Pitch Rating: ಬಾರ್ಡರ್ ಗವಾಸ್ಕರ್ ಸರಣಿಯ ಪಿಚ್ ರೇಟಿಂಗ್ ಬಿಡುಗಡೆ ಮಾಡಿದ ಐಸಿಸಿ

ಬಾರ್ಡರ್ ಗವಾಸ್ಕರ್ ಟ್ರೋಫಿ ಟೆಸ್ಟ್ ಸರಣಿಯಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ಆಡಿದ ಎಲ್ಲಾ ಪಂದ್ಯಗಳ ಪಿಚ್ ರೇಟಿಂಗ್ ಅನ್ನು ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) ಬಿಡುಗಡೆ ಮಾಡಿದೆ. 10 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ, ಐದು ಪಂದ್ಯಗಳ ಬಾರ್ಡರ್ ಗವಾಸ್ಕರ್ ಟ್ರೋಫಿ ಟೆಸ್ಟ್ ಸರಣಿಯನ್ನು ಆಸ್ಟ್ರೇಲಿಯಾ ಗೆದ್ದಿದೆ. ಭಾರತವನ್ನು 3-1 ಅಂತರದಲ್ಲಿ ಸೋಲಿಸುವ ಆಸ್ಟ್ರೇಲಿಯಾ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ (ಡಬ್ಲ್ಯೂಟಿಸಿ) ಫೈನಲ್‌ಗೆ ಮುನ್ನಡೆದಿದೆ. ಭಾರತ ತಂಡಕ್ಕೆ ಮೂರನೇ ಬಾರಿಗೆ ಆಸ್ಟ್ರೇಲಿಯಾದಲ್ಲಿ ಬಾರ್ಡರ್ ಗವಾಸ್ಕರ್ ಟ್ರೋಫಿಯನ್ನು ಗೆಲ್ಲುವ ಅವಕಾಶವಿತ್ತು. ಆದರೆ ರೋಹಿತ್ ಶರ್ಮಾ ನೇತೃತ್ವದ ಭಾರತ ತಂಡವು ಯಶಸ್ವಿಯಾಗಲಿಲ್ಲ.

ಆಸ್ಟ್ರೇಲಿಯಾದ ಪರ್ತ್, ಅಡಿಲೇಡ್, ಬ್ರಿಸ್ಬೇನ್, ಮೆಲ್ಬೋರ್ನ್ ಮತ್ತು ಸಿಡ್ನಿ ಪಿಚ್‌ಗಳಲ್ಲಿ ಭಾರತ ಪಂದ್ಯಗಳನ್ನು ಆಡಿತ್ತು. ಇವುಗಳಲ್ಲಿ ಸಿಡ್ನಿ ಪಿಚ್ ಹೊರತುಪಡಿಸಿ ಉಳಿದೆಲ್ಲ ಪಿಚ್‌ಗಳು ಐಸಿಸಿಯಿಂದ ಅತ್ಯುತ್ತಮ ರೇಟಿಂಗ್ ಪಡೆದಿವೆ. ಪ್ರತಿಷ್ಠಿತ ಸಿಡ್ನಿ ಕ್ರಿಕೆಟ್ ಮೈದಾನಕ್ಕೆ ಐಸಿಸಿ ಸರಾಸರಿ ರೇಟಿಂಗ್ ನೀಡಿದೆ. ಅದರ ಫಲಿತಾಂಶವು ಕೇವಲ ಮೂರು ದಿನಗಳಲ್ಲಿ ಆಸ್ಟ್ರೇಲಿಯಾದ ಪರವಾಗಿ ಹೋಯಿತು. ಮೊದಲ ನಾಲ್ಕು ಪಂದ್ಯಗಳ ಪಿಚ್‌ಗೆ ಐಸಿಸಿಯಿಂದ ಉತ್ತಮ ರೇಟಿಂಗ್ ಸಿಕ್ಕಿದೆ. ಸಿಡ್ನಿ ಪಿಚ್‌ಗೆ 'ತೃಪ್ತಿದಾಯಕ' ರೇಟಿಂಗ್ ಸಿಕ್ಕಿದೆ.

ಸಿಡ್ನಿ ಮೈದಾನವು ಬಾರ್ಡರ್-ಗವಾಸ್ಕರ್ ಟ್ರೋಫಿ ಸರಣಿಯ ಕೊನೆಯ ಟೆಸ್ಟ್ ಪಂದ್ಯವನ್ನು ಆಯೋಜಿಸಿತ್ತು. ಅತಿಯಾದ ಸೀಮ್ ಚಲನೆ ಮತ್ತು ಬೌನ್ಸ್ ಅನೇಕ ದಿಗ್ಗಜ ಮಾಜಿ ಕ್ರಿಕೆಟಿಗರನ್ನು ಆಶ್ಚರ್ಯಗೊಳಿಸಿತು. ಸಿಡ್ನಿ ಪಿಚ್‌ನ ಅಸಾಮಾನ್ಯ ವರ್ತನೆಗೆ ಸುನಿಲ್ ಗವಾಸ್ಕರ್ ಮತ್ತು ಜಸ್ಟಿನ್ ಲ್ಯಾಂಗರ್ ಆಶ್ಚರ್ಯ ವ್ಯಕ್ತಪಡಿಸಿದ್ದರು. ಸಿಡ್ನಿ ಕ್ರಿಕೆಟ್ ಮೈದಾನವನ್ನು ಸಾಂಪ್ರದಾಯಿಕವಾಗಿ ಆಸ್ಟ್ರೇಲಿಯಾದಲ್ಲಿ ಸ್ಪಿನ್ ಸ್ನೇಹಿ ಪಿಚ್ ಕರೆಯಲಾಗುತ್ತದೆ. ನಿರೀಕ್ಷೆಯಂತೆ ಪಿಚ್‌ನಲ್ಲಿ ವೇಗದ ಬೌಲರ್‌ಗಳು ಮೇಲುಗೈ ಸಾಧಿಸಿದರು.

ಸ್ಮಿತ್ ಹೇಳಿದ್ದೇನು?

ಸಿಡ್ನಿ ಪಿಚ್ ಬಗ್ಗೆ ಪಂದ್ಯ ಮುಗಿದ ಬಳಿಕ ಆಸ್ಟ್ರೇಲಿಯಾ ಸ್ಟಾರ್ ಬ್ಯಾಟರ್ ಸ್ಟೀವ್ ಸ್ಮಿತ್ ತಮ್ಮ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದರು. ಸಿಡ್ನಿ ಪಿಚ್‌ನಲ್ಲಿ ನನ್ನನ್ನು ಸರಪಳಿಯಿಂದ ಕಟ್ಟಿ ಹಾಕಿದಂತೆ ಭಾಸವಾಗುತ್ತಿತ್ತು. ನಾನು ತುಂಬಾ ಅಪಾಯಕಾರಿ ಚೆಂಡಿನಲ್ಲಿ ಔಟಾದೆ, ಚೆಂಡು ಇದ್ದಕ್ಕಿದ್ದಂತೆ ಸಾಕಷ್ಟು ಬೌನ್ಸ್ ಆಗಿತ್ತು. ಆದರೆ ಪಂದ್ಯದಿಂದ ಬಯಸಿದ ಫಲಿತಾಂಶವನ್ನು ಪಡೆದಿರುವುದು ತೃಪ್ತಿಯಿದೆ. ಈ ಬಾರಿಯ ಸಿಡ್ನಿಯ ಪಿಚ್ ಅತ್ಯಂತ ಕಠಿಣವಾಗಿತ್ತು. ಚೆಂಡು ಸಾಕಷ್ಟು ಸ್ವಿಂಗ್ ಆಗುತ್ತಿತ್ತು. ಹಿಂದೆಂದೂ ಸಿಡ್ನಿಯಲ್ಲಿ ಈ ರೀತಿಯ ಪಿಚ್‌ನಲ್ಲಿ ಆಡಿಲ್ಲ. ಇಲ್ಲಿ ಬ್ಯಾಟಿಂಗ್‌ ಮಾಡುವುದು ತುಂಬಾ ಕಷ್ಟಕರ ಎನಿಸಿತು ಎಂದು ಹೇಳಿದ್ದರು.

ಮೂರು ದಿನಗಳಲ್ಲಿ ಫಲಿತಾಂಶ

ಸಿಡ್ನಿ ಟೆಸ್ಟ್ ಪಂದ್ಯದ ಮೊದಲ ದಿನ 11 ವಿಕೆಟ್‌ಗಳು ಮತ್ತು ಎರಡನೇ ದಿನ 15 ವಿಕೆಟ್‌ಗಳು ಬಿದ್ದವು. ಟೀಮ್ ಇಂಡಿಯಾದ ಹಂಗಾಮಿ ನಾಯಕ ಜಸ್ಪ್ರೀತ್ ಬುಮ್ರಾ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಲು ನಿರ್ಧರಿಸಿದರು. ನಂತರ ಭಾರತ ತನ್ನ ಮೊದಲ ಇನ್ನಿಂಗ್ಸ್‌ನಲ್ಲಿ 185 ರನ್‌ಗಳಿಗೆ ಆಲೌಟಾಯಿತು. ಎರಡನೇ ದಿನ ಆಸ್ಟ್ರೇಲಿಯಾ 181 ರನ್‌ಗಳಿಗೆ ಕುಸಿಯಿತು. ಆದರೆ ಆಸೀಸ್ ವೇಗದ ಬೌಲರ್‌ಗಳು ಅದ್ಭುತ ಬೌಲಿಂಗ್ ಪ್ರದರ್ಶನದ ಪರಿಣಾಮ ಭಾರತ ಎರಡನೇ ಇನ್ನಿಂಗ್ಸ್‌ನಲ್ಲಿ ಕೇವಲ 157 ರನ್‌ಗಳಿಗೆ ಸರ್ವಪತನವಾಯಿತು. ಭಾರತ ನೀಡಿದ 162 ರನ್‌ಗಳ ಗೆಲುವಿನ ಗುರಿಯನ್ನು ಆಸ್ಟ್ರೇಲಿಯಾ ಯಶಸ್ವಿಯಾಗಿ ಬೆನ್ನಟ್ಟಿತು.