IND vs ENG: ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತ ವಿರುದ್ಧ ಇತಿಹಾಸ ನಿರ್ಮಿಸಿದ ಜೋ ರೂಟ್; ಸ್ಟೀವನ್ ಸ್ಮಿತ್ ದಾಖಲೆ ಧೂಳಿಪಟ

ಶುಕ್ರವಾರ, ಫೆಬ್ರವರಿ 23ರಿಂದ ರಾಂಚಿಯ ಜೆಎಸ್‌ಸಿಎ ಸ್ಟೇಡಿಯಂನಲ್ಲಿ ಆರಂಭವಾಗಿರುವ ಐದು ಪಂದ್ಯಗಳ ಟೆಸ್ಟ್ ಸರಣಿಯ ನಾಲ್ಕನೇ ಪಂದ್ಯದಲ್ಲಿ ಆತಿಥೇಯ ಭಾರತ ಮತ್ತು ಪ್ರವಾಸಿ ಇಂಗ್ಲೆಂಡ್ ತಂಡಗಳು ಮುಖಾಮುಖಿಯಾಗಿವೆ.

ಮೊದಲ ದಿನದಾಟದಂತ್ಯಕ್ಕೆ ಪ್ರವಾಸಿ ಇಂಗ್ಲೆಂಡ್ ತಂಡ ಮೊದಲ ಇನ್ನಿಂಗ್ಸ್‌ನಲ್ಲಿ 90 ಓವರ್‌ಗಳಲ್ಲಿ 7 ವಿಕೆಟ್‌ಗೆ 302 ರನ್ ಗಳಿಸಿದ್ದು, ಈ ಮೂಲಕ ಉಭಯ ತಂಡಗಳು ಮೊದಲ ದಿನದ ಗೌರವ ಹಂಚಿಕೊಂಡಿವೆ.

ಇದೇ ವೇಳೆ ತಮ್ಮ ಅಸಾಧಾರಣ ಸ್ಥಿರತೆ ಮತ್ತು ಕೌಶಲ್ಯವನ್ನು ಪ್ರದರ್ಶಿಸಿದ ಇಂಗ್ಲೆಂಡ್‌ನ ಜೋ ರೂಟ್ ಟೆಸ್ಟ್ ಕ್ರಿಕೆಟ್‌ನಲ್ಲಿ 31ನೇ ಹಾಗೂ ಭಾರತ ವಿರುದ್ಧ 10ನೇ ಟೆಸ್ಟ್ ಶತಕ ಬಾರಿಸಿದರು. ಈ ಮೂಲಕ ಭಾರತ ವಿರುದ್ಧ ಅತಿ ಹೆಚ್ಚು ಶತಕಗಳನ್ನು ಗಳಿಸಿದ ಅಗ್ರ ಆಟಗಾರನಾಗುವ ಮೂಲಕ ಕ್ರಿಕೆಟ್ ಇತಿಹಾಸವನ್ನು ನಿರ್ಮಿಸಿದರು.

ರಾಂಚಿಯಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್‌ ಪಂದ್ಯದ ಮೊದಲ ದಿನದಲ್ಲಿ ಜೋ ರೂಟ್ ಅವರ ಮಾಸ್ಟರ್‌ಫುಲ್ ಇನ್ನಿಂಗ್ಸ್ ಇಂಗ್ಲೆಂಡ್ ತಂಡವನ್ನು ಗೊಂದಲದ ಸ್ಥಿತಿಯಿಂದ ಕಾಪಾಡಿತು.

ಇಂಗ್ಲೆಂಡ್ ತಂಡ ಗೆಲ್ಲಲೇಬೇಕಾದ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಳ್ಳುವುದರೊಂದಿಗೆ ಆಟ ಪ್ರಾರಂಭವಾಯಿತು ಮತ್ತು ಮೊದಲ ಸೆಷನ್‌ನಲ್ಲಿ ಚೊಚ್ಚಲ ಟೆಸ್ಟ್ ಪಂದ್ಯವಾಡಿದ ಭಾರತೀಯ ವೇಗಿ ಆಕಾಶ್ ದೀಪ್ ಪ್ರಾಬಲ್ಯ ಸಾಧಿಸಿದರು.

ಬೆನ್ ಡಕೆಟ್, ಒಲ್ಲಿ ಪೋಪ್ ಮತ್ತು ಝಾಕ್ ಕ್ರಾಲಿ ಅವರ ಮೂರು ತ್ವರಿತ ವಿಕೆಟ್‌ಗಳೊಂದಿಗೆ ಇಂಗ್ಲೆಂಡ್‌ನ ಅಗ್ರ-ಕ್ರಮಾಂಕಕ್ಕೆ ಶಾಕ್ ನೀಡಿದರು. 57 ರನ್‌ಗಳಿಗೆ 3 ವಿಕೆಟ್‌ ಮತ್ತು ನಂತರ, 112 ರನ್‌ಗಳಿಗೆ 5 ವಿಕೆಟ್‌ ಕಳೆದುಕೊಂಡು ಇಂಗ್ಲೆಂಡ್‌ ತಂಡದ ಇನ್ನಿಂಗ್ಸ್ ಕತ್ತಿಯ ನೆತ್ತಿಯ ಮೇಲೆ ತೂಗಾಡುತ್ತಿತ್ತು.

ಬಲಗೈ ಬ್ಯಾಟರ್ ಜೋ ರೂಟ್ ಹಿಂದಿನ ಪಂದ್ಯಗಳಲ್ಲಿ ತಮ್ಮ ಬ್ಯಾಟಿಂಗ್ ವಿಧಾನಕ್ಕಾಗಿ ಟೀಕೆಗೊಳಗಾಗಿದ್ದರು. ಹೀಗಾಗಿ, ಸತತ ವೈಫಲ್ಯಗಳಿಂದ ಪಾಠ ಕಲಿತ ಸ್ಟಾರ್ ಬ್ಯಾಟರ್ ಬಜ್‌ಬಾಲ್ ವಿಧಾನದ ಬದಲಾಗಿ, ತಮ್ಮ ಸಾಂಪ್ರದಾಯಿಕ ಶೈಲಿಯ ಬ್ಯಾಟಿಂಗ್ ಮೂಲಕ ರನ್ ಗಳಿಸಲು ಮುಂದಾದರು.

ತನ್ನ ನೈಜ ಶೈಲಿಯ ಬ್ಯಾಟಿಂಗ್‌ಗೆ ಮರಳಿದ ಜೋ ರೂಟ್ ಎಚ್ಚರಿಕೆಯಿಂದ ಇನ್ನಿಂಗ್ಸ್ ನಿರ್ಮಿಸಿದರು. ಒಲ್ಲಿ ರಾಬಿನ್ಸನ್ ಅಜೇಯ 31 ರನ್ ಮತ್ತು ಜೋ ರೂಟ್ ಅಜೇಯ 106 ರನ್‌ಗಳೊಂದಿಗೆ 2ನೇ ದಿನದಂದು ತಮ್ಮ ಇನ್ನಿಂಗ್ಸ್ ಅನ್ನು ಪುನರಾರಂಭಿಸುತ್ತಾರೆ.

ಜೋ ರೂಟ್ ಅವರು ಬೆನ್ ಫೋಕ್ಸ್ ಜೊತೆಗೆ 113 ರನ್‌ಗಳ ಅದ್ಭುತ ಜೊತೆಯಾಟವನ್ನು ಕಟ್ಟಿದರು ಮತ್ತು ಪ್ರವಾಸಿ ಇಂಗ್ಲೆಂಡ್ ತಂಡವನ್ನು ಮತ್ತೆ ಆಟಕ್ಕೆ ಮರಳಿ ಕರೆತಂದರು. ಇದೇ ವೇಳೆ ಜೋ ರೂಟ್ 2ನೇ ದಿನದಂದು ಬ್ಯಾಟಿಂಗ್ ಮುಂದುವರಿಸಿ, ಒಟ್ಟು ಮೊತ್ತಕ್ಕೆ ಹೆಚ್ಚು ರನ್ ಸೇರಿಸುವ ಮೂಲಕ ತನ್ನ ತಂಡವನ್ನು ಉತ್ತಮ ಸ್ಥಾನದಲ್ಲಿ ಇರಿಸಲು ಎದುರು ನೋಡುತ್ತಿದ್ದಾರೆ.

ಗಮನಾರ್ಹ ವೈಯಕ್ತಿಕ ದಾಖಲೆ

ಜೋ ರೂಟ್ ಅವರ ಅದ್ಭುತ ಶತಕವು ಗಮನಾರ್ಹ ವೈಯಕ್ತಿಕ ದಾಖಲೆಯನ್ನು ಸ್ಥಾಪಿಸಿತು. ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಅವರ ಸ್ಥಾನವನ್ನು ಹೆಚ್ಚಿಸಿತು. ಈ ಶತಕದೊಂದಿಗೆ, ಜೋ ರೂಟ್ ಇದೀಗ ಟೆಸ್ಟ್ ಕ್ರಿಕೆಟ್‌ನಲ್ಲಿ ಒಟ್ಟು 31 ಶತಕಗಳಲ್ಲಿ ಭಾರತ ವಿರುದ್ಧವೇ 10 ಶತಕಗಳನ್ನು ಗಳಿಸಿದ್ದಾರೆ.

ಈ ಗಮನಾರ್ಹ ಸಾಧನೆಯು ಅವರನ್ನು ಗ್ಯಾರಿ ಸೋಬರ್ಸ್, ವಿವ್ ರಿಚರ್ಡ್ಸ್, ರಿಕಿ ಪಾಂಟಿಂಗ್ ಮತ್ತು ಸಮಕಾಲೀನ ಸ್ಟಾರ್ ಬ್ಯಾಟರ್ ಸ್ಟೀವನ್ ಸ್ಮಿತ್‌ ಅವರಂತಹ ಪ್ರಸಿದ್ಧ ಆಟಗಾರರನ್ನು ಮೀರಿಸಿತು.

ಭಾರತದ ವಿರುದ್ಧ ಅತಿ ಹೆಚ್ಚು ಟೆಸ್ಟ್ ಶತಕ ಸಿಡಿಸಿದ ಆಟಗಾರರ ಪಟ್ಟಿ

ಜೋ ರೂಟ್ - 10 ಶತಕ (52 ಇನ್ನಿಂಗ್ಸ್)
ಸ್ಟೀವನ್ ಸ್ಮಿತ್ - 9 ಶತಕ (37 ಇನ್ನಿಂಗ್ಸ್)
ಸರ್ ಗ್ಯಾರಿ ಸೋಬರ್ಸ್ - 8 ಶತಕ (30 ಇನ್ನಿಂಗ್ಸ್)
ಸರ್ ವಿವ್ ರಿಚರ್ಡ್ಸ್ - 8 ಶತಕ (41 ಇನ್ನಿಂಗ್ಸ್)
ರಿಕಿ ಪಾಂಟಿಂಗ್ - 8 ಶತಕ (51 ಇನ್ನಿಂಗ್ಸ್)