India vs South Africa: 2024ರ ಟಿ20 ವಿಶ್ವಕಪ್ ವಿಜೇತ, ರನ್ನರ್-ಅಪ್‌ಗೆ ಸಿಗುವ ಬಹುಮಾನ ಮೊತ್ತವೆಷ್ಟು?

2024ರ ಐಸಿಸಿ ಟಿ20 ವಿಶ್ವಕಪ್ ಪಂದ್ಯಾವಳಿಯು ತನ್ನ ರೋಮಾಂಚಕ ಮುಕ್ತಾಯ ಹಂತವನ್ನು ತಲುಪುತ್ತಿದ್ದಂತೆ, ಪ್ರಪಂಚದಾದ್ಯಂತದ ಕ್ರಿಕೆಟ್ ಪ್ರೇಮಿಗಳು ಪ್ರಶಸ್ತಿ ಯಾರು ಎತ್ತಿ ಹಿಡಿಯಲಿದ್ದಾರೆ ಎಂದು ಕುತೂಹಲದಿಂದ ಎದುರು ನೋಡುತ್ತಿದ್ದಾರೆ.

ಶನಿವಾರ, ಜೂನ್ 29ರಂದು ಬಾರ್ಬಡೋಸ್‌ನಲ್ಲಿ ಭಾರತ ಮತ್ತು ದಕ್ಷಿಣ ಆಫ್ರಿಕಾ ತಂಡಗಳ ನಡುವೆ ಗ್ರ್ಯಾಂಡ್ ಫಿನಾಲೆ ನಡೆಯಲಿದ್ದು, ಉಭಯ ದೇಶಗಳ ಕ್ರಿಕೆಟ್ ಪ್ರೇಮಿಗಳ ಉತ್ಸಾಹವಂತೂ ಮುಗಿಲು ಮುಟ್ಟಿದೆ.

2024ರ ಟಿ20 ವಿಶ್ವಕಪ್ ಪಂದ್ಯಾವಳಿಯಲ್ಲಿ ಚಾಂಪಿಯನ್ ಆಗುವ ತಂಡವು ಕೇವಲ ಬೆಳ್ಳಿ ಟ್ರೋಫಿ ಮಾತ್ರವಲ್ಲದೆ, ದಾಖಲೆ ಮುರಿಯುವ ಬಹುಮಾನದ ಮೊತ್ತವನ್ನು ಪಡೆಯಲಿದೆ. ಅಲ್ಲದೆ, ರನ್ನರ್-ಅಪ್ ತಂಡವೂ ದೊಡ್ಡ ಮೊತ್ತವನ್ನು ಜೇಬಿಗಿಳಿಸಲಿದೆ.

ಈ ಪಂದ್ಯಾವಳಿಯಲ್ಲಿ ಅಸಾಧಾರಣ ಪ್ರದರ್ಶನ ನೀಡಿದ ಅಗ್ರ ನಾಲ್ಕು ತಂಡಗಳಿಗೆ ಬಹುಮಾನದ ಮೊತ್ತವೆಷ್ಟು ಎಂಬುದರ ಕುರಿತು ಒಳನೋಟವುಳ್ಳ ವಿಶ್ಲೇಷಣೆಯನ್ನು ಈ ವರದಿ ಒದಗಿಸುತ್ತದೆ.

ಕಳೆದ 2022ರ ಆವೃತ್ತಿಯನ್ನು ಗೆದ್ದಿದ್ದ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ತನ್ನ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವಲ್ಲಿ ವಿಫಲವಾಯಿತು. ಸೆಮಿಫೈನಲ್‌ನಲ್ಲಿ 2007ರ ಟಿ20 ವಿಶ್ವಕಪ್ ಆವೃತ್ತಿಯ ಚಾಂಪಿಯನ್ ಭಾರತ ವಿರುದ್ಧ 68 ರನ್‌ಗಳಿಂದ ಸೋತು ಹೊರಬಿತ್ತು ಮತ್ತು ರೋಹಿತ್ ಶರ್ಮಾ ಪಡೆ ಫೈನಲ್‌ಗೆ ಹೆಜ್ಜೆ ಹಾಕಿತು.

ಭಾರತ ತಂಡದ ಪಯಣವು ಅಫ್ಘಾನಿಸ್ತಾನ, ಬಾಂಗ್ಲಾದೇಶ ಮತ್ತು ಆಸ್ಟ್ರೇಲಿಯಾ ವಿರುದ್ಧ ಸೂಪರ್ 8ರ ಗೆಲುವು ಸೇರಿದಂತೆ ಪ್ರಬಲ ಪ್ರದರ್ಶನಗಳಿಂದ ಗುರುತಿಸಲ್ಪಟ್ಟಿದೆ. ಇದಕ್ಕೂ ಮೊದಲು, ಐರ್ಲೆಂಡ್, ಪಾಕಿಸ್ತಾನ ಮತ್ತು ಯುಎಸ್ಎ ವಿರುದ್ಧ ಗೆಲುವು ಸಾಧಿಸಿತು ಮತ್ತು ಕೆನಡಾ ವಿರುದ್ಧದ ಪಂದ್ಯವು ರದ್ದುಗೊಂಡಿತು.

ಮತ್ತೊಂದೆಡೆ, ದಕ್ಷಿಣ ಆಫ್ರಿಕಾ ತಂಡವು ಅಫ್ಘಾನಿಸ್ತಾನ ವಿರುದ್ಧ 9 ವಿಕೆಟ್‌ಗಳ ಗೆಲುವಿನ ನಂತರ, ಮೊದಲ ಬಾರಿಗೆ ಐಸಿಸಿ ಪಂದ್ಯಾವಳಿಯ ಫೈನಲ್ ತಲುಪಿದ್ದು, ಬೆಳ್ಳಿ ಟ್ರೋಫಿಯನ್ನು ಎತ್ತಿ ಹಿಡಿಯಲು ನಿರ್ಧರಿಸಿದೆ. ಇದಕ್ಕೂ ಮುನ್ನ ದಕ್ಷಿಣ ಆಫ್ರಿಕಾ ತನ್ನ ಪ್ರಾಬಲ್ಯವನ್ನು ಪ್ರದರ್ಶಿಸಿತು. ಸೂಪರ್ 8ರ ಎಲ್ಲಾ ಮೂರು ಪಂದ್ಯಗಳನ್ನು ಗೆದ್ದು ಅಗ್ರ ನಾಲ್ಕರಲ್ಲಿ ಸ್ಥಾನ ಪಡೆದಿತ್ತು.

ಬಹುಮಾನದ ಮೊತ್ತದ ವಿಭಜನೆ

ಅಂತಾರಾಷ್ಟ್ರೀಯ ಕ್ರಿಕೆಟ್ ಕೌನ್ಸಿಲ್ (ಐಸಿಸಿ) 2024ರ ಟಿ20 ವಿಶ್ವಕಪ್ ಪಂದ್ಯಾವಳಿಗಾಗಿ 11.25 ಮಿಲಿಯನ್ ಯುಎಸ್ ಡಾಲರ್‌ನ ದಾಖಲೆಯ ಬಹುಮಾನ ಮೊತ್ತವನ್ನು ಘೋಷಿಸಿದೆ.

ಈ ಗಣನೀಯ ಬಹುಮಾನವು ಪಂದ್ಯಾವಳಿಯು ಬೆಳೆಯುತ್ತಿರುವ ಪ್ರಾಮುಖ್ಯತೆ ಮತ್ತು ಪ್ರತಿಷ್ಠೆಯನ್ನು ಒತ್ತಿಹೇಳುತ್ತದೆ. ಬಹುಮಾನ ಮೊತ್ತದ ವಿತರಣೆಯ ವಿವರವಾದ ನೋಟ ಇಲ್ಲಿದೆ.

• ವಿಜೇತ ತಂಡ - 2,450,000 ಯುಎಸ್ ಡಾಲರ್‌ - 20,42,49,000 ರೂಪಾಯಿ

• ರನ್ನರ್ ಅಪ್ - 1,280,000 ಯುಎಸ್ ಡಾಲರ್‌ - 10,68,06,400 ರೂಪಾಯಿ

• ಸೋತ ಸೆಮಿ-ಫೈನಲಿಸ್ಟ್‌ಗಳು - 787,500 ಯುಎಸ್ ಡಾಲರ್‌ - 6,58,07,250 ರೂಪಾಯಿ

• ಸೂಪರ್ 8ರಲ್ಲಿ ಸೋತ ತಂಡಗಳು - 382,500 ಯುಎಸ್ ಡಾಲರ್‌ - 3,19,50,750 ರೂಪಾಯಿ

• 9ರಿಂದ 12ನೇ ಸ್ಥಾನ - 247,500 ಯುಎಸ್ ಡಾಲರ್‌ - 2,06,90,250 ರೂಪಾಯಿ

• 13ರಿಂದ 20ನೇ ಸ್ಥಾನ - 225,000 ಯುಎಸ್ ಡಾಲರ್‌ - 1,87,65,000 ರೂಪಾಯಿ