Ind vs Aus Test: ಪಿಚ್‌ಗೆ ನೀರು ಸುರಿದ ಕ್ಯುರೇಟರ್: ಕಾಫಿ ಕುಡಿದು ದೆಹಲಿ ಹಾದಿ ಹಿಡಿದ ಆಸ್ಟ್ರೇಲಿಯಾ!

ಕಾಫಿಗೆ ಕರೆದ ಲ್ಯಾಬುಸ್ಚಾಗ್ನೆ

ಇನ್ನು ಕ್ಯುರೇಟರ್ ಪಿಚ್‌ಗೆ ನೀರು ಹಾಕಿದ ಬಳಿಕ ನಿರಾಸೆ ಅನುಭವಿಸಿದ ಆಸ್ಟ್ರೇಲಿಯಾ ತಂಡವನ್ನು ಮಾರ್ನಸ್ ಲ್ಯಾಬುಸ್ಚಾಗ್ನೆ ಕಾಫಿ ಡೇಟ್‌ಗೆ ಕರೆದರು. ಲ್ಯಾಬುಸ್ಚಾಗ್ನೆ ಕಾಫಿಪ್ರಿಯ ಆಸ್ಟ್ರೇಲಿಯಾದಿಂದಲೇ ಅವರು ಕಾಫಿ ಕೆಜಿಗಟ್ಟಲೆ ಬೀಜಗಳನ್ನು ತಂದಿದ್ದಾರೆ. ಬೇಸರ ಕಡಿಮೆ ಮಾಡಲು ತಂಡದ ಆಟಗಾರರನ್ನು ಕಾಫಿಗೆ ಕರೆದರು.

ಟೀಮ್ ಹೋಟೆಲ್‌ನಲ್ಲಿ ಆಸ್ಟ್ರೇಲಿಯಾ ಆಟಗಾರರಿಗೆ ಕಾಫಿ ಮಾಡಿಕೊಟ್ಟರು. ಅದರಲ್ಲೂ ಕಳಪೆ ಫಾರ್ಮ್‌ನಲ್ಲಿರುವ ಡೇವಿಡ್ ವಾರ್ನರ್ ಗೆ ತಾಜಾ ಕಾಫಿ ನೀಡುವ ಮೂಲಕ ಅವರಲ್ಲಿ ವಿಶ್ವಾಸವನ್ನು ತುಂಬಲು ಯತ್ನಿಸಿದರು.

ಎರಡನೇ ಟೆಸ್ಟ್‌ಗೆ ವಾರ್ನರ್ ಕೈಬಿಡಲು ನಿರ್ಧಾರ?

ದೆಹಲಿಯಲ್ಲಿ ನಡೆಯಲಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಡೇವಿಡ್ ವಾರ್ನರ್ ರನ್ನು ಕೈಬಿಡುವ ಸಾಧ್ಯತೆ ಹೆಚ್ಚಾಗಿದೆ. ದೆಹಲಿ ಪಿಚ್‌ಗೆ ಸ್ಪಿನ್‌ಗೆ ನೆರವು ನೀಡುವುದರಿಂದ ಮೂವರು ಸ್ಪಿನ್ನರ್ ಗಳನ್ನು ಕಣಕ್ಕಿಳಿಸಲು ಆಸ್ಟ್ರೇಲಿಯಾ ಚಿಂತನೆ ನಡೆಸಿದೆ. ಎಡಗೈ ಸ್ಪಿನ್ನರ್ ಮ್ಯಾಟ್ ಕುಹ್ನೆಮನ್‌ರನ್ನು ತಂಡಕ್ಕೆ ಸೇರ್ಪಡೆ ಮಾಡಲಾಗಿದ್ದು, ದೆಹಲಿಯಲ್ಲಿ ತಂಡವನ್ನು ಸೇರಿಕೊಳ್ಳಲಿದ್ದಾರೆ.

ಡೇವಿಡ್‌ ವಾರ್ನರ್ ರನ್ನು ಕೈಬಿಡಬೇಕು ಮ್ಯಾಥ್ಯೂ ರೆನ್‌ಶಾ ಆರಂಭಿಕರಾಗಿ ಆಡಲಿ, ಟ್ರಾವಿಸ್ ಹೆಡ್‌ ಮಧ್ಯಮ ಕ್ರಮಾಂಕದಲ್ಲಿ ಆಡಬೇಕು ಎಂದು ಮಾಜಿ ಆಟಗಾರ ಮಿಚೆಲ್ ಜಾನ್ಸನ್ ಅಭಿಪ್ರಾಯಪಟ್ಟಿದ್ದಾರ.

ಟ್ರಾವಿಸ್‌ ಹೆಡ್ ಫಿಟ್ ಆಗಿದ್ದು ಎರಡನೇ ಪಂದ್ಯದಲ್ಲಿ ವಾರ್ನರ್ ಬದಲಾಗಿ ಕಣಕ್ಕಿಳಿಯುವ ಸಾಧ್ಯತೆ ಇದೆ. ಎಡಗೈ ವೇಗಿ ಮಿಚೆಲ್ ಸ್ಟಾರ್ಕ್ ಕೂಡ ಫಿಟ್ ಆಗಿದ್ದಾರೆ. ಆಲ್‌ರೌಂಡರ್ ಕ್ಯಾಮೆರೂನ್ ಗ್ರೀನ್ ಕೂಡ ಫಿಟ್ ಆಗಿದ್ದು ಎರಡನೇ ಟೆಸ್ಟ್‌ನಲ್ಲಿ ಕಣಕ್ಕಿಳಿಯುವ ಸಾಧ್ಯತೆ ಇದೆ.

ಗೆಲ್ಲುವ ವಿಶ್ವಾಸದಲ್ಲಿ ಕಾಂಗರೂ ಪಡೆ

ಮೊದಲನೇ ಪಂದ್ಯವನ್ನು ಹೀನಾಯವಾಗಿ ಸೋತ ಬಳಿಕ ಎರಡನೇ ಪಂದ್ಯವನ್ನು ಗೆಲ್ಲಲು ಆಸ್ಟ್ರೇಲಿಯಾ ಶತಪ್ರಯತ್ನ ಮಾಡಲಿದೆ. ಮಿಚೆಲ್ ಸ್ಟಾರ್ಕ್, ಗ್ರೀನ್ ಫಿಟ್ ಆಗಿರುವುದು ತಂಡದ ಆತ್ಮವಿಶ್ವಾಸ ಹೆಚ್ಚಿಸಿದೆ. ಕ್ಯಾಮೆರೂನ್ ಗ್ರೀನ್ ಬೌಲಿಂಗ್ ಮಾಡಲು ಫಿಟ್ ಆದರೆ ಆಸ್ಟ್ರೇಲಿಯಾಗೆ ಹೆಚ್ಚಿನ ಲಾಭವಾಗಲಿದೆ.

ಮ್ಯಾಟ್ ಕುಹ್ನೆಮನ್ ಚೊಚ್ಚಲ ಅಂತಾರಾಷ್ಟ್ರೀಯ ಟೆಸ್ಟ್ ಆಡಲು ಸಿದ್ಧವಾಗಿದ್ದಾರೆ. ಟಾಡ್ ಮುರ್ಫಿ, ನಾಥನ್ ಲಿಯಾನ್ ಜೊತೆ ಕುಹ್ನೆಮನ್ ತಂಡದಲ್ಲಿ ಅವಕಾಶ ಪಡೆದರೆ ಆಸ್ಟ್ರೇಲಿಯಾ ಸ್ಪಿನ್ ದಾಳಿ ಕೂಡ ಮಾರಕವಾಗಲಿದೆ.

ಮೊದಲನೇ ಟೆಸ್ಟ್ ಗೆದ್ದ ಖುಷಿಯಲ್ಲಿರುವ ಭಾರತ ಸ್ವಲ್ಪ ಯಾಮಾರಿದರೂ ದೆಹಲಿ ಟೆಸ್ಟ್‌ನಲ್ಲಿ ಅಪಾಯ ಎದುರಾಗುವುದು ನಿಶ್ಚಿತ.