IND vs AUS Test: ಗಬ್ಬಾ ಪಿಚ್‌ ಹೇಗಿದೆ? ಟೀಮ್ ಇಂಡಿಯಾ ಕಂ ಬ್ಯಾಕ್‌ ಮಾಡಲು ಏನು ಮಾಡಬೇಕು?

ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಣ ಬಾರ್ಡರ್‌ ಗವಾಸ್ಕರ್‌ ಸರಣಿ ನಡೆಯುತ್ತಿದೆ. ಪರ್ತ್‌ನಲ್ಲಿ ಭರ್ಜರಿ ಜಯ ದಾಖಲಿಸಿದ್ದ ಟೀಮ್ ಇಂಡಿಯಾಕ್ಕೆ, ಆಡಿಲೇಡ್‌ನಲ್ಲಿ ಆತಿಥೇಯ ಆಸೀಸ್‌ ತಂಡ ಶಾಕ್‌ ನೀಡಿದೆ. ಡೇ ಆಂಡ್‌ ನೈಟ್‌ ಟೆಸ್ಟ್‌ ಪಂದ್ಯದಲ್ಲಿ ಕಂಡ 10 ವಿಕೆಟ್‌ಗಳ ಸೋಲು ತಂಡವನ್ನು ಬಹುವಾಗಿ ಕಾಡುತ್ತಿದೆ. ಈ ಸೋಲಿನ ಕಹಿಯನ್ನು ಮರೆಯಲು ಟೀಮ್ ಇಂಡಿಯಾ ಪ್ಲ್ಯಾನ್ ಮಾಡಿಕೊಂಡಿದೆ. ಉಭಯ ದೇಶಗಳ ನಡುವಿನ ಮೂರನೇ ಟೆಸ್ಟ್‌ ಡಿಸೆಂಬರ್‌ 14 ರಂದು ಆರಂಭವಾಗುತ್ತದೆ.

ಡೇ ಆಂಡ್‌ ನೈಟ್‌ ಟೆಸ್ಟ್‌ ಪಂದ್ಯದಲ್ಲಿ ಟೀಮ್ ಇಂಡಿಯಾ ಆಟಗಾರರು ಸ್ಥಿರ ಪ್ರದರ್ಶನ ನೀಡುವಲ್ಲಿ ವಿಫಲರಾಗಿದ್ದರು. ಇವರು ಬ್ಯಾಟಿಂಗ್‌ ಹಾಗೂ ಬೌಲಿಂಗ್‌ನಲ್ಲಿ ಹಿನ್ನಡೆ ಅನುಭವಿಸಿದರು. ಪರಿಣಾಮ ಟೀಮ್ ಇಂಡಿಯಾ 10 ವಿಕೆಟ್‌ಗಳ ಸೋಲು ಕಂಡಿತು. ಆಸ್ಟ್ರೇಲಿಯಾ ಎರಡನೇ ಟೆಸ್ಟ್‌ ಗೆಲುವಿನ ಮೂಲಕ ಭರ್ಜರಿ ಕಮ್‌ಬ್ಯಾಕ್‌ ಮಾಡಿದೆ. ಈಗ ಟೀಮ್ ಇಂಡಿಯಾ ಪುಟಿದೇಳುವ ಲೆಕ್ಕಾಚಾರದಲ್ಲಿದೆ. ಈ ವೇಳೆ ಗಬ್ಬಾದ ಪಿಚ್‌ ಕೊಂಚ ಟೀಮ್ ಇಂಡಿಯಾ ಬ್ಯಾಟರ್‌ಗಳ ಮುಖದಲ್ಲಿ ಚಿಂತೆಯ ಗೆರೆಗಳನ್ನು ಮೂಡಿಸಿದೆ.

ಪಿಚ್‌ ಹೇಗಿದೆ?

ಬಾರ್ಡರ್-ಗವಾಸ್ಕರ್ ಟ್ರೋಫಿಯ ಮೂರನೇ ಟೆಸ್ಟ್ ಪಂದ್ಯ ಡಿಸೆಂಬರ್ 14 ರಿಂದ ಡಿಸೆಂಬರ್ 18 ರವರೆಗೆ ನಡೆಯಲಿದೆ. ಈ ಪಂದ್ಯಕ್ಕೆ ಬ್ರಿಸ್ಬೇನ್‌ನ ಗಬ್ಬಾ ಕ್ರಿಕೆಟ್ ಮೈದಾನ ಆತಿಥ್ಯ ವಹಿಸಲಿದೆ. ಸಾಮಾನ್ಯವಾಗಿ ಆಸ್ಟ್ರೇಲಿಯಾದಲ್ಲಿ ಇರುವಂತಹ ಪಿಚ್‌ ಗಬ್ಬಾದಲ್ಲಿ ಇರಲಿದೆ. ಈ ಪಿಚ್‌ ಮೇಲೆ ಬ್ಯಾಟರ್‌ಗಳು ನೆಲಕಚ್ಚಿ ಆಡಬೇಕು. ಅಂದಾಗ ಮಾತ್ರ ಬಿಗ್ ಇನಿಂಗ್ಸ್‌ ಕಟ್ಟಲು ಸಾಧ್ಯ ಇಲ್ಲದೇ ಇದ್ದರೆ, ಅಪಾಯ ಕಾದಿದೆ. ಇಲ್ಲಿನ ಪಿಚ್ ವೇಗದ ಬೌಲರ್‌ಗಳಿಗೆ ಸಹಾಯಕವಾಗಿರಲಿದೆ. ಇಲ್ಲಿ ಬೌನ್ಸ್‌ ಹಾಗೂ ಸ್ವಿಂಗ್‌ ಉತ್ತಮವಾಗಿರಲಿದೆ. ಹೀಗಾಗಿ ಮೊದಲು ಬ್ಯಾಟ್‌ ಮಾಡುವ ತಂಡ ಕೊಂಚ ತಾಳ್ಮೆಯಿಂದ ಬ್ಯಾಟ್ ಮಾಡುವುದು ಬೆಸ್ಟ್‌. ಇಲ್ಲದೇ ಇದ್ದರೆ ಅಪಾಯ ಕಟ್ಟಿಟ್ಟ ಬುತ್ತಿ.

ಏನು ಹೇಳುತ್ತೆ ಗಬ್ಬಾ ಅಂಕಿ ಅಂಶ?

ಗಬ್ಬಾದಲ್ಲಿ ಒಟ್ಟು 68 ಟೆಸ್ಟ್‌ ಪಂದ್ಯಗಳನ್ನು ಆಡಲಾಗಿದೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ಮಾಡಿದ ತಂಡ 27 ಪಂದ್ಯಗಳಲ್ಲಿ ಗೆಲುವು ದಾಖಲಿಸಿದೆ. ಈ ಪಿಚ್‌ನಲ್ಲಿ ಮೊದಲ ಇನಿಂಗ್ಸ್‌ನಲ್ಲಿ ಸರಾಸರಿ ಸ್ಕೋರ್‌ 327 ಆಗಿದೆ. ಈ ಪಿಚ್‌ನಲ್ಲಿ 645 ಗರಿಷ್ಠ ಸ್ಕೋರ್ ಆಗಿದ್ದು, 58 ರನ್‌ ಕನಿಷ್ಠ ಸ್ಕೊರ್‌. ಭಾರತ 329 ರನ್‌ಗಳನ್ನು ಇದೇ ಅಂಗಳದಲ್ಲಿ ಕಳೆದ ಪ್ರವಾಸದಲ್ಲಿ ಚೇಸ್‌ ಮಾಡಿ ದಾಖಲೆ ಬರೆದಿದೆ. ಈ ಮೈದಾನದಲ್ಲಿ ಭಾರತ ಒಟ್ಟು ಏಳು ಪಂದ್ಯಗಳನ್ನು ಆಡಿದ್ದು, ಇದರಲ್ಲಿ ಒಂದರಲ್ಲ ಮಾತ್ರ ಗೆಲುವು ದಾಖಲಿಸಿದೆ.

ಮೂರನೇ ಟೆಸ್ಟ್‌ಗೆ ಟೀಮ್ ಇಂಡಿಯಾ ಭರ್ಜರಿ ತಯಾರಿ ನಡೆಸಿದೆ. ತಂಡದಲ್ಲಿ ಬದಲಾವಣೆಗಳೊಂದಿಗೆ ಅಂಗಳಕ್ಕೆ ಇಳಿಯುವ ಸೂಚನೆ ನೀಡಿದೆ. ಎರಡನೇ ಟೆಸ್ಟ್‌ ಪಂದ್ಯದಲ್ಲಿ ಸ್ಥಿರ ಪ್ರದರ್ಶನ ನೀಡುವಲ್ಲಿ ವಿಫಲರಾಗಿರುವ ರವಿಚಂದ್ರನ್‌ ಅಶ್ವಿನ್ ಹಾಗೂ ಹರ್ಷಿತ್ ರಾಣಾ ಅವರಿಗೆ ವಿಶ್ರಾಂತಿ ನೀಡುವ ಸಾಧ್ಯತೆ ಇದೆ.