ಟೀಂ ಇಂಡಿಯಾಗೆ ಆಘಾತ; ಇಶಾನ್ ಕಿಶನ್ ಔಟ್, 2ನೇ ಟಿ20ಗೆ ಹೊಸ ವಿಕೆಟ್ ಕೀಪರ್ ಯಾರು?

ಕ್ರೈಸ್ಟ್‌ಚರ್ಚ್‌ನಲ್ಲಿ ನಡೆಯಲಿರುವ ನ್ಯೂಜಿಲೆಂಡ್ ವಿರುದ್ಧದ 2ನೇ ಟಿ20 ಪಂದ್ಯಕ್ಕೂ ಮುನ್ನವೇ ಟೀಮ್ ಇಂಡಿಯಾ ಯೋಜನೆಯಲ್ಲಿ ಮಹತ್ವದ ಬದಲಾವಣೆಯಾಗಿದೆ. ವಿಕೆಟ್ ಕೀಪರ್-ಬ್ಯಾಟರ್ ಇಶಾನ್ ಕಿಶನ್ ಬಲ ತೊಡೆಯ ಸ್ನಾಯು ಸೆಳೆತದಿಂದಾಗಿ (Right Adductor Strain) ಪಂದ್ಯದಿಂದ ಹೊರಬಿದ್ದಿದ್ದಾರೆ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ಶುಕ್ರವಾರ ದೃಢಪಡಿಸಿದೆ. ಅವರ ಬದಲಿಗೆ ಯುವ ವಿಕೆಟ್‌ಕೀಪರ್ ಕುಮಾರ್ ಕುಶಾಗ್ರ ಅವರನ್ನು ಕವರ್ ಆಟಗಾರನಾಗಿ ಭಾರತ ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ. ಈ ಪಂದ್ಯದ ಟಾಸ್ ಭಾರತೀಯ ಕಾಲಮಾನ ಮಧ್ಯಾಹ್ನ 12:00 ಗಂಟೆಗೆ ನಡೆಯಲಿದ್ದು, 12:30ಕ್ಕೆ ಮೊದಲ ಎಸೆತ ಎಸೆಯಲಾಗುವುದು. ಸದ್ಯ ಸರಣಿಯಲ್ಲಿ ಭಾರತ 1-0 ಮುನ್ನಡೆ ಸಾಧಿಸಿದೆ.

ಗುರುವಾರ ಹ್ಯಾಗ್ಲಿ ಓವಲ್‌ನಲ್ಲಿ ನಡೆದ ಮೊದಲ ಪಂದ್ಯದ ವೇಳೆ ಇಶಾನ್ ಕಿಶನ್ ಗಾಯಗೊಂಡಿದ್ದಾರೆ ಎಂದು ಬಿಸಿಸಿಐ ತಿಳಿಸಿದೆ. ಈಗಾಗಲೇ ಇಂಡಿಯಾ 'ಎ’ ತಂಡದೊಂದಿಗೆ ಕ್ರೈಸ್ಟ್‌ಚರ್ಚ್‌ನಲ್ಲಿರುವ ಕುಶಾಗ್ರ, ಈ ಪಂದ್ಯಕ್ಕಾಗಿ ಸ್ಪೆಷಲಿಸ್ಟ್ ವಿಕೆಟ್‌ಕೀಪಿಂಗ್ ಆಪ್ಷನ್ ಆಗಿ ತಂಡ ಸೇರಿಕೊಂಡಿದ್ದಾರೆ. ಮೊದಲ ಪಂದ್ಯದಲ್ಲಿ ಭಾರತ ದಾಖಲೆಯ ರನ್ ಚೇಸ್ ಮಾಡಿ ಸರಣಿಯಲ್ಲಿ ಶುಭಾರಂಭ ಕಂಡ 24 ಗಂಟೆಗಳ ಒಳಗಾಗಿಯೇ ಈ ಮಾಹಿತಿ ಹೊರಬಿದ್ದಿದ್ದು, ಇಂದಿನ ಪಂದ್ಯದ ಪ್ಲೇಯಿಂಗ್ ಇಲೆವೆನ್ ಆಯ್ಕೆ ಕುರಿತು ತೀವ್ರ ಕುತೂಹಲ ಮೂಡಿಸಿದೆ.

IND vs NZ 2nd T20I: ಓಪನಿಂಗ್ ಮತ್ತು ವಿಕೆಟ್‌ ಕೀಪಿಂಗ್ ಕಾಂಬಿನೇಷನ್ ಹೇಗಿರಲಿದೆ?

ಮೊದಲ ಟಿ20ಯಲ್ಲಿ ಅಭಿಷೇಕ್ ಶರ್ಮಾ ಮತ್ತು ಸಂಜು ಸ್ಯಾಮ್ಸನ್ ಇನಿಂಗ್ಸ್ ಆರಂಭಿಸಿದ್ದರು. ಈ ಪಂದ್ಯದಲ್ಲಿ 67 ರನ್ ಸಿಡಿಸಿದ್ದ ಸ್ಯಾಮ್ಸನ್ 'ಪ್ಲೇಯರ್ ಆಫ್ ದಿ ಮ್ಯಾಚ್' ಪ್ರಶಸ್ತಿ ಪಡೆದಿದ್ದರು. ಪಂದ್ಯದ ಬಳಿಕ ಮಾತನಾಡಿದ್ದ ಅವರು, "ನಾವು ಕೇವಲ ಚೆಂಡನ್ನು ಗಮನಿಸಿ ಬಲವಾಗಿ ಬಾರಿಸುತ್ತೇವಷ್ಟೇ," ಎಂದಿದ್ದರು. ಈಗ ಕಿಶನ್ ಅಲಭ್ಯರಾಗಿರುವುದರಿಂದ ಸಂಜು ಸ್ಯಾಮ್ಸನ್ ವಿಕೆಟ್‌ಕೀಪಿಂಗ್ ಮಾಡುವ ಸಾಧ್ಯತೆ ಹೆಚ್ಚಾಗಿದೆ. ಒಂದು ವೇಳೆ ಭಾರತ ಹೊಸ ಪ್ಲಾನ್ ಮಾಡಿಕೊಂಡರೆ ಕುಶಾಗ್ರ ಪಕ್ಕಾ ವಿಕೆಟ್‌ಕೀಪರ್ ಆಯ್ಕೆಯಾಗಲಿದ್ದಾರೆ. ಇನ್ನು ಗುರುವಾರದ ಪಂದ್ಯದಲ್ಲಿ 3ನೇ ಕ್ರಮಾಂಕದಲ್ಲಿ ಬ್ಯಾಟ್ ಮಾಡಿದ್ದ ತಿಲಕ್ ವರ್ಮಾ, ಟಾಪ್ ಆರ್ಡರ್‌ಗೆ ಮತ್ತೊಬ್ಬ ಬಲವಾದ ಪರ್ಯಾಯ ಆಟಗಾರನಾಗಿದ್ದಾರೆ.

ಟಾಸ್ ಸಮಯ, ಪಂದ್ಯ ಆರಂಭ ಮತ್ತು ಮೈದಾನದ ವಿವರ

ಎರಡನೇ ಟಿ20 ಪಂದ್ಯವು ಹ್ಯಾಗ್ಲಿ ಓವಲ್‌ನಲ್ಲಿ ಭಾರತೀಯ ಕಾಲಮಾನ ಮಧ್ಯಾಹ್ನ 12:30ಕ್ಕೆ ಆರಂಭವಾಗಲಿದ್ದು, ಮಧ್ಯಾಹ್ನ 12:00 ಗಂಟೆಗೆ ಟಾಸ್ ನಡೆಯಲಿದೆ. ಗುರುವಾರ ನಡೆದ ಪಂದ್ಯದಲ್ಲಿ ಆರಂಭಿಕ ಸ್ವಿಂಗ್ ಹಾಗೂ ಬಳಿಕ ಬಿದ್ದ ಭಾರಿ ಇಬ್ಬನಿ (Dew) ಪ್ರಮುಖ ಪಾತ್ರ ವಹಿಸಿತ್ತು. ಟಾಸ್ ವೇಳೆ ಉಭಯ ತಂಡಗಳ ನಾಯಕರು ಈ ಅಂಶವನ್ನು ಖಂಡಿತ ಪರಿಗಣಿಸಲಿದ್ದಾರೆ. ಒಂದೇ ಮೈದಾನ, ಒಂದೇ ಸಮಯಕ್ಕೆ ಪಂದ್ಯ ನಡೆಯುತ್ತಿರುವುದರಿಂದ ಸ್ಪಷ್ಟ ಯೋಜನೆ ಹಾಗೂ ಪವರ್‌ಪ್ಲೇನಲ್ಲಿ ಆಕ್ರಮಣಕಾರಿ ಆಟವಾಡುವ ತಂಡಕ್ಕೆ ಹೆಚ್ಚಿನ ಲಾಭ ಸಿಗಲಿದೆ.

ಟಾಸ್ ಸಮಯದಲ್ಲಿ ಅಂತಿಮ ಪ್ಲೇಯಿಂಗ್ 11 ಪ್ರಕಟವಾಗಲಿದ್ದು, ಭಾರತದ ವಿಕೆಟ್‌ಕೀಪರ್ ಹಾಗೂ ಓಪನರ್ ಯಾರಾಗಲಿದ್ದಾರೆ ಎಂಬ ಕುತೂಹಲಕ್ಕೆ ಆಗ ತೆರೆಬೀಳಲಿದೆ. ಸ್ಯಾಮ್ಸನ್ ಓಪನಿಂಗ್ ಜೊತೆಗೆ ಕೀಪಿಂಗ್ ಮಾಡಿದರೆ ತಂಡದ ಸಮತೋಲನ ಕಾಯ್ದುಕೊಳ್ಳಬಹುದು. ಒಂದು ವೇಳೆ ಕುಶಾಗ್ರ ಪದಾರ್ಪಣೆ ಮಾಡಿದರೆ, ಭಾರತಕ್ಕೆ ಸ್ಪೆಷಲಿಸ್ಟ್ ಕೀಪರ್ ಸಿಗುವುದಲ್ಲದೆ ಕೆಳ ಕ್ರಮಾಂಕದಲ್ಲೂ ಉತ್ತಮ ಫ್ಲೆಕ್ಸಿಬಿಲಿಟಿ ಸಿಗಲಿದೆ. ಏನೇ ಆದರೂ, ಎರಡು ದಿನಗಳ ಹಿಂದೆಯಷ್ಟೇ ಇಲ್ಲಿನ ವಾತಾವರಣವನ್ನು ಸದುಪಯೋಗಪಡಿಸಿಕೊಂಡಿರುವ ಚಾಂಪಿಯನ್ ಟೀಮ್ ಇಂಡಿಯಾ, ಸರಣಿಯಲ್ಲಿ 2-0 ಮುನ್ನಡೆ ಸಾಧಿಸುವ ಗುರಿ ಹೊಂದಿದೆ.