾ ಕಾಲ್ನಡಿಗೆ ಮೂಲಕ ಕೊಟ್ಲಾ ಸ್ಟೇಡಿಯಂ ಗೇಟ್ ತಲುಪಬಹುದು. ಆ್ಯಪ್ ಆಧಾರಿತ ಕ್ಯಾಬ್‌ಗಳಲ್ಲಿ ಬರುವವರು ಎಂಎಎಂಸಿ ಗೇಟ್ 2 ಮತ್ತು ರಾಜ್‌ಘಾಟ್ ಚೌಕ್ ಬಳಿಯ ನಿಗದಿಪಡಿಸಿದ ಪಿಕ್-ಅಪ್ ಮತ್ತು ಡ್ರಾಪ್ ಪಾಯಿಂಟ್‌ಗಳನ್ನೇ ಬಳಸಬೇಕು. ಮಾನ್ಯವಾದ ಪಾಸ್ ಇಲ್ಲದ ವಾಹನಗಳನ್ನು ಸ್ಟೇಡಿಯಂ ಬಳಿ ಪಾರ್ಕ್ ಮಾಡಲು ಅವಕಾಶವಿಲ್ಲ; ಅಂತಹ ವಾಹನಗಳನ್ನು ಟೋ (ಟೋಯಿಂಗ್) ಮಾಡಲಾಗುತ್ತದೆ. ಆದ್ದರಿಂದ ಬೇಗನೇ ಆಗಮಿಸಿ ಪಾರ್ಕಿಂಗ್ ಜಾಗ ಕಾಯ್ದಿರಿಸಿ, ನಂತರ ಮೆಟ್ರೋ ಅಥವಾ ಶಟಲ್ ಬಸ್ ಬಳಸಿ.

IND vs AFG ನಿಷೇಧಿತ ವಸ್ತುಗಳು ಮತ್ತು ಪ್ರವೇಶಕ್ಕೆ ಪ್ರಮುಖ ಸಲಹೆಗಳು

ಸ್ಟೇಡಿಯಂ ಬಳಿ ಕಟ್ಟುನಿಟ್ಟಿನ ಭದ್ರತಾ ತಪಾಸಣೆ ಇರಲಿದ್ದು, ಪೊಲೀಸರು ನಿಷೇಧಿಸಿರುವ ವಸ್ತುಗಳನ್ನು ತರಬೇಡಿ. ಲ್ಯಾಪ್‌ಟಾಪ್, ಕ್ಯಾಮೆರಾ, ಹೆಲ್ಮೆಟ್, ಬ್ಯಾಗ್‌ಗಳು, ತಿಂಡಿ-ತಿನಿಸುಗಳು, ನೀರಿನ ಬಾಟಲಿ, ಪವರ್ ಬ್ಯಾಂಕ್, ಲೈಟರ್, ಬೆಂಕಿಕಡ್ಡಿ ಪೆಟ್ಟಿಗೆ, ಚಾಕು ಹಾಗೂ ಇತರೆ ಚೂಪಾದ ವಸ್ತುಗಳನ್ನು ಕೊಂಡೊಯ್ಯುವುದನ್ನು ಕಡ್ಡಾಯವಾಗಿ ನಿಷೇಧಿಸಲಾಗಿದೆ. ನಿಮ್ಮ ಟಿಕೆಟ್‌ನ ಬಾರ್‌ಕೋಡ್ ಸಿದ್ಧವಾಗಿಟ್ಟುಕೊಳ್ಳಿ ಮತ್ತು ಕೇಳಿದಾಗ ತೋರಿಸಲು ಗುರುತಿನ ಚೀಟಿ (ID) ಜೊತೆಯಲ್ಲಿಟ್ಟುಕೊಳ್ಳಿ. ಗೇಟ್ ಬಳಿ ನೆಟ್‌ವರ್ಕ್ ಸಮಸ್ಯೆಯಿಂದ ತಪ್ಪಿಸಿಕೊಳ್ಳಲು ಇ-ಟಿಕೆಟ್‌ಗಳನ್ನು ಆಫ್‌ಲೈನ್‌ನಲ್ಲಿ ಸೇವ್ ಮಾಡಿಟ್ಟುಕೊಳ್ಳಿ. ಇನ್ನು ಪಂದ್ಯ ಮುಗಿಯಲು 1-2 ಓವರ್ ಇರುವಾಗಲೇ ಹೊರಬಂದರೆ ಮೆಟ್ರೋದ ರಶ್‌ನಿಂದ ಬಚಾವ್ ಆಗಬಹುದು.