Ind vs Aus: ರೋಹಿತ್, ಜಡೇಜಾ, ಅಕ್ಷರ್ ಬೊಂಬಾಟ್ ಆಟ: ಬೃಹತ್ ಮುನ್ನಡೆಯತ್ತ ಭಾರತ

ಟೀಮ್ ಇಂಡಿಯಾ ನಾಯಕನ ಸುಂದರ ಇನ್ನಿಂಗ್ಸ್

ಇನ್ನು ಈ ಪಂದ್ಯದಲ್ಲಿ ಉಳಿದೆಲ್ಲಾ ಬ್ಯಾಟರ್‌ಗಳು ಕ್ರೀಸ್‌ನಲ್ಲಿ ನಲೆಯೂರಲು ಹರಸಾಹಸ ಪಡುತ್ತಿದ್ದರೆ ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ ಮಾತ್ರ ಅದ್ಭುತವಾಗಿ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಮೊದಲ ದಿನದಾಟದಲ್ಲಿಯೇ ಅದ್ಭುತ ಲಯವನ್ನು ಪ್ರದರ್ಶಿಸಿದ್ದ ರೋಹಿತ್ ಎರಡನೇ ದಿನವೂ ತಮ್ಮ ಪಾರ್ಮ್ ಮುಂದುವರಿಸಿದರು. 212 ರನ್‌ಗಳನ್ನು ಎದುರಿಸಿದ ರೋಹಿತ್ ಶರ್ಮಾ 120 ರನ್‌ಗಳನ್ನು ಗಳಿಸಿ ಪ್ಯಾಟ್ ಕಮ್ಮಿನ್ಸ್‌ಗೆ ವಿಕೆಟ್ ಒಪ್ಪಿಸಿದರು. ಈ ಮೂಲಕ ಭಾರತದ ದೊಡ್ಡ ಮೊತ್ತಕ್ಕೆ ಕಾರಣವಾದರು.

ಜಡೇಜಾ, ಅಕ್ಷರ್ ಬೊಂಬಾಟ್ ಜೊತೆಯಾಟ

ಇನ್ನು ಈ ಪಂದ್ಯದಲ್ಲಿ ರೋಹಿತ್ ಶರ್ಮಾ ಹೊರತುಪಡಿಸಿದರೆ ಉಳಿದೆಲ್ಲಾ ದಾಂಡಿಗರು ಕೂಡ ಕ್ರೀಸ್‌ನಲ್ಲಿ ನೆಲೆಯೂರಲು ಪ್ರಯಾಸ ಪಟ್ಟರೆ ಆಲ್‌ರೌಂಡರ್ಗಳಾದ ರವೀಂದ್ರ ಜಡೇಜಾ ಹಾಗೂ ಅಕ್ಷರ್ ಪಟೇಲ್ ಅಮೋಘ ಜೊತೆಯಾಟವನ್ನು ಆಡುವ ಮೂಲಕ ತಂಡವನ್ನು ಮತ್ತಷ್ಟು ಸುಸ್ಥಿತಿಗೆ ತಂದಿದ್ದಾರೆ. ಈ ಇಬ್ಬರು ಆಟಗಾರರು ಕೂಡ ತಮ್ಮ ಅರ್ಧ ಶತಕವನ್ನು ಸಿಡಿಸಿದ್ದು ಅಜೇಯ 81 ರನ್‌ಗಳ ಜೊತೆಯಾಟ ನೀಡಿದ್ದಾರೆ. ರವೀಂದ್ರ ಜಡೇಜಾ 66 ರನ್‌ಗಳಿಸಿದರೆ ಅಕ್ಷರ್ ಪಟೇಲ್ 52 ರನ್‌ಗಳಿಸಿ ಮೂರನೇ ದಿನಕ್ಕೆ ಕ್ರೀಸ್‌ ಕಾಯ್ದಿರಿಸಿದ್ದಾರೆ.

ಐದು ವಿಕೆಟ್ ಕಿತ್ತ ಟಾಪ್ ಮರ್ಫಿ

ಇನ್ನು ಈ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡದ ಪರವಾಗಿ ಅದ್ಭುತ ಪ್ರದರ್ಶನ ನೀಡಿ ಭಾರತಕ್ಕೆ ಆಘಾತ ನೀಡಿದ್ದು ಯುವ ಸ್ಪಿನ್ನರ್ ಟಾಡ್ ಮರ್ಫಿ. ಭಾರತ ಐವರು ಬ್ಯಾಟರ್‌ಗಳನ್ನು ಫೆವಿಲಿಯನ್‌ಗೆ ಅಡ್ಡಿದ ಮರ್ಫಿ ಚೊಚ್ಚಲ ಪಂದ್ಯದಲ್ಲಿಯೇ ಐದು ವಿಕೆಟ್‌ಗಳ ಗೊಂಚಲು ಪಡೆದಿದ್ದಾರೆ. ಕೆಎಲ್ ರಾಹುಲ್, ಆರ್ ಅಶ್ವಿನ್, ಚೇತೇಶ್ವರ್ ಪೂಜಾರ, ವಿರಾಟ್ ಕೊಹ್ಲಿ ಹಾಗೂ ಕೆಎಲ್ ಭರತ್ ವಿಕೆಟ್ ಪಡೆದು ಆಸ್ಟ್ರೇಲಿಯಾ ತಂಡಕ್ಕೆ ಯಶಸ್ಸು ತಂದುಕೊಟ್ಟರು. ಆದರೆ ಇತರ ಬೌಲರ್‌ಗಳಿಂದ ಆಸಿಸ್ ತಂಡಕ್ಕೆ ಹೆಚ್ಚಿನ ನೆರವು ದೊರೆಯಲಿಲ್ಲ.